Sehkaraaya 8 - Ojibwe Kihcimasina'ikan

KaaTipenciketc Kii'ahshotamaaketc Ewiihkiiwenaapihtootc Ceroosalam

¹ Miitahsh o'o Sehkaraaya (Zechariah) kaa'ikotc kaaMaawaci mashkawisiinitc kaaTipencikenitc.

² Mii hsa 'owe enihk kaaMaawaci mashkawisiitc kaaTipenciketc ci‑ihkitowatc, “Wiinke hsa nimihsawentaan cikii wiici'akwaapan Ceroosalamink eyaawaatc aaniihsh wiinke nishawenimaak. Eh⁠saaki'akwaa tahsh mii 'i wenci nishki'imitc kaa⁠shiinkenimikowaatc.

³ Miitahsh i'imaa keshi kiiweyaan Ceroosalamink ewii ishitaayaan. Miihsh ke⁠icikaatek Tepwewi kihci ootena kaye tahsh kihci waciw tepinawewisitc kaaMaawaci mashkawisiitc kaaTipenciketc ta⁠icikaate Kihci pihkwatinaank entanentaakositc kaaTipenciketc.

⁴ Miinawaa tahsh ahkiwensiwak, koohkominaanak kaa⁠sahka'owaatc ehpiihci kihci aya'aawiwaatc ta⁠nanamatapiwak ke⁠ishi mamiihkanaawaninik mekwe Ceroosalamink.

⁵ I'imaa hsa kaye misiwe miihkanaahkank kwiiwisenhsak, ihkwesenhsak kaye ta⁠papaa otaminowak.”

⁶ “Kaawiin etatawe i'i ta⁠ishihsehsinoon ta⁠inentamook iki pemaatisiwaatc kaa⁠ishkwiinowaatc niin itahsh wiin kaawiin i'i nahke ninka inentansii.

⁷ Niin hsa piko ninka pimaaci'aak nimpimaatisiimak pepahkaan ahkiink kaakii ayishiwinintwaapan waapanonk inahke, kaye tahsh ninkaapii'anonk inahkehkamik.

⁸ Ninka pikiiwewinaak ci⁠pikiiwe ishitaawaatc o'omaa Ceroosalamink. Niin hsa ninka tipenimaak. Miihsh ci⁠oKishemanitoomimiwaatc ci⁠tipenimakwaa eh⁠kwayahkwaatisiwak, kaye tahsh weweni ci⁠tootawakwaa.”

⁹ “Taka tahsh mashkawentamok! Miiwan ihsa ini peshikwan ihkitowinan kaa⁠noontamek kaakii ihkitowaahpan okanootamaakek ahpii kii⁠onaapihkinikaatek keshi kiiwe patahkitek kihci anami'ewikamik.

¹⁰ O'o hsa cipwaa ishihsekipan, kaawiin awiya kiih⁠tepihsehsii cikii anohkii'aahpan awiyan, komaa kaye aya'aawihshan. Kahkina iitok awiya kii⁠naniisaanentaakosi i'i ahpii. Niin itahsh i'i kaakiih tootawakwaa ci⁠maamiitaakwe'enintiwaatc.

¹¹ Kaawiin itahsh i'i nahke ninka tootawaahsiik oko kaa⁠ishkwiinowaatc pemaatisiwaatc otaanaank kaakiih tootawakwaapan,” ihkito kaaMaawaci mashkawisiitc kaaTipenciketc.

¹² “Kehtikaatemek ihsa ta⁠nihtaawikinoon, shoominaahtikook kaye ta⁠nihtaawikihcikewak. Wiinke kaye ta⁠minokinoon kehtikaatamek ahkiink, wiinke kaye ta⁠nihtaa kimiwan. Mii hsa i'i nahke keshi shawenimakwaa nimpimaatisiimak eshkwiinowaatc.

¹³ Pemaatisiyek wenciiyek Coota ahkiink, kaye tahsh kiinawaa Isriyal ahkiink! Mii hsa 'i pemi ishihcikewaatc kotak pemaatisiwaatc kii⁠maanenintiwaatc e⁠nihtaa'itiwaatc, ‘Ampehsh ishi maanshihseyek kaashi nihtaa maanshihsewaatc Coota ahkiink, Isriyal ahkiink kaye wenciiwaatc.’ Niin itahsh iko kika pimaaci'ininim. Miihsh iki mayakisiwaatc awiyak ke⁠ayitiwaatc, ampehsh ishi minohseyek kaashi shawentaakosiwaatc wenciiwaatc Coota ahkiink, kaye tahsh Isriyal ahkiink. Keko tahsh sekisihkek, mashkawentamok!”

¹⁴ Miihsh kaa‑ani ihkitotc kaaMaawaci mashkawisiitc kaaTipenciketc, “Ahpii hsa kii⁠nishki'iwaahpan kikehteya'aamiwaapaniik mii hsa 'i kaakii onentamowak aaniin keshi wahsitaawihsewaatc. Kaawiin ihsa ninkii onci aantentansii ekiih tootawakwaa kaakii inentamowakipan.

¹⁵ Inashke tahsh noonkom mii 'i eshi onentamaan ewii minotootawakwaa eyaawaatc Ceroosalamink, kaye tahsh Coota ahkiink. Keko tahsh sekisihkek.

¹⁶ Miiwan itahsh ono ke⁠ishihcikeyek: tepwek kii⁠kakanoonitiyek, kaashi tipaahkonitink kaye tepwewin aapacihtook ke⁠onci pisaanentamonaaniwank.

¹⁷ Keko kaye maci onentanken keshi macitootawatc kiici pimaatis! Keko kiiwanimohken aaniin kaakii ishi ahpimoyan ahpii kiikitoyan. Mii hsa 'iwe wiinke kaa⁠shiikentamaan,” ihkito kaaTipenciketc.

¹⁸ Miitahsh ehkitotc kaaMaawaci mashkawisiitc kaaTipenciketc,

¹⁹ “I'i hsa kaa⁠wiihsinihsink kii⁠anami'aank kipimakinsowaatc oko kiisihsook, niiwikiisihs, naanokiisihs, niishwaahsokiisihs, mitaahsokiisihs kaye aahpici ta⁠kihci ciihkahkamikan wiihkwantinaaniwank. Wiinke ta⁠ciihkentamook pemaatisiwaatc wenciiwaatc Coota ahkiink. Miitahsh eshinaakwahk ci⁠saakihtooyek tepwewin, pisaanihtwaawin kaye.”

²⁰ Miihsh eni ihkitotc kaaMaawaci mashkawisiitc kaaTipenciketc, “Kika otihsaapantaam ihsa ci‑ishihsek pemaatisiwaatc pepahkaani ootenaank ci⁠pionci takohshinowaatc ci⁠piishaawaatc Ceroosalamink.

²¹ O'o hsa tahsh ta‑ayitiwak iki pepahkaan ootenaahkaank kepi ayonciiwaatc, ‘Niinawint ihsa nintishaamin ewii awi anami'ehtawankitc kaaMaawaci mashkawisiitc kaaTipenciketc, ewiih kakwecimankitc ci⁠shawenimiyamitc. Haw, ampeyohk, wiiciiwihshinaam.’

²² Ta⁠paahtiinowak ihsa kaa⁠tahswewaanakisiwaatc awiyak, iki kaye kaa⁠mashkawentaakosiwaatc pemaatisiwaatc ke⁠piishaawaatc Ceroosalamink kihci ootenaank cipi anta anami'ehtawaawaatc kaaMaawaci mashkawisiinitc kaaTipencikenitc, cipi kakwecimaawaatc kaye ci⁠shawenimikowaatc.

²³ Mii hsa 'i ahpii ishi kiishikahk mitaahso (10) ininiwak entahso ayishikiishwewaatc, kaa⁠pepahkaanisiwaatc ke⁠sakiikipinaawaatc okikishkikaniniink peshik Coowan ci'inaawaatc, ‘Taka hsa kika wiiciiwikoo, aaniihsh ninoontaamin Kishemanitoo e⁠wiiciiwinek,’ ” mii 'iweni ehkitotc kaaMaawaci mashkawisiitc kaaTipenciketc.