Sehkaraaya 11 - Ojibwe Kihcimasina'ikan

Kiishaakooci'intwaa Kaakakwaanihsakisiwaatc Kihciokimaak

¹ Kiin Lepanan (Lebanon), pisaan paahkisitoon kitishkwaanteman ishkotenk ci⁠onci caakaahkisowaatc kikiishkaahtikomak.

² Shinkwaahkwahk, kihci mawik. Kiishkaahtikook ohsha kiih⁠kawihsewak, mihtikook kehci inentaakosiwaahpan ekii nihshiwanaaci'intwaa iinsan. Ohk tinowaahtikook eyaayek Peshan (Bashan) ayaawinink, mawik, i'i eshi noohpimiiwankipan wiinke ekii pashkoka'ikaatek.

³ Iki hsa tahsh wekimaahkantaakewaatc onci mawiwak e⁠maanentamowaatc aaniihsh kaawiin awahshime kihci inentaakosihsiiwak. Inashke noontawihkwak oshki mihshipishiwak e⁠nenkimonoontaakosiwaatc; aaniihsh eshitaawaahpan kaashi sakihkopaanik ciiki siipink Cwaartan (Jordan) kii⁠nihshiwanaacihcikaateni.

Niishin Okanawimaanahcaanihshiwek Ehtashimintwaa

⁴ Miihsh kaaTipenciketc ninKishemanitoom ehkitotc, “Ishihcikehkaasoon taapishkoo okanawi maanahcaanihshiwe kaa⁠ishiwinaatc omaanahcaanihshima' keshi nihsimintc.

⁵ Iki hsa tahsh etaawewaatc i'i maanahcaanihsha' onihsaawaa', kaawiin kekoon ishi nana'ahsaahsiiwak. Iki tahsh wiin kaakii ataawaakewaatc i'i maanahcaanihsha' mii 'i ehkitowaatc, ‘Ta⁠miikwehciwenimaa kaaTipenciketc e⁠wenootisiyaan!’ Kaawiin ihsa kanake okoohpaatenimikohsiiwaa' tepenimikowaatc.”

⁶ Miihsh ehkitotc kaaTipenciketc, “Kaawiin itahsh intawaa awiya niwiih koohpaasinawaahsii o'omaa ahkiink. Niin hsa piko ninka tootawaak kahkina pemaatisiwaatc ci⁠wehsaani tipenimikowaatc wekimaahkantaakenitc. Miiwa' itahsh o'o ke⁠tetako nihshiwanaacihtoonitc o'o ahkiini, kaawiin itahsh kanake awiya niwiih pimaaci'aahsii.”

⁷ Miihsh niin Sehkaraaya (Zechariah) kaakii anohkii'iwaatc iki etaawewaatc, etaawaakewaatc kaye maanahcaanihsha'. Niin itahsh ninkii naanaakaci'aak maanahcaanihshak kaawii nihsintwaapan. Niishin (2) mihtikoon ninkii otaahpinaanan: peshik i'i mihtik “Minwenimikoowihs” ekii ishinihkaatamaan, i'i tahsh kotak “Wiiciintiwin” ninkii ishinihkaataan. Niin itahsh ninkiih kanawenimaak maanahcaanihshak.

⁸ Peshiko kiisihs itahsh e⁠ani ishihsek ninkii ani pooni shashiipinawes, miihsh kaakii kiishkinakwaa kotak nihsin (3) kaakiih shiinkenimiwaatc okanawi maanahcaanihshiwek.

⁹ Miihsh kaa⁠ihkitoyaan kenawenimakwaa maanahcaanihshak, “Kaawiin ihsa awahshime niwiih tinowihsii okanawi maanahcaanihshiwe ewiih pooni naanaakaci'inakook. Taka iki kaawii nipowaahpan pisaan ta⁠nipowak. Iki kaawii nihsintwaapan pisaan ta⁠nihsaawak. Iki tahsh ke⁠ishkohsewaatc pisaan ta⁠caaki'itiwak.”

¹⁰ Miihsh kaakii otaahpinamaan nimihtikom “Minwenimikoowihs” eshinihkaatek ekiih poohkonamaan. Miihsh ekiih piikonamaan kaaTipenciketc kaakii ishi ahshotamawaakopan i'i kahkina entahswewaanakisinitc pemaatisinitc.

¹¹ Miihsh ekiih poonihsek i'i ahshotamaakewin i'i ahpii eh⁠kiishikahk. Miitahsh iki etaawewaatc, etaawaakewaatc kaye maanahcaanihsha' eh⁠kanawaapamiwaatc, okii kihkentaanaawaa iinsan kaaTipencikenitc e⁠onci kiikitonitc i'imaa kaakii ishihcikewak.

¹² Miitahsh kaa'inakwaa, “Kiishpin inentamek, tipa'amawihshik. Kiishpin itahsh wiih⁠tipa'amawihsiwek, pisaaniko kanawenimihk.” Miihsh kaa⁠ishi miishiwaatc nihsimitana (30) waapaapihko shooniyaanhsa' ekiih tipa'amawiwaatc.

¹³ Miitahsh kaaTipenciketc kaakiih kanooshitc, “Aahpakitamow a'a otoonaakanihke.” Miihsh kaa⁠ishi piintikanak a'a nihsimitana (30) waapaapihko shooniyaanhs ekii aahpakitamawak otoonaakanihke kihci anami'ewikamikonk. Kihci niipiwa' ninkii inentam i'i minihk kaakii ahpiihtenimiwaatc.

¹⁴ Miitahsh kaakii poohkonamaan kotak nimihtikom “Wiiciintiwin” eshinihkaatek. Miihsh ekii aanawewank eshi wiiciintiwaahpan Coota ahkiink, kaye tahsh Isriyal ahkiink wenciiwaatc.

¹⁵ Miihsh kaaTipenciketc kaa'ishitc, “Miinawaa hsa ishihkehkaasoon taapishkoo tino okanawi maanahcaanihshiwe kaa⁠kakiipaatisitc.

¹⁶ Miitahsh ekii ahsak okanawi maanahcaanihshiwe ahkiink ke⁠kanawenimaatc nimaanahcaanihshima', kaawiin owiici'aahsii' maanahcaanihsha' kaawii nihsimintc. Kaawiin kaye onanaantone'waahsii' wenihshininitc, kaawiin ciwii antawi'aatc kaa⁠wiihsakentaminitc, kaawiin kaye otahshamaahsii' i'i kaa⁠shaapwiinitc. Tekwac itahsh mii 'imaa wentantank wenishihshininik wiiyaahs, e⁠manipitamawaatc owanasitini.

¹⁷ Aahpici ta⁠kihci maanshihse a'a okanawi maanahcaanihshiwe kekiipaatisitc, ekii wepinaatc maanahcaanihsha'. Miikaasowin ihsa oka tetako shaakooci'ikon ci⁠mashkawisiihsik. Onihk ta⁠paahteni, oshkiinshik eyaanik inahke okihcinihkiink kaawiin ta⁠waapiwaakehsii.”