ᐅᕒᐆᒪᓇᒃ 3 - Ojibwe Kihcimasina'ikan

¹ Kekoon ina tahsh ayaamakan ci‑ishiniikaanentaakosiwaatc iki Coowak, otaanaank itahsh wiin ci‑inentaakosiwaatc iki kaaCoowiwihsikwaa? Awaac ina kekoon ontisi awiya ehkihkinawaatashakeshontc?

² Tepwe misiwe ontisiwak ehCoowiwaatc. Mii aaniihsh o'owe nihtam, okiihkanawenta'ikowaan Kishemanitoon cipaminamowaatc otihkitowinini.

³ Aaniin itahsh keishihsewaatc aaninta ekii'noonte⁠aanawencikewaatc? Kaye wiin ina Kishemanitoo taishihcike'itiso citepweyentaakosihsik?

⁴ Kaawiin kanake! Mihsawaa hsa ko tatepwewiniwi Kishemanitoo, kahkina aana kiiwanimowaatc ininiwak. Amii 'owe kaaishihsink oshipii'ikewin: “Ahpii hko ehkakitoyan, kahkina kikaishinaakook ehkwayahkotepweyan. Ahpii anaamimikooyan kikapahkinaake.”

⁵ Aaniin itahsh keihkitoyank kiishpin kaashimacihcikeyank nawac i'imaa oncipayahtenaakwaninik Kishemanitoo okwayahkohcikewin? Kitaaihkitomin ina ehkwayahkohcikehsik ehtipa'amawinank? Mii 'iwe piko awenen keshikakwetwetc.

⁶ Kaawiin itahsh kanake taaishinaakwahsinoon! Kiishpin kwayahkohcikehsikipan Kishemanitoo, aaniin kekii'ishitipaahkonaahpan kahkina ahkiink kaa‑ayaanitc?

⁷ Komaa kaye kitaaihkitomin: “Inashke tepwehsiwak, mii 'imaa eshipayahtenaakohtaawak Kishemanitoo ehtepwetc, miihsh i'imaa cioncikihtenimintc. Kiishpin o'oweni ishihsenik, wekonen tahsh niin wenci‑inakimikooyaan omacaatis?”

⁸ O'owe ishihsek, kaawiin ina kitaaihkitohsiimin: “Haw, macihciketaa, kaaonishihshik i'imaa taonciimakan.” Aaniihsh awiyak ninkii'ishimaci‑ikook i'iwe nahke ekii'ihkitowaanen. Mii 'iwe keishitipaahkonintwaa eshikashkihtamaasowaatc.

Kaawiin awiya misiwe kwayahkohcikehsii

⁹ Naahsaap itahsh miinawaa kaatashintamaan: kiinawint kaaCoowiwiyank, awahshime na kiminwakinsomin ahpiihc wiinawaa kaaCoowiwihsikwaa? Kaawiin kanake. Aasha ninkii'wiintaan i'i kaaishiwepisiwaatc Coowak kaye kaaCoowiwihsikwaa, kahkina peshikwan iko e'ishitipenimikowaac macitootamowin.

¹⁰ Mii 'owe kaaishihsinkin kihcioshipii'ikewinan: “Kaawiin awiya okwayahkonaakohsiin Kishemanitoon, kaawiin awaac peshik.

¹¹ Kaawiin awiya onihsitawinansiin kaakwayahkonaakwaninik, kaawiin awiya onantone'waahsiin Kishemanitoon.

¹² Kahkina kaawiin owii'naanaakatawenimaahsiwaawaan Kishemanitoon. Kiini‑ishihsewak piinihsh kekoonini e'inaapatisihsikwaa. Kaawiin kwayahkohcikehsiiwak, kaawiin awaac peshik.

¹³ Otooniwaank oncinoontaakwanini i'i kaanihshiwanaaci'iwemakaninik, otenaniwaank oncimaaciihseni wayeshimiwewin. Taapishkoo kinepik kaaciihsowetc mii 'iwe eshipihcipooshiwemakaninikin otihkitowiniwaan, e'nihshiwemakaninikin.

¹⁴ Mooshak iko maashikanooshiwewak, e'wiihsakaninikin otihkitowiniwaan.

¹⁵ Papaashiko wiihkakwe⁠wiihsakentamo'iwewak, nihtaanihshiwewak.

¹⁶ Nihshiwanaaci'iwewin, kakwaataki'iwewin opimihkawaataanaawaa aanti piko kaashipimiayaawaatc.

¹⁷ Kaawiin minowiiciintiwin otakopimiwitoohsiinaawaa.

¹⁸ Kaawiin okiihpikihkentansiinaawaa cikohtaanenimaawaatc Kishemanitoon,” e'ayishipii'ikaatek.

¹⁹ Kikihkentaamin kahkina ono kekoonan Inaahkonikewinan kaaishipii'ikaatekin, mii ekowaatc iki kaainentaakosiwaatc Inaahkonikewin cikanawentamowaatc. Miitahsh i'i enwaatek Inaahkonikewin, ekaa awiya cimihkansik keoncikanoocikehtamaasohpan. Miihsh i'i kahkina pemaatisiwaatc ci‑ishinaakosiwaatc citipaahkonikowaatc Kishemanitoon.

²⁰ Aaniihsh aanakashkihtootc awiya citootank i'i Inaahkonikewin kaainahtenik, kaawiin i'imaa okaonci‑inakimikohsiin ciminowiiciiwaatc Kishemanitoon. Aaniihsh mii i'i enaapatahk Inaahkonikewin awiya cioncikihkenintisotc e'macitootank.

Aaniin Kishemanitoo entootawaatc awiya' kwayahk ciminowiiciiwikotc

²¹ Aasha tahsh noonkom okii'naakohtoon Kishemanitoo aaniin entootawaatc awiyan kwayahk ciminowiiciiwikotc. Kaawiin ahkawe 'iwe otaapacihtoohsiin Inaahkonikewin cionci‑inahsaatc awiyan ciminowiiciiwikotc. Mii aaniihsh i'iwe eshihsininik Inaahkonikewin kaye kaa'ishipii'ikenitc Kishemanitoo otipaacimowininiima'.

²² Aaniihsh mii i'imaa ehtepwehtawimintc Ciisahs Christan wencikwayahkwaatisiiwenimaatc i'i pemaatisinitc. Kahkina awiyan otishihcike'aan kaatepwehtaminitc. Kaawiin pepahkaanentaakosihsiiwa'.

²³ Kahkina awiya kii'macitootam. Kaawiin awiya okiihtepishkansiin Kishemanitoon okihci‑inentaakosiwininiink ci‑ishinaakositc.

²⁴ Wiin itahsh iko okishewaatisiwinink Kishemanitoo omihcishawenimaa' kahkina kwayahk e'inahsaatc ciminowiiciiwikotc. Wiin Christ Ciisahs otishihcike'aa' cimihcipakitinikaniwinitc ekaa cionahshowaanimaahsiwintc.

²⁵ Wiin iko Kishemanitoo kii'ontinamaake Ciisahsoon cinihsimintc pakitinaahsowinink citinowinitc, i'imaa tahsh omiskwiiminiink cioncipoonencikaatenikin omacitootamowiniwaan iki pemaatisiwaatc ehtepwehtawaawaatc. Mii 'owe kaahtootank Kishemanitoo ciwaapancikaatenik eshikwayahkohciketc. Otaanaank itahsh cipwaa nihsimintc Christan oncita okii'aansweyaapantamawaa' kaakii'ishimacitootaminitc, aaniihsh okiihshashiipenimaa'.

²⁶ Noonkom itahsh pahkaan ishihcike ehkihkentaakohtootc okwayahkohcikewin. Mii 'owe eshiwaapanta'iwetc wiin iko ehkwayahkwaatisitc, kwayahk kaye e'inahsaatc kahkina awiyan ciminowiiciiwikotc kaatepwehtawaanitc Ciisahsoon.

²⁷ Wekonen tahsh awiya keoncimamiihkwaanitisotc? Kaawiin kekoon. Aaniihshwiin i'i? Kaawiin ina kitaaihkitohsiimin cioncikwayahkwakimikooyank ehkanawentamank Inaahkonikewin? Kaawiin kanake. Kaawiin aaniihsh oncikwayahkwakimaahsii awiya ehkanawentank Inaahkonikewin. Otepwehtamowinink hsa wiin okaonci‑inahsikoon Kishemanitoon kwayahk ciminowiiciiwaatc.

²⁸ Mii aaniihsh o'owe kaaoncinihtaa⁠ihkitoyaank, piko hsa ko e'otepwehtamowinitc awiya kwayahk okaonci‑inahsikoon Kishemanitoon ciminowiiciiwaatc. Kaawiin wiin ekiihkanawentank Inaahkonikewin taonci‑ishihcikaniwihsii awiya.

²⁹ A'a tahsh Kishemanitoo, inenimaa na ehta ini Coowa' cioKishemanitoomikotc? Kaawiin ina kaye iniweniwa' kaaCoowiwihsinik? Tepwe hsa kaye kaaCoowiwihsinik okaoKishemanitoomikoo'.

³⁰ Ayaa hsa peshik cioKishemanitoomikotc kahkina pemaatisinitc, shikwa wiin Coowa' otepwehtamowininiink okaonci‑inahsaa' ciminowiiciiwikotc, ini tahsh kaye kaaCoowiwihsinik mii peshikwan ketootawaatc tepwehtaminitc.

³¹ Kaawiin tahsh i'imaa tepwehtamowinink kitoonci⁠aanihsentaakohtoohsiimin Inaahkonikewin. Nawac iitok kitaayiicihtoomin Inaahkonikewin.