ᔂᓬᐊᒪᓐ ᐅᓂᑲᒧᓇᓐ 2 - Ojibwe Kihcimasina'ikan

¹ Niin ohsha waapikwan kaa⁠nihtaawikink pashkwahkamikank Sheran (Sharon) kaa'icikaatek. Kaa⁠miskonaakwahk waapikwan eyaak kaashi pahsatinaak.

Inini Ehkitotc

² Taapishkoo hsa waapikwan eyaak mekwe kaahshisiihkaank, mii hsa 'i eshinaakositc kaa⁠minwenimak mekwe ihkwehkaank.

Ihkwe Ehkitotc

³ A'a hsa inini kaa⁠minwenimak mii 'i enentaakositc taapishkoo pihshiiminaahtik kaa⁠patahkisotc noohpimiink mekwe mihtikohkaank. Kaawiin i'i kotak ininiwak inentaakosihsiiwak. Wiinke niminwentaan i'i e⁠nanamatapiyaan eshi akawaahtehkisotc a'a mihtik, kaa⁠nihtaawikihtootc wiinke kaa⁠shiiwiminohpitamowak.

⁴ Ninkiih piinik ihsa kaashi kihci wiihsininaaniwaninik, enihkwepiwak ekiih tashwekipitootc kihci oshipii'ikan eshipii'ikaatenik eh⁠minwenimitc.

⁵ Taka hsa tahsh shoominak ahshamihshin ci⁠mashkawi manci'oyaan, ahshamihshin pihshiiminak ci⁠minomanci'oyaan. Kaawiin ohsha nisaapi ayaahsii wa‑ahpiihci minweninkeyaan.

⁶ Onamantinihk hsa otaapacihtoon ci⁠ahpihkwehshimowak. Okihcinihk itahsh otaapacihtoon e⁠minciminitc.

⁷ Ihkwewak Ceroosalamink eyaayek, kiwiintamawininim ci⁠ahpimoyek mayaki waawaashkeshiwak, iki kaye noonshe waawaashkeshiwak kaa⁠papaamipa'itiwaatc mihshawahkamik; keko wanashkwe'ihshinaahkaank o'o kaa⁠minwenintiyaank, paanimaa kiih⁠teminwenintiyaank.

Mii 'owe Niishink Enikamonaaniwank Ihkwe Ehkakitotc

⁸ Ninoontawaa hsa kaa⁠minwenimak eh⁠piitwewitank. Ina' awe kaa⁠piicipahtootc kaapi aayaanci kwaashkonotank kihci waciin.

⁹ Kaa⁠minwenimak hsa mayaki waawaashkeshiink inentaakosi, taapishkoo oshki ayaape waawaashkeshiink. Inashke, awahsinahkehsak hsa ishi niipawi, e⁠pahpaapitc waahsehcikanink. Kaashi taashkihsakaanik e⁠onsaapitc.

¹⁰ Miitahsh o'o eshitc a'a inini kaa⁠minwenimak. Haw, ampe mayaawikaapawin kaa⁠minweniminaan, kaa⁠onishihshiyan, taka maacii wiiciiwihshin.

Inini Ehkitotc

¹¹ Aasha ohsha ishkwaapipoon, aasha kaye kii‑ishkwaa kimiwan.

¹² Aasha ohsha waapikwaniin kiishi nihtaawikinoon weti mihshawahkamik. Mii ohsha 'i aasha e⁠ocihcihsek miinawaa ci⁠nikamonaaniwank. Inashke omiimiik iitok noontawaawak e⁠nikamowaatc mihshawahkamik.

¹³ Aasha iitok pik tinowaahtikook kiishaahkwiiwak, minomaakosiwak kaye shoominaahtikook aasha eh⁠kiishaahkwiiwaatc. Ampe tahsh kaa⁠minweniminaan, kaa⁠onishihshiyan, taka wiiciiwihshin.

¹⁴ Mii hsa 'i enentaakosiyan taapishkoo omiimii kaa⁠kaasotc kaashi taashkaapihkaanik. Taka waapanta'ihshin kaa⁠minonaakwahk kiwiinkwaan. Etatawe ohsha kiminohtaakos kii⁠kiikitoyan. Wiinke hsa ko kite minonaakos.

¹⁵ Kaahcitin iki waakohshenhsak kaa⁠nihshiwanaacihtoowaatc kaashi kihtikaanimank shoomina', iniweniwan aasha kaa⁠kiishikininikin.

Ihkwe Ehkitotc

¹⁶ A'a hsa kaa⁠minwenimak inini nintipinawewis, wiin kaye nintipenimik. Ehpaa ahshamaatc omaanahcaanihshima' eshi wawaapikwanihkaanik.

¹⁷ Mii hsa weti eyaatc piinihsh kii⁠piitaapaninik, kiini ankonaakwaninik kaa⁠tipihkaninik. Kaa⁠minweniminaan taka pikiiwenotawihshin, pikiiwepahtoon taapishkoo mayaki waawaashkeshi taapishkoo kaye oshki ayaape waawaashkeshi kaashi kishiipahtootc kaashi papiihkwatinaanik Piihtar (Bether) kaa'icikaatenik.