ᐅᕒᐆᒪᓇᒃ 15 - Ojibwe Kihcimasina'ikan

Keko wiin kiin ehta kakweminwentamo'itisohken

¹ Kiinawint itahsh kaamashkawitepwehtamank, mii hsa eshinaakwahk cikii'wiici'ankwaapan iki mahshi kaamashkawitepwehtansikwaa. Kaawiin wiin kiinawint ehta ci‑ishihcikeyankipan kekoon keminwentamo'ikoyank.

² Takwac itahsh ishihciketaa keminwaapantank kiicipimaatisiinaan keonciminohsetc, keoncimaaciikitc kaye otepwehtamowinink.

³ Wiin Christ aaniihsh kaawiin kii'minwentamo'itisohsii, o'o iitok kii'ishihcike kehteoshipii'ikan kaaishipii'ikaatenik: “I'i hsa kaakii'ishimaci‑ikooyan niin ninkiihpakamishkaakonan.”

⁴ Kahkina kekoon tahsh kaakii'oshipii'ikaatek i'imaa kehteoshipii'ikanink, ekii'oshipii'amaakooyank cioncikihkentamank cishashiipentamank, cimashkawentamank kaye. Miitahsh i'imaa keonciahpenimoyank.

⁵ Taka tahsh Kishemanitoo kaamiikiwetc shashiipentamowin, mashkawentamowin kaye, kikaishi'ikowaa peshikwan inahke ci‑ishinaanaakatawenintiyek, aaniihsh kipiminisha'amowaam Christ Ciisahsoon kaakii'ishipimaatisinitc.

⁶ Taka tahsh kaatahshiyek maamaw iko inentamok cipeshikohtaakosiyek e'miikwehciwenimek Kishemanitoo kaaTipenciketc Ciisahs Christ Kaaoyoohsitc.

Minwaacimowin kaakii'wiintamawintwaa kaaCoowiwihsikwaa

⁷ Otaahpinitik itahsh kaatahshiyek pisaan ciwaawiiciintiyek, taapishkoo Christ kaakii'ishiotaahpininek, Kishemanitoo cikihci‑inentaakositc.

⁸ Kiwiintamawininim Christ ekiihpitinowitc awiya kaaminotootawaatc Coowa', ewii'naakohtootc Kishemanitoon otepweyentaakosiwinini, cionci‑ishihsenik aaniin Kishemanitoo kaakii'ishiahshotamawaakopanen kikehteya'aaminaani'.

⁹ Christ tahsh kaye kii'ishihcike ekaa kaaCoowiwihsinik cimiikwehciwenimaanitc Kishemanitoon, aaniihsh okoohpaasinaakoni. Kihcimasina'ikan iitok ishipii'ikaate: “Niin hsa kikamiikwehciwenimin ekaa kaaCoowiwihsikwaa kaaishiayaawaatc, ninkaina'am kaye cimiikwehciwentamaan kiwiinsowin.”

¹⁰ Miinawaa tahsh pahkaan ishi‑ishipii'ikaate: “Kiinawaa ekaa kaaCoowiwihsiwek, wiiciminwentamoomihkwak Kishemanitoo kaakii'onenimaatc pemaatisinitc ewiihtipenimaatc.”

¹¹ Pahkan itahsh kaye miinawaa ishioshipii'ikaate: “Kiinawaa ekaa kaaCoowiwihsiwek, miikwehciwenimihk kaaTipenciketc, miikwehciwenimihk, kahkina kaapimaatisiyek!”

¹² O'o tahsh Aaiseya (Isaiah) kii'ishipii'ike: “Awiya hsa tapitakohshin Cehsiink (Jesse) keontahkaanesitc, mii hsa tahsh a'a kaawiihpitakohshink citipenimaatc ekaa kaaCoowiwihsinik, miitahsh a'awe keahpenimonotaakotc ini ekaa kaaCoowiwihsinik.”

¹³ Taka Kishemanitoo kaamiikiwetc ahpenimowin, kikamooshkinemiinikowaa ciihkentamowin, pisaanisiwin kaye kaashitepwehtawek. Kishemanitoo hsa otAhcaahkwan omashkawisiiwininiink kikaonciwiiciiwikowaa, kitahpenimowiniwaa mooshak ciniwenootahk.

Pwaal ekii'wiintank wekonenini kaakii'oncioshipii'iketc

¹⁴ Niitanami'aak, niin hsa wiinke ninkehcinaa' e'mooshkineshkaakoyek i'i kaaonishihshink i'i kaye kahkina kihkentamaawin, ehkashkihtooyek kaye cikakihkino'amaatiyek.

¹⁵ O'o oshipii'ikan kaaoshipii'amawinakook aahpici ninsoonkite'e e'wiintamawinakook kekoonan keoncimaamihkawiyek. Kishemanitoo iitok ninkii'ishishawenimik ekii'inanohkii'itc

¹⁶ cipamiihtawimak Christ Ciisahsoon ciwiici'imak i'i ekaa kaaCoowiwihsinik. Taapishkoo hsa anami'ewikimaa kaainanohkiitc mii hsa 'i enanohkiiyaan o'o kaatashintamowak Kishemanitoo ominwaacimowin, iki hsa kewiinawaa ekaa kaaCoowiwihsikwaa ci‑ishinaakosiwaatc pakitinaahsowinink, keminwaapantaminitc Kishemanitoon. Aaniihsh Kishemanitoon otAhcaahkoni opehki'ikowaan.

¹⁷ O'o tahsh kaashiwiiciiwak Christ Ciisahs, tepwe hsa ishinaakwan cikihci‑inentamaan o'o kaashianohkiihtawak Kishemanitoo.

¹⁸ Kaawiin tahsh nintaateinenintisohsii kekoon citashintamaampaan, mii ehta ko Christ kaapi‑ishianohkiitc nimpimaatisiwinink, ekii'aapacihtootc nintihkitowinan, nintishihcikewinan kaye, ciwiici'imak ekaa kaaCoowiwihsinik cina'ihtawaanitc Kishemanitoon.

¹⁹ Miiwan tahsh kaye ono kaayaapacihtootc kaamashkawinaakwaninikin kihkinawaacihcikanan, maamahkaacihcikewinan kaye, eshimashkawanohkiitc kaye Kishemanitoo otAhcaahkwan. I'imaa Ceroosalamink (Jerusalem) ekii'oncimaacaayaan, piinihsh misiwe weti Iliirihkam (Illyricum) ahki kaaishinihkaatek ekiihpapaawiintamaakeyaan i'i minwaacimowin kaashitashimintc Christ.

²⁰ Niin itahsh i'i mooshak peishimihsawentamaan ewiihpapaawiintamaakeyaan minwaacimowin aaniinti Christ eshikihkenimaahsiwintc, aaniihsh kaawiin nintishihcikehsii ciaakwiihtawi⁠maacihtaawak awiya aasha kaakii'ishimaatahkiciketc.

²¹ Kehtemasina'ikanink itahsh ishi‑ishipii'ikaate: “Iki hsa mahshi kaakii'wiintamawaahsiwintwaa ehtashimimintc tawaapankewak, iki tahsh kaye mahshi kaanoontansikwaa tanihsitohtamook,” ishipii'ikaate.

Pwaal ekiiwii'ishaatc weti Oroomink

²² Mooshak itahsh e'ontamiiyaan weti ehpapaamaacimoyaan, kaaonci‑ishihsehsiwaan ciantawaapaminakook.

²³ Aasha tahsh ekiihkiishihtooyaan o'o nintanohkiiwin i'iweti nahke ahkiink, aasha tahsh niipiwa' tahsopipoonakaa kaakii'inentamaan ewii'waapaminakookipan,

²⁴ miitahsh enentamaan ci‑ishihcikeyaan ahpii ishaayaan Ispen (Spain) ahkiink. Nimpakohsentaan itahsh cimawatihsinakook ahpii weti anipimiayaayaan, ciwiici'iyek kaye weti kaawii'ishaayaan. Paanimaa kota kii'ishkwaa‑⁠temawatihsinakook.

²⁵ Pinamaa tahsh noonkom weti Ceroosalamink (Jerusalem) nintishaa, ewii'wiici'imak Kishemanitoo opimaatisiima' weti kaa‑ayaanitc.

²⁶ Iki tahsh otanami'aak weti Maahsitooniya (Macedonia) ahkiink kaa‑ayaawaatc, weti kaye Ahkeya (Achaia) ahkiink kaa‑ayaawaatc wiinawaa hsa piko kii'inentamook ewiihpakitinikewaatc shooniyaan ewii'wiici'aawaatc kaakoohpaatisinitc kaatakwiinonitc Kishemanitoo opimaatisiima' kaaishiayaanitc weti Ceroosalamink.

²⁷ Wiinawaa tahsh iko kii'inentamook ewii'ishihcikewaatc, aaniihsh oncita piko ishinaakwanini cikii'wiici'aawaahpan. Aaniihsh iki Coowak okii'miinaawaa' nihtam i'i ekaa kaakiihCoowiwihsinik i'i kaakii'ishishawenimikowaatc Kishemanitoon. Miitahsh eshinaakwaninik ekaa kaaCoowiwihsikwaa wiinihtamawaa ciwiici'aawaahpan ini Coowa' aaniin kewiinawaa otaya'iimiwaan kaakii'ishishawentaakosiwaatc.

²⁸ Ahpii tahsh kiihkiishihtooyaan i'i nintanohkiiwin, kii'ishkwaamisiwemiinakwaa ini shooniyaan kaakii'maawacihcikaniwinitc, miitahsh i'i cinimaacaayaan Ispen ahkiink ci‑ishaayaan. Ninka‑anikipihcii tahsh ewii'mawatihsinakook.

²⁹ Ahpii tahsh weti otihsinakook, ninkihkentaan hsa cipiitaawak Christ kaawenootaninik oshawencikewin.

³⁰ Niitanami'aak kitishikanoonininim e'wiiciiwank kaaTipenciketc Ciisahs Christ, i'imaa kaye saaki'itiwinink Kishemanitoo otAhcaahkwan kaamiininank. Kitishikakaansomininim, wiici'ihshik kaashianami'ehtawak Kishemanitoo, wiinke piko weweni cianami'ehtamawihshiyek.

³¹ Anami'ehtamawihshik cipapaamenimihsikwaa iki kaatepwehtansikwaa weti Cootiiya (Judea) ahkiink kaa‑ayaawaatc, i'i tahsh kaye kaashikakwewiici'imak Kishemanitoo opimaatisiima' i'imaa Ceroosalamink kaa‑ayaanitc mii 'iweni kaa antawentamowak ciotahpinaminitc.

³² Miitahsh i'i ahpii kewaapaminakook Kishemanitoo inentank, ciihkentamowin tahsh kaye ninkapikikii. Ahpii tahsh weti mawatihsitiyank, wiinke kikaonci⁠oshkiminwamanci'omin.

³³ Taka Kishemanitoo kaamiikiwetc pisaanentamowin kikawiiciiwikowaa kahkina kaatahshiyek. Emen.