ᐅᕒᐆᒪᓇᒃ 7 - Ojibwe Kihcimasina'ikan

Wiitikentiwinink e'inakintek kaaishiwiiciiwintc Christ

¹ Niiciotepwehtamook! Kehcinaac kikanihsitohtaam i'iwe waa'ihkitoyaan aaniihsh kahkina kikihkentaanaawaa inaahkonikewin enentaakwahk, mekwaa ehpimaatisitc ehta a'awe inini, owiintamaakon keishihciketc.

² Mii 'owe enentaakwahk, a'a ihkwe kaaonaapemitc, inaahkonikaaniwan taapishkoo e'mincimahpisotc a'a ihkwe ekaa wiihkaa cinakanaahsik ini onaapeman mekwaa ehpimaatisinitc. Kiishpin tahsh noonteishkwaapimaatisinitc, miitahsh i'i enaahkonikaniwitc a'a ihkwe cipapiniskweayaatc i'imaa kaakii'ishitipenimikohpan onaapeman.

³ Kiishpin itahsh keyaapi ehpimaatisinitc onaapeman, anikaanciwiiciiwaatc pahkaan ininiwan, anoociko inaatisi tainaa 'a ihkwe. Kiishpin itahsh wiin niponitc onaapeman, miitahsh i'i ci‑inaahkonikaniwitc tepwe ehpiniskweayaatc a'a ihkwe. Miitahsh aniwiitikemaatc pahkaan ininiwan, kaawiin ekwa' kekoon tainenimaahsii.

⁴ Niiciotepwehtamook, kekiinawaa peshikwan kitinentaakosim taapishkoo ekii'nipoyek, cioncitipenimikohsiwek Inaahkonikewin, aaniihsh kitooncisakentaakosim i'imaa owiiyawink Christ. Miihsh i'imaa ahkonaak wencitipeniminek a'awe kaakiihkiiwepimaatisi'intc nipowinink onci. Mii hsa 'owe kaa'oncikiiwepimaatisi'intc, cioncikihtaapaci'inank Kishemanitoo.

⁵ Weti otaanaank kaapi‑ishipimaatisiyank, aaniin iko waa'ayintiyank kikii'ayintimin. Mii 'iwe ahpii macimihsawentamowinan kii'moohkiimakanoon, miitahsh i'iwe Inaahkonikewin kaahtootaakoyank. Kiwiiyawinaanink kaye kii'ishianohkiimakanoon, piinihsh nipowin ekii'anionciimakahk i'imaa kitishihcikewininaanink.

⁶ Aasha tahsh kikii'aapa'okonaan Kishemanitoo, ekaa miinawaa cimincimahpinikohsiwank Inaahkonikewin. Kikii'nipomin inentaakwan, ekaa keyaapi citipenimikohsiwank i'iwe kaakii'mincimahpinikoyank. Kaawiin keyaapi kitishianohkawaahsiwaanaan Kishemanitoo kehteaya'iink inahke Inaahkonikewin kaaishipii'ikaatek. Oshkaya'iink inahke kitishianohkawaanaan, oshkaya'iink e'ishi'iminank Kishemanitoo otAhcaahkwan.

Inaahkonikewin otishi'ikonaawaa pemaatisiwaatc cimacitootamowaatc

⁷ Aaniin itahsh keitamank Inaahkonikewin? Mii nahsh i'iwe tipinawe e'maciaya'iiwank Inaahkonikewin? Kaawiin taainentaakwahsinoon. Mii iitok i'imaa Inaahkonikewinink wencikihkentamaan wekonen i'i macitootamowin. Inashke kaawiin nintaakiihkihkentansiin wekonen i'i mihsawinamaakewin, mii ehta Inaahkonikewin ekii'ihkitoomakahk: “Kaawiin kikamihsawinaakehsii,” ekii'ikoyaan.

⁸ I'iwe macitootamowin kii'ishihsemakan cioncikaahcici'ikoyaan, ekii'ishimihkawaa'ikoyaan i'imaa Inaahkonikewinink kaaihkitoomakahk: “Kaawiin kikamihsawinamaakehsii,” ekii'ihkitoomakahk. Mii 'imaa kaa'ishikashki'ikoyaan kahkina kekoon cimihsawinamaan ekaa keishimihsawentansiwaampaan. I'imaa tahsh inaahkonikewin ayaahsinok, mii 'imaa eshipwaawaatahk i'i macitootamowin.

⁹ Niin aaniihsh ninkiihpimaatis cipwaa maaciikihkentamaan inaahkonikewin: “Keko maashihcikehken,” e'ikoyaan. Paanimaahsh ekiihkihkentamaan i'i Inaahkonikewin: “Keko wiin ishihcikehken,” e'ikoyaan, mii payesh ekii'maaciimihsawentamaan i'iwe citootamaan kaakii'onci'ikoyaan.

¹⁰ Amii 'i ninkii'nip e'inentaakwahk. I'iwe tahsh Inaahkonikewin pimaatisiwin kekii'miinikoyaampaan, niin itahsh ninkii'inahsikon cinipoyaan.

¹¹ I'iwe macitootamowin kii'ishihsemakan Inaahkonikewinink aaniin keshikashki'ikoyaan ekii'ishiwayeshimikoyaan. Miitahsh i'imaa ekii'ishianohkiimakahk Inaahkonikewinink ninkii'nihsikon.

¹² Mii 'owe ehkitoyaan: ini Inaahkonikewinan mii 'imaa maamaw onciimakanoon Kishemanitoonk. Entahsopeshikwahkin tahsh Inaahkonikewinan e'maamawahtekin kaye onciimakanoon Kishemanitoonk ehkwayahkwahkin kaye tahsh e'onishihshinkin.

¹³ Mii na tahsh ci‑ihkitoyaan, i'iwe kaaonishihshink Inaahkonikewin ekii'inanohkiimakahk cinipoyaan? Kaawiin wiin taainentaakwahsinoon. Macitootamowin kaakikishkaakoyaan ohsha kii'ishihcikemakan. I'imaa kii'ishianohkiimakan kaaonishihshininik Inaahkonikewinink ekii'ishikashki'ikoyaan cinipoyaan. Mii 'owe kii'ishihcikaate, i'i macitootamowin cikihkencikaatek aaniin mayaa entinowank. Amiitahsh i'i Inaahkonikewin kii'ishiaapatan nawac cikiihkaayencikaatek aaniin ehpiihci⁠maciaya'iiwank i'i macitootamowin.

E'nihtaaishihcikeyank kaaishiantawentansiwank ci‑ishihcikeyank

¹⁴ Kikihkentaamin i'i Inaahkonikewin ekii'onciimakahk Kishemanitoonk. Niin itahsh wiin peshik kenipotc nintinow. Ninkiihpi‑ishinaakos macitootamowin ekii'otawahkaanimikoyaan ekii'na'ihtamaan.

¹⁵ Kaawiin ninkihkentansiin o'o wencitootamaan. I'i aaniihsh kaaminwaapantamaan kaawiin nintootansiin. I'i tahsh wiin kaashiinkinamaan, mii 'iwe entootamaan.

¹⁶ Ahpiihsh ehtootamaan i'i kaaminwaapantansiwaan, mii peshikwan eshinaakwahk e'ihkitoyaan: “Haw, kwayahkwan i'i Inaahkonikewin.”

¹⁷ Miitahsh kaawiin niin tepwe kaatootamaan i'iwe ekaa kaaminonansiwaan. I'iwe tahsh macitootamowin kekishkaakoyaan, mii ohsha 'iwe kaatootamoomakahk.

¹⁸ Ninkihkenintis ekaa niin kanake ehkikishkaakohsiwaan keonci⁠kashkihtooyaampaan minohcikewin, niin kaakii'ishi⁠nihtaawiki'ikooyaampaan kaaitamaan. Aanawiin niin e'mihsawentamaan minohcikewin citootamaan, kaawiin i'i nintishikashkihtoohsiin.

¹⁹ I'iwe wenishihshink aanawiihtootamaan, kaawiin tahsh nintootansiin. Meshkwac itahsh i'iwe ekaa wenishihshinsinok waahtootansiwaan, mii 'iwe mayaa enitootamaan.

²⁰ Kiishpin ehtootamaan i'iwe entawentansiwaan, kaawiin iitok niin kaatootamaan, i'iwe ohsha macitootamowin kaatoocikemakahk kaakikishkaakoyaan.

²¹ Niwaapantaan itahsh mooshak o'o e'nihtaa ishiayaayaan, ahpii hsa ko e'antawentamaan i'iwe wenishihshink ci‑ishihcikeyaan, mii ehta eshikashkihtooyaan citootamaan ekaa kaaonishihshinsinok.

²² Piincaya'ii eshitinowiyaan, ninciihkentamoshkaakon Kishemanitoo otInaahkonikewin.

²³ Shaakooc itahsh miinawaa kekoon niwaapantaan e'nihtaa⁠ishiayaayaan. Mii 'iwe eshianohkiimakahk niwiiyawink, e'miikaatamoomakahk i'iwe inaahkonikewin kaaminwaapantamaan nintinentamowinink. Miitahsh eshimincimahpinikoyaan i'i ishiayaawin kaaishianohkiimakahk i'imaa niwiiyawink. Amii 'owe ishiayaawin wencinihtaa⁠macitootamaan.

²⁴ Iyoohoo ninkitimaakinaakos! Nipowinink nintishiwinikon o'o niwiiyaw! Awenehsh kekashki'itc?

²⁵ Oo miikwehc nintinentam, Kishemanitoo ninkakashki'ik. KaaTipeniminank Ciisahs Christ taishihcike. Miitahsh o'owe ehkitoyaan: o'owe nintishiayaa, niin iko ninkainaapatis Kishemanitoo otInaahkonikewin citootamaan. Nintinentamowinink ehta nintooncikashkihtoon. I'imaa tahsh eshiwiiciiwikoyaan nintishi'ikoowin kaakii'ishi⁠nihtaawiki'ikoowaampaanen nintootaan i'iwe kaaikoyaan nintishiayaawin i'imaa wenciik macitootamowin.