ᐅᕒᐆᒪᓇᒃ 5 - Ojibwe Kihcimasina'ikan

Ehtepwehtawank Kishemanitoo kitoonci inahsikonaan kwayahk ciminowiiciiwank

¹ O'owe tahsh aasha kaa'ishihcike'inank Kishemanitoo ekiihtepwehtawank ekii'ishi'inank kwayahk ciminowiiciiwank, noonkom pisaanentamowinink kitishiwiiciiwaanaan Kishemanitoo, a'awe tahsh kaaTipeniminank Ciisahs Christ kaakii'ishihcike'inank.

² Miitahsh a'awe ekiihtepwehtawank Christ, kikii'ishipiintikanikonaan i'imaa eshiwaapantamowank okishewaatisiwin a'a Kishemanitoo, miitahsh i'imaa noonkom eshipimaatisiwank. Kaye kimoocikentaamin e'ahshawaapantamank ewii'wiici'iweyank Kishemanitoo okihci‑inentaakosiwinink.

³ Kayehsh kitooncimoocikentaamin ehkakwaatakentamank. Aaniihsh kikihkentaamin o'o, ahpii ehkakwaatakentamank kitooncikihkino'amaakoomin cishashiipentamank.

⁴ Shashiipentamowank itahsh, mii 'imaa cioncikwayahkonawinank Kishemanitoo. Ehkihkentamowank itahsh e'minonawinank, mii 'imaa wentinamank keoncikehcinaa'oyank.

⁵ O'owe tahsh e'ishikehcinaa'oyank, kaawiin wiihkaa kikaniihsentansiimin. Aaniihsh Kishemanitoo kikiihsiikinamaakonaan osaaki'iwewin i'imaa kite'inaanink, otAhcaahkwan ekii'aapaci'aatc. Miiwan itahsh ini kaakii'miininank.

⁶ Mekwaa tahsh keyaapi ekiihkashki'itisohsiwank ciwiici'itisoyankipan, a'awe Christ kikii'nipohtamaakonaan kaamaci‑ishiwepisiyank. Mayaa hsa i'i ahpii kiihtootam kaakii'onahtoonitc Kishemanitoon.

⁷ Inashke taasanakanini awiya cinipohtamawaatc awiyan aanawiin mayaa kaapiminisha'aminitc i'i Inaahkonikewin kaainahtenik. Inkotink itahsh wiin maawiin awiya taa‑ayinentam cinipoohtamawaahpan awiyan kaanihtaa⁠minotootaakenitc.

⁸ A'awe tahsh wiin Kishemanitoo kikii'waapanta'ikonaan aaniin ehpiihcisaaki'inank. Aaniihsh mekwaa keyaapi omaci‑ishiwepisiik ekiihtinowiwank, kikii'nipoohtamaakonaan a'a Christ.

⁹ Aasha wiin omiskwi ekii'ishi‑inahsikoowank kwayahk ciminowiiciiwimank Kishemanitoon, nawac hsa wiin iitok Christ e'wiiciiwank kikaoncipimaaci'ikoomin ekaa ciotihsaapantamowaahsiwank Kishemanitoon onishkaatisiwinini.

¹⁰ Mekwaa tahsh kiinawint Kishemanitoo kaashiinkenimikotc kiitinowiwank, wiin tahsh wiin onipowininiink ini oKosihsan aanciko kikii'ishikashki'ikonaan cisaakiwiiciiwank. Noonkom itahsh osaaki'aakana' ehtinowiyank, nawac hsa wiin opimaatisiwininiink Christan kikaoncipimaaci'ikoomin.

¹¹ Keyaapi tahsh kekoon awahshime anitakoayaamakan kaamiinikooyank. Kitoonci minwentami'ikonaan a'a Kishemanitoo i'i kaakii'ishihcike'iminank kaaTipenimiminank Ciisahs Christan. Miiwan ini Ciisahsoon aasha kaakii'oncitepinamowank Kishemanitoo osaakiwiiciwaakana' citinowiyank.

Eshipepahkaanentaakosiwaatc Christ, Aatam

¹² I'imaa peshik inini kaa'ayintikopanen, mii 'imaa kaaoncinaakwahk maci‑ishiwepisiwin ahkiink. Miihsh i'imaa kahkina awiyak kaakii'ani‑ishiotihsikowaatc nipowin, aaniihsh kahkina awiya kii'macitootam.

¹³ Tepwe cipwaa miikiwaaniwank i'i Inaahkonikewin Moosihs (Moses) kaakii'oshipii'ank, aasha tepwe kii'maci‑ishiwepisiwak kaakiihpimaatisiwaatc ahkiink. I'imaa tahsh mahshi e'ayaahsinok inaahkonikewin, kaawiin inakincikaatehsinoon i'i maci‑ishihcikewin awiya kaatootank.

¹⁴ I'imaa tahsh ahkonaak kaakiihpimaatisitc Aatam (Adam) kahkina awiyak kaapiahkopimaatisiwaatc piinihsh ekii'anipimaatisitc Moosihs, mincikahkina kiihtaapitawi⁠nipowak, ampooshke intawaa kewiinawaa kii'nipowak ikiweniwak peshikwan kaakii'ishimacitootansikwaa, Aatam kaakii'ishihciketc ekiihpisintansik i'i kaakii'ikotc Kishemanitoon. Mii 'awe Aatam kiihkihkinawaasinaakosi keinentaakosinitc ini peshik kepiayaanitc.

¹⁵ Kaawiin tahsh misiwe peshikwentaakosihsiiwak oko kaaniishiwaatc. Aaniihsh Kishemanitoo omiikiwewin kaawiin peshikwan inentaakwahsinoon Aatam omacitootamowin kaainentaakwaninik. Tepwe niipiwa' awiyak kii'oncinipowak i'iwe kaakii'ishimacitootank a'a peshik inini. I'i tahsh Kishemanitoo okishewaatisiihkantaakewin wawiinke awahshimewentaakwanini kaaishihcikemakaninik. Omiikiwewin kaye awahshimewentaakwanini, aahpici niipiwa' iki pemaatisiwaatc ekiihtepinamowaatc, e'oncimiinintwaa okishewaatisiwininiink ini peshik ininiwan Ciisahs Christan.

¹⁶ Miinawaa pepahkaanentaakwanoon Kishemanitoo omiikiwewin kaye omacitootamowin a'a peshik inini Aatam. Aaniihsh aapitink iko ekii'macitootank a'a peshik inini, “Kikikis macitootamowin,” kii'inaa a'a inini. Noonkom itahsh wiin i'i ekii'ahpiihci paahtiinatininikin ini omacitootamowiniwaan iki pemaatisiwaatc, aanawiin iko ehteinentaakosihsikwaa shaakooc itahsh iko okiihshawenimikowaan Kishemanitoon: “Kaawiin kekoon kitinakincikaasohsiim,” inaawak.

¹⁷ Tepwe hsa a'awe peshik inini kaakii'macitootank, mii 'imaa kaa'oncikashkihcikemakahk nipowin, kahkina pemaatisiwaatc e'oncinipowaatc a'a peshik kaakiihtootank. Nawac itahsh wiin takihcikashkihcikemakanini i'i kaahtootank a'a Peshik Inini Ciisahs Christ. Aaniihsh kahkina kaamiinintwaa Kishemanitoon oshawencikewinini eshiwenootaninik, kaye kaashimiinintwaa kwayahkwakimikoowin, pahkinaakewinink taishipimaatisiwak, aaniihsh okashkihtamaakowaan Christan kaaTipenimiminank.

¹⁸ Mii 'owe eshiwiintamaan: o'o peshik macitootamowin Aatam kaakiihtootank, kii'onci⁠nipowakimaawak kahkina pemaatisiwaatc. Peshikwan itahsh kaye i'i peshik kwayahkohcikewin kaakiihtootank a'a Peshik, kahkina “Kipakitinikoom” onci‑inaawak, miinaawak itahsh cipimaatisiwaatc.

¹⁹ Shikwa 'awe peshik inini ekii'na'ihtansik i'i kaakii'ikotc Kishemanitoon, niipiwa' awiyak okii'oncikashki'ikonaawaa cimaci‑ishiwepisiwaatc. A'awe tahsh miinawaa peshik inini Ciisahs Christ kii'na'ihtam, miitahsh peshikwan niipiwa' awiyak taonci‑inahsaawak ciminowiiciiwaawaatc Kishemanitoon.

²⁰ Kishemanitoo okiihpakitinaan i'i otInaahkonikewin cianiawahshimeshkaanik macitootamowin. Ahpiihsh kaa'ani‑ishinankishkaak i'i macitootamowin, awahshime kii'ani‑ishinaakwanini Kishemanitoo oshawencikewin.

²¹ Mii aaniihsh o'owe ishkwaac eshiwiintamaan: macitootamowin aahpici kiihkashkihcikemakan, aaniihsh kahkina piko awiyak kii'nipowak. Miitahsh kaye peshikwan niipiwa' kashkihcikemakanini Kishemanitoo oshawencikewin, aaniihsh otishi'aa' i'i pemaatisinitc kwayahk ciminowiiciiwikotc. Kitishi'ikonaan ahpane ko cipimaatisiwank, i'iwe Ciisahs Christan kaakiihtootawiminank.