ᐅᕒᐆᒪᓇᒃ 9 - Ojibwe Kihcimasina'ikan

Kishemanitoo i'i tahsh kaye kaatipenimaatc pemaatisinitc

¹ Nintepwe tahsh o'o kaaihkitoyaan, Christink aaniihsh nintooncitipentaakos, kaawiin tahsh ninkiiwanimohsii. Nintishikashkimikon kaye kaaoncinaanaakatawentamaan, Kishemanitoo otAhcaahkwan e'wiici'imitc ci‑inentamaan.

² Aahpici tahsh wiinke nintooncimaanentam, mooshak kaye wiihsakentamowin e'ayaak i'imaa ninte'ink.

³ Miitahsh wiinawaa onci keshimihsawentamaampaan nawac niin Kishemanitoo ci‑ishihpan cinihshiwanaatisiyaan, cikiihpahkehseyaampaan kaye kaashiwiiciiwintc Christ, onci iki niicihkiweyak kaainawemakwaa kaawiiciontahkaanesiimakwaa.

⁴ Aaniihsh Kishemanitoon okii'onenimikowaan Isriyalak (Israel), okii'inenimikowaan kaye ewii'okosihsimikowaatc, okii'ishi'ikowaan kaye ciwiitoohkaasowaatc eshikihci‑inentaakosinitc. Kaawiin wiin aapitink ehta okii'ashotamakohsiiwaan ewii'wiiciiwikowaatc. Kii'miinaawak kaye Moosihsoon (Moses) otOonahshowewinini, tepwe kaye keishianami'aawaatc Kihcianami'ewikamikonk. Kii'inentaakosiwak kaye citepinamowaatc Kishemanitoon kaakii'ishiahshotamaakenitc.

⁵ Miiwak itahsh iki Isriyalak kaatashimintwaa, mii 'imaa kaakiihpionciiwaatc kaakii'niikaanentaakosinitc kikehteya'aaminaani'. I'imaa tahsh wiin Christ kii'ontahkaanesi Isriyalihkaank, ininiink iko kii'inentaakositc. Taka tahsh Kishemanitoo kahkina kekoonini kaatipentank mooshak iko tamiikwehciwenimaa. Emen.

⁶ Kaawiin wiin nintihkitohsii Kishemanitoo ekiihpwaanawihcikemakaninik otahshotamaakewin. Aaniihsh iki pemaatisiwaatc Isriyalihkaank kaaontahkaanesiwaatc, kaawiin iitok aaninta tepwe Isriyaliwihsiiwak citinowiwaahpan kaakaakiikinikowaatc Kishemanitoon.

⁷ Kaawiin kaye kahkina Eparahaamink (Abraham) kaaontahkaanesiwaatc, otooniicaanihsimikohsiiwaan Kishemanitoon. Aaniihsh Kishemanitoo okii'inaan Eparahaaman: “I'imaa hsa Aaisikonk (Isaac) kenionciiwaatc, miiwak ihsa iki mayaa, kipiiwesiimak keinintwaa.”

⁸ Iki tahsh oniicaanihsimaak Eparahaamink kaanionci nihtaawikiwaatc kaawiin kahkina inakimaahsiiwak Kishemanitoon e'oniicaanihsimikowaatc. Iki tahsh wiin oniicaanihsimaak kaaonci nihtaawikiwaatc i'imaa Kishemanitoon kaakii'ishiahshotamawaanitc Eparahaaman, mii hsa iki mayaa oniicaanihsimaak.

⁹ Miitahsh o'o Kishemanitoo otahshotamaakewin kaaihkitoomakaninik: “O'o tahsh ahpii miinawaa ocihcihsek, ninkapikiiwe, Sera (Sarah) tahsh oka‑ayaawaan kwiiwisenhsan.”

¹⁰ Inashke tahsh wiin Oripehka (Rebekah) kaakii'niishinitc (2) okosihsa', okiihpeshiko'aani oteteni, miihsa ini Aaisikoon, niinawint tahsh wiin kaaCoowiwiyaank kaaokehteya'aamiyaank.

^11-12 Kishemanitoo tahsh mayaa piko cianohkiimakaninik i'i otinentamowin i'imaa peshik okosihsimaank, miitahsh o'o Kishemanitoo kaakii'onci‑inaatc ini ihkwewan: “A'a hsa kesasiihkisitc kikosihs, okapamiihtawaan ini keohshiimenshimaawinitc.” Miitahsh o'o kaakii'ihkitotc cipwaa nihtaawikinitc i'i kwiiwisenhsa', cipwaa kaye noociko ishihcikenitc, cipwaa kaye kwayahk ishihcikenitc. Miitahsh o'omaa eshinaakwaninik Kishemanitoo ekii'ishihciketc aaniin niiyaak kaakii'inentamokopanen ewiihkanoonaatc peshik okosihsimaan, kaawiin wiin kii'onci‑inentansii otishihcikewininiink i'i kwiiwisenhsa'.

¹³ Miitahsh o'o Kihcimasina'ikan eshipii'ikaatek, Cekap (Jacob) hsa ninkii'onenimaa, Iihswaa (Esau) tahsh wiin ninkii'aanawenimaa.

¹⁴ Mii na tahsh keihkitoyank Kishemanitoo kwayahk e'ishihcikehsik? Keko inahke inenimaahkek Kishemanitoo.

¹⁵ Miitahsh o'o Kishemanitoo kaainaatc Moosihsoon: “Ninkashawenimaa hsa awenen iko kaamihsawenimak ewiihshawenimak, ninkakoohpaatenimaa kaye awenen iko kemihsawenimak.”

¹⁶ Miitahsh i'imaa eshiwaapantamank, Kishemanitoo otoonencikewin e'ishianohkiimakaninik i'imaa oshawencikewinink, kaawiin wiin ininiwan eshimihsawencikenitc, kaawiin kaye ininiwan otishihcikewininiink ishianohkiimakahsinini.

¹⁷ Aaniihsh Kihcimasina'ikan ihkitoomakan Kishemanitoo ekii'inaatc ini kaakiih⁠kihciokimaawinitc Iicipahkiink (Egypt): “Niin iitok kikiih⁠kihciokimaawi'in ewii'onci waapanta'iweyan i'i nimashkawisiiwin, misiwe kaye cikihkencikaatek nintishinihkaasowin o'o kaainikohkwaak ahki.”

¹⁸ Miitahsh o'omaa eshiwaapantamowank Kishemanitoo ehshawenimaatc awenenan iko kaawiihshawenimaatc, otishi'aan kaye awenenan iko cishashiipihtaminitc.

Kishemanitoo onishkaatisiwin, okoohpaatenimiwewin kaye

¹⁹ Kiinawaa tahsh oncita piko awiya peshik ninkakakwecimik o'o ci‑ihkitotc: “Kiishpin tahsh i'i ishihsek kaaihkitoyan, wekonenini tahsh Kishemanitoo keyaapi wenciaanwaapamaatc awiyan aaniin awiyan eshihcikenitc? Awenen tahsh kaye kekashkihtoohpan cinakaanankipan Kishemanitoon otinentamowinini?”

²⁰ Niicii, awenen tahsh kiin entinowiyan cinanaahkwehtawatipan Kishemanitoo? Inashke a'a ahkihk waapikanink kaakii'oncioshihcikaniwitc kaawiin otinaahsiin ini kaakii'oshi'ikotc: “Wekonen o'o kaa'onci ishi'iyan kaaishinaakosiyaan?”

²¹ Aaniihsh a'a inini kaaoshi'aatc ahkihkwa' eshimihsawentank iko otinaapaci'aan ini waapikanan. Wiin iko kaye otoonentaan kiishpin niishin (2) ahkihkwa' wii'oncioshi'aatc i'imaa peshikwan waapikanink, komaa kaye peshik wii'oshi'aatc cikihci‑inentaakosinitc, kotak tahsh cimihciayaapatisinitc.

²² Miitahsh peshikwan eshinaakwaninik kewiin Kishemanitoo kaakii'ishihciketc. Okii'antawentaan onishkaatisiwin cinaakwaninik, omashkawisiiwin kaye, aahpici tahsh okiihshashiipenimaa' i'i kaakii'nishki'ikotc kaawiihtipaahkonaatc.

²³ Okii'antawentaan tahsh kaye cinaakwaninik kaawenootaninik okihci‑inentaakosiwin, i'i kaakii'miininank. Aaniihsh kishawenimikonaan, kikiihkwayaanci'ikonaan kaye citepinamowank i'i okihci‑inentaakosiwin.

²⁴ Kiinawint aaniihsh kaapimaatisiyank kikiihkanoonikonaan. Kaawiin ehta Coowa' okiihkanoonaahsii', i'i hsa kaye kaatinowihsinik okiihkanoonaa'.

²⁵ Miitahsh o'oweni Kishemanitoo kaakii'ihkitotc i'imaa masina'ikanink Hooseyawan (Hosea) kaakii'oshipii'aminitc: “Iki hsa pemaatisiwaatc kaakiihtipenimaahsiwakwaa miiwak iki keishinihkaanakwaa, ‘nimpimaatisiimak.’ Iki kaye kotak pemaatisiwaatc kaakiihshawenimaahsiwakwaa, ninkaishinihkaanaak, ‘Wiinke kaashawenimakwaa.’

²⁶ I'imaa tahsh mayaa kaashiayaawaatc iki kaa'inakwaa, ‘Kaawiin kiinawaa kitipenimihsinooninim,’ miihsa i'imaa keshi‑ishinihkaacikaniwiwaatc ‘Kishemanitoo kaapimaatisitc hsa i'i okosihsa'.’ ”

²⁷ O'o tahsh Aaiseya (Isaiah) kii'ihkito ekiihtashimaatc Isriyala' (Israel): “Aanawiin pemaatisiwaatc Isriyal e'ahpiihcipaahtiinowaatc taapishkoo kaa‑ahpiihcipaahtiinatink newank kaashinaanaanewaamok kihcikamiink, aahpici tahsh ta‑akaahsiinowak keishkohsewaatc kepimaaci'intwaa.

²⁸ KaaTipenciketc kaawiin tapwaahtawiihsii cipinana'ahsaatc aaniin eshihcikenitc pemaatisinitc o'omaa ahkiink.”

²⁹ Miitahsh o'owe aasha Aaiseya kaakii'ishiniikaanaacimokopanen: “Kiishpin tahsh kaaTipenciketc kaaKihciMashkawentaakositc ishkonaahsikipan awiya' kaawiiciontahkaanesiimimank, aasha kaakii'ishihsekin ini ootenawan Swaatam (Sodom) Komwaara (Gomorrah) kaye, kekiinawint iitok aasha i'i'we kitaakii'ishi⁠nihshiwanaaci'ikoomin.”

Isriyalak opisokehshinowiniwaa

³⁰ Miitahsh o'o keihkitoyank, iki hsa kaaCoowiwihsikwaa kaawiin okiihkakwecihtoohsiinaawaa ciminowiiciiwikowaatc Kishemanitoon, Kishemanitoo tahsh wiin okii'inahsaa' kwayahk ciminowiiciiwikotc aaniihsh okiihtepweyenimikoo'.

³¹ Iki tahsh wiin Kishemanitoon kaakiihtipenimikowaatc pemaatisiwaatc Isriyalak (Israel) okiihkakwemihkaanaawaan onahshowewinan aaniin kekii'ishiminowiiciiwikowaahpan Kishemanitoon, kaawiin tahsh okii'mihkansiinaawaa.

³² Wekonenini tahsh kaa'oncimihkansikwaa? Aaniihsh otanohkiiwiniwaan awahshime okii'ahpenimonotaanaawaan, kaawiin wiin otepwehtamowiniwaan. Miitahsh i'i kaakii'oncipisokeshkaakowaatc ini ahsiniin kaapisokehshimiwenitc.

³³ Aaniihsh Kihcimasina'ikan ishipii'ikaate: “Inashke nintahsimaan ini ahsiniin i'imaa Saayanink (Zion) kepisokeshkaakowaatc pemaatisiwaatc, ahsiniin kekawiwepishkaakowaatc. A'a tahsh wiin ketepwehtawaatc kaawiin tamincinawesihsii.”