Sehkaraaya 3 - Ojibwe Kihcimasina'ikan

Sehkaraaya Kiihpawaanaatc Kihci'anami'ewikimaan

¹ Miinawaahsh ninkii waapanta'ik Caahshowaan (Joshua) kii⁠kihci anami'ewikimaawinitc e⁠niipawinitc enaahsamiinitc otencaliman (angels) kaaTipenciketc. Caahshowaa tahsh okihcinihkiink inahke kii‑ishi niipawiwan Setanan Onanakaaniwen ewii ahsho anaamimikotc.

² Miitahsh i'i encal kaa'inaatc ini Onanakaaniwen, “KaaTipenciketc, kitoonci'ik kiin kaa⁠nanakaaniweyan! KaaTipenciketc kaakii onaapantank kihci ootenaani Ceroosalam (Jerusalem) hsa kitoonci'ik! Mii iitok wa'a inini ishkotenk kaakii onci manipicikaniwitc taapishkoo mihtik,” okii'inaan.

³ Caahshowaa wiinke iinsan kii⁠wiinihkonaye e⁠niipawitc enaahsamiinitc ini encalan.

⁴ Miitahsh o'o encal kaa'inaatc kotak encalan i'imaa kaakii niipawinitc enaahsamiitc, “Kiihcikoshkamoo'ihk ini wiinikikishkikanan kaa⁠kikishkank.” Miitahsh o'o encal kaa'inaatc Caahshowaan, “Inashke, mii hsa 'i e⁠wepinamaan ini kimacitootamowinan, kika miinin tahsh oshki kikishkikanan ke⁠kikishkaman,” okii'inaan.

⁵ Miitahsh o'o kaa‑ani ihkitotc, “Pihsihkamo'ihk kaa⁠pehkaninik kashkiikiiwaanohkwaanini ohtikwaanink.” Miitahsh kaa⁠ishi pihsihkamo'aawaatc i'i kaakiih pehkaninik kashkiikiiwaanohkwaanini ohtikwaaniniink, okiih pihcihkonaye'aawaan kaye ekii niipawinitc pehsho i'imaa kaaTipenciketc otencaliman.

⁶ Miihsh o'o Caahshowaa kaa'ikotc ini kaaTipenciketc otencaliman,

⁷ “Mii ohsha 'o ehkitotc kaaMaawaci mashkawisiitc kaaTipenciketc, ‘Kiishpin ishi pimohseyan nintishihtwaawinink, kanawentaman kaye kaa⁠ishi antaweniminaan, miitahsh pisaan ci⁠naanaakacihtooyan niwaahkaa'ikan, i'i kaye kaashi wiimpihcikaatek i'imaa saakicaya'ii kihci anami'ewikamikonk. Miitahsh kekiin ci⁠noontawinaan anami'ehtawiyan taapishkoo kaashi noontawakwaa oko o'omaa eyaawaatc eshi'ayaawak.

⁸ Caahshowaa, taka tahsh pisintan, kaa⁠kihci anami'ewikimaawiyan, ikiweniwak kaye kaa⁠wiiciiwihkwaa kaa⁠namatapiwaatc enaahsamikaapawiyan. Kiinawaa iitok kitinwaanikoom ininiwak kaa⁠naapinaakohtooyek kekoon wa‑ani ishihsek. Niwii naako'aa hsa nintanohkii'aakan a'a Watihkwan kaa⁠ishinihkaanintc.

⁹ Inashke waapamihk a'a ahsin kaa⁠pakitinak enaahsamiitc Caahshowaa. A'a hsa ahsin niishwaahcink (7) ishi tahtakwaapihkisi. Miitahsh i'imaa ke⁠ishi masinaapihka'amaan nintoshipii'ikanan. Peshiko kiishik tahsh ehta ninka tanahkamikis ninkoci ishi wepinamaan i'i macitootamowin i'imaa ahkiink,’ ihkito kaaMaawaci mashkawisiitc.

¹⁰ ‘Miihsh i'i ahpii kiishikahk, entahshiyek hsa kika antomaawaak kiwiicitaamaakaniwaak ci⁠wawiitapimekwaa shoominaahtikook, pik (fig) tinowaahtikook kaye eshi akawaahtehkisowaatc,’ ihkito kaaMaawaci mashkawisiitc kaaTipenciketc,” okii'ikoon kaaTipencikenitc otencaliman.