Sehkaraaya 2 - Ojibwe Kihcimasina'ikan

Sehkaraaya Kiiwaapantank Tipa'ikaneyaap

¹ Ishpimink e⁠inaapiyaan ninkii waapamaa inini e⁠tahkonank tipa'ikaneyaap.

² Miihsh kaa'inak, “Aaniinti eshaayan?” O'o tahsh ninkii'ik, “Niwiih tipaapiikinaan Ceroosalam aaniin ehkwaak, aaniin kaye enikwahkwateyaak.”

³ Miihsh kaa⁠ishi nakashitc a'a encal, kotak encalan ekiih pi anta nakishkaakotc o'o ekii'ikotc,

⁴ “Maaciipahtoon ci⁠awi wiintamawatc a'a oshkiniiki kaa⁠tahkonank tipa'ikaneyaap ewii kihci paahtiinonitc awiya', awahkaana' kaye i'imaa Ceroosalamink ewii ayaahsinok waahkaayaapihkinikan.

⁵ Wiin ihsa piko kaaTipenciketc ewiih tinowitc kaa⁠ishkotewank waahkaayaapihkinikan ewii waahkaashkank i'i kihci ootena ewii naatamawaatank, wiin iko kaye i'imaa ewii ishitaatc eshi kihci inentaakositc,” ihkito encal.

Kaakiimaaciinintwaapan Ehkiiwe'antomintwaa

⁶ “Ampeyohk, ci⁠onci maaciipa'iweyek weti kiiwetinonk ahkiink. Misiwe iitok kiishikonk wentaanimahk kikii ishi ohswe wepininim.

⁷ Ampeyohk, Saayan eninakook, kaa⁠ishitaayek weti Paapilan (Babylon) ahkiink,” ihkito kaaTipenciketc.

⁸ Miitahsh o'o ehkitotc kaaMaawaci mashkawisiitc kaaTipenciketc, “Awenen ihsa piko kaa⁠pahkihte'onek, mii 'i e⁠pahkihte'ank maawac kaa⁠saakihtaawak.” Miihsh oweni kaaMaawaci mashkawisiitc kaaTipenciketc eshitc ci'inimak kotak pahkaan pemaatisinitc kaa⁠nihshiwanaaci'aanitc opimaatisiima',

⁹ “Niin hsa piko kaaTipencikeyaan ninka miikaanaak iki neshiwanaacihcikewaatc, ewiih tootawakwaa ci⁠nihshiwanaaci'ikowaatc i'i kaakiih kitimaaki'aawaahpan. Ahpii tahsh i'i ishihsek, mii 'i ci⁠kihkentamek kaaMaawaci mashkawisiitc Tepenciketc ekiih piicinisha'otc.”

¹⁰ Miihsh ehkitotc kaaTipenciketc, “Shaakowek ci⁠kihkentamek, Ceroosalamink eyaayek. Niwiih pitakohshin ohsha ewiih pi wiicitaaminakook eshi'ayaayek.”

¹¹ Ta⁠paahtiinowak ihsa entahswewaanakisiwaatc pemaatisiwaatc kepi naasihkawaawaatc kaaTipencikenitc ci⁠tipenimikowaatc i'i ahpii. Mekweya'ii eshi'ayaayek ihsa kewiin ta⁠ishitaa, miihsh ci⁠kihkentamek wiin kaaMaawaci mashkawisiitc Tepenciketc ekiih piicinisha'otc.

¹² Wiin hsa iko kaaTipenciketc oka tipentaan kaa⁠kihtentaakwaninik ahki memintake ko oka onaapantaan Ceroosalam (Jerusalem) kihci ootena ci⁠saakihtoon.

¹³ Keko tahsh noontaatihkek kahkina entahshiyek enaahsamiitc kaaTipenciketc. Wiin ihsa piko wiih⁠pionci takohshin eshi kihtentaakwaninik otaawinink.