ᐅᕒᐆᒪᓇᒃ 16 - Ojibwe Kihcimasina'ikan

Pwaal ekiihpooshoo'aatc kaakiihkihkenimaatc otepwehtamoo'

¹ Kinantawenimininim itahsh cikihkenimek a'a ihkwe kaaotawemaayank Piipi (Phoebe) kaaishinihkaasotc. I'iweti hsa Senkoriiyaahkaank (Cenchreae) ishipamiihtaake otanami'aa' kaaishinihtaa maawaci'itinitc.

² Weweni piintikanihk, kaaTipencikenitc iitok kewiin otipenimikoon. Aaniihsh mii 'i keishihcikewaahpan pemaatisiwaatc kaatipenimikowaatc Kishemanitoon. Wiici'ihk kaye aaniin iko eshinoontehsetc, aahpici ohsha niipiwa' okii'wiici'aa' pemaatisinitc, keniin hsa piko ninkii'wiici'ik.

³ Nimpooshoo'aa hsa Parihsila (Priscilla), Ahkwila (Aquila) kaye, amiiwak ihsa iki kaawiitanohkiimakwaa e'anohkiihtawankitc Christ Ciisahs.

⁴ Okiinaniisaanihtoonaawaan ihsa opimaatisiwiniwaan mekwaa ekii'wiici'iwaatc. Kaawiin niin ehta miikwehc nintinaahsiik, ekaa kaaCoowiwihsikwaa otepwehtamook pepahkaan kaaishimaamaawaci'itiwaatc kewiinawaa omiikwehciwenimaawaa'.

⁵ Nimpooshoo'aak itahsh kaye otanami'aak owaahkaa'ikaniniink kaaishipiintikewaatc. Impooshoo'aa kaye a'a inini kaasaakiwiiciiwak Ehpiinatahs (Epaenetus) kaaishinihkaasotc. Wiin aaniihsh nihtam okiihtepwehtawaan Christan weti ahkiink Esha (Asia) kaaicikaatek.

⁶ Nimpooshoo'aa kaye Meri (Mary) kaakihcianohkiitc mooshak kiinawaa onci.

⁷ Nimpooshoo'aa tahsh Entaronaaihkahs (Andronicus), Cooniyahs (Junias) kaye. Miiwak hsa iki kaawiicitinowiimakwaa ehCoowiwiyaank, ninkii'wiicitahkonikoomikook itahsh kaye. Okoweniwak itahsh wawiinke kihkencikaniwiwak, ishinisha'waakanink e'ishitakwakimintwaa. Wiinawaa tahsh kaye nihtam okiihtepweyenimaawaan Christan cipwaa tepweyenimimak.

⁸ Nimpooshoo'aa kaye Empaliyetahs (Ampliatus), aaniihsh ninsaakiwiiciiwaa, owiiciiwaan kaye kaaTipencikenitc.

⁹ Nimpooshoo'aa kaye Orpenahs (Urbanus) niwiitanohkiimaakaninaan e'anohkiihtawankitc Christ. A'a kaye Istehkihs (Stachys) kaasaaki'ak.

¹⁰ Nimpooshoo'aa kaye Ahpeliis (Apelles), kaaonciminwaapancikaniwitc ehpiminisha'waatc Christan. Nimpooshoo'aak kaye kahkina Eristaapiyalahs (Aristobulus) otaawinink kaa‑ayaanitc.

¹¹ Nimpooshoo'aa kaye Hirootiyan (Herodion), kaawiiciCoowimak. Nimpooshoo'aak kaye iki otanami'aak kaawiiciiwaawaatc kaaTipencikenitc, Naarhsihsahs (Narcissus) otaawinink kaaonciinitc.

¹² Nimpooshoo'aa kaye Caraaihpiina (Tryphena), Caraaihpoohsa (Tryphosa) kaye, kaakiihkihcianohkiihtawaawaatc kaaTipencikenitc. Nimpooshoo'aa kaye a'a ihkwe Parhsihs (Persis) kaaishinihkaasotc, kaasaaki'ak, kaakiihkihcianohkiihtawaatc kaaTipencikenitc.

¹³ Nimpooshoo'aa kaye Oroohpahs (Rufus), mii 'awe iitok kaakihci‑inakimintc ehpiminisha'waatc kaaTipencikenitc. Omaamaan tahsh kaye nimpooshoo'imaan, aaniihsh taapishkoo e'okosihsimimitc ninkiihpitootawimik.

¹⁴ Nimpooshoo'aak kaye Ahsinkaritahs (Asyncritus), Palekan (Phlegon) kaye, Harmiis (Hermes) kaye, Paacaropahs (Patrobas) kaye, Harmahs (Hermas) kaye, ini kaye kahkina otepwehtamook kaawiiciiwaawaatc.

¹⁵ Nimpooshoo'aa kaye Pilaalakahs (Philologus), a'a kaye ihkwe Cooliya (Julia), Niiriyahs (Nereus) kaye, otawemaan kaye nimpooshoo'imaan. Nimpooshoo'aa kaye Oliimpahs (Olympas), ini kaye kahkina weti kaawiiciiwaawaatc pemaatisinitc Kishemanitoon kaatipenimikonitc.

¹⁶ Otepwehtamook anami'eociimihkwak kiipooshoo'ekwaa, mii'i nahke ishipooshoo'itik. Kahkina tahsh Christ kaatipenimaatc pepahkaan kaaishimaamaawaci'itinitc otepwehtamoo' kipooshoo'ikowaak kahkina kaatahshiyek.

Pwaal ishkwaac ekiihkihkino'amaaketc

¹⁷ Kikakaansomininim itahsh, niitanami'aak, ahshowinotawihkwak iki awiyak kaakashki'aawaatc awiya' cipahkewinitinitc, kaawanishkweminekwaa kaye, e'ishikihkino'ikewaatc kihcipahkaan i'i kaakii'ishinoontamek. Keko naasihkawaahkekwaanik iki tino awiyak.

¹⁸ Iki tahsh o'o kaaishihcikewaatc kaawiin otanohkiihtawaahsiwaawaan Christan kaaTipenimiminank, mii hsa ehta owiiyawiwaan eshimihsawentamoomakaninikin eshihcikewaatc. Aahpici tahsh maminokiishwewak, e'minoinaawaatc kaye awiya', anihshaa tahsh e'inaawaatc ewii'onciwayeshimaawaatc, miitahsh kaaonciwaniwinaawaatc pemaatisinitc kaakihkentansinik aaniin keishihcikenitc.

¹⁹ Kahkina hsa awiyak aasha noontamook aaniin ehpiihci⁠na'ihtamowek i'i minwaacimowin. Wiinke tahsh nintooncikihci ciihkentam i'i e'ishihcikeyek. Kinantawenimininim itahsh kaye cikakiihtaawikihkentamek i'i kaaonishihshink, cisaapikihkentansiwek itahsh i'i kaamaanaatahk.

²⁰ Kishemanitoo hsa kaamiininek pisaanisiwin kikashikoshkamaakowaa Setanan kiinawaa citahkohkaanimek. Taka tahsh okishewaatisiwin kaaTipenciketc Ciisahs Christ kikawiiciiwikowaam.

²¹ Timahti (Timothy) tahsh kaawiitanohkiimak, kaye wiin kipooshoo'ikowaa. Okoweniwak kaye kipooshoo'ikowaak Loohshiyahs (Lucius), Cehsan (Jason), Sohsiipatar (Sosipater). Miiwak ihsa oko niiciCoowak.

²² Keniin tahsh Tarhshiyahs (Tertius) kaaoshipii'ikehtamawak Pwaal (Paul) kitakopooshoo'ininim, keniin iitok kaawiiciotepwehtamoominakook.

²³ A'a tahsh kaye Keyahs (Gaius) kaapiintikashitc owaahkaa'ikanink, kipooshoo'ikowaa. Mii hsa wa'a owaahkaa'ikanink kaaishinihtaa⁠piintikenitc kahkina otepwehtamoo'. Iraastahs (Erastus) kaanaakaci'aatc shooniyaan i'imaa ootenaank, aya'aa kaye Kwaartahs (Quartus) kiitanami'aanaan, kewiinawaa hsa pooshoo kitikowaak.

Pwaal ekii'miikwehciwenimaatc Kishemanitoon

²⁵ Taka tahsh kihci‑inenimaataa Kishemanitoo. Wiin ohsha kaakashkihtootc cimashkawitepwehtamo'inek, mii iitok i'iwe minwaacimowin kaapitashintamowak, mii hsa 'imaa kaashitashincikaniwitc Ciisahs Christ. Miitahsh kaye ehkitoomakahk i'i tepwewin kaakii'naakohcikaatek, kaakiihkihkencikaatehsinok mewisha otaanaank kaakiihpimiahkiiwank.

²⁶ Noonkom itahsh i'i tepwewin kii'oncinaakohcikaate kaakii'ishipii'ikenitc Kishemanitoo otipaacimowininiima'. Ekii'inaahkoniketc itahsh Kishemanitoo kaanehpiciayaatc, kahkina awiyak oncikihkentamo'aawak kaapepahkaanwewaanakisiwaatc pemaatisiwaatc, kahkina hsa ko cioncitepwehtamowaatc, cina'ihtamowaatc kaye.

²⁷ Wiin itahsh ehta ehKishemanitoowitc, wiin ehta kaye kaamaawaci⁠kakiihtaawentank, taka tainakimaa ehkihci‑inentaakositc onci Ciisahs Christan otishihcikewininiink, mooshak iko ahpane! Emen.