ᐅᕒᐆᒪᓇᒃ 13 - Ojibwe Kihcimasina'ikan

Cina'ihtawintwaa iki ahkiiwiokimaak

¹ Miitahsh eshinaakwahk kahkina awiya cina'ihtankipan i'i okimaawiwin, aaniihsh kiishpin Kishemanitoo inentansikipan ciayaahsininik i'i okimaawiwin kaawiin taakii'ayaahsinini. Miitahsh kaaonciayaanik okimaawiwin Kishemanitoo wiin iko ekiihpakitinank o'omaa ahkiink.

² Awiya tahsh kaamiikaatank okimaawiwin miihsa taapishkoo e'miikaatank i'i Kishemanitoon kaakii'onahtoonitc. A'a tahsh o'o kaaishihciketc wiin ihsa piko takashkihtamaaso aanti keoncionahshowaasotc.

³ Iki tahsh weweni kaaishihcikewaatc kaawiin memwehc okakohsaahsiwaawaa' i'i ahkiiwiokimaa'. Iki tahsh kaanihtaa mamaashiiwaatc ehta okakohsaawaa'. Kinantawentaam ina cikohsaahsiwek a'a ahkiiwiokimaa? Inashke kwayahk ishihcikek, miitahsh keininek ekii'minohcikewek.

⁴ Aaniihsh mii 'i taapishkoo eshinaakositc a' ahkiiwiokimaa e'anohkiihtawaatc Kishemanitoon, e'anohkiitc kiin ciminohsewatc. Kiishpin mamaashiiyan, mii hsa tahsh i'i cikohsatc, aaniihsh mashkawisiiwinini otayaan weweni piko cinana'ahsihk, kaawiin kikamanaaci'ikohsii. Kishemanitoon iitok otanohkiihtawaan. Pisaan itahsh iko okanana'ahsaan awiyan kaamamaashiinitc.

⁵ Miitahsh o'o kaaonci‑ishinaakwahk cina'ihtaman i'i okimaawiwin, kaawiin wiin ehta cikohtamowatc Kishemanitoo kaawii'ishinana'ahsaatc awiya', i'i hsa kaye cikihkenintisoyan kwayahk e'ishihcikeyan.

⁶ Miitahsh kaaonci‑ishinaakwahk citipa'amek i'iweni kaanihtaa tipa'amawintc wekimaawaatisitc, aaniihsh iki ahkiiwiokimaak otanohkiihtawaawaan Kishemanitoon ehtootamowaatc otanohkiiwiniwaa.

⁷ Tipa'amok itahsh wekonenini ko kaa‑antaweniminekwaa citipa'amowek. Tipa'amok kaye i'i kitahkiimiwaa, ini kaye pepahkaan kekoonan kekiihtipa'amekipan. Kihtenimihkwak itahsh kaye iki kekihtenimekwaapan, miitahsh kaye peshikwan tootawihkwak kekihci‑inenimintwaapan.

E'wiintamawintwaa aaniin ketootaatiwaatc

⁸ Keko awiya kekoonini masina'amawaahkek, kinantawentaakosim itahsh mooshak cisaaki'itiyek, taapishkoo awiya mooshak kaatipa'iketc. Awenen tahsh iko kaasaaki'aatc owiicipimaatisiin mii hsa 'awe kaatipitootank Moosihsoon (Moses) otOonahshowewinini.

⁹ O'o tahsh peshik onahshowewin kaaihkitoomakahk: “Saaki'ihkwak iki kiicipimaatisiimiwaak taapishkoo kaa‑ahpiihcisaaki'itisoyek,” mii hsa peshikwan ahpiihtentaakwan ono maamaw kaa‑ahpiihtentaakwahkin onahshowewinan kaawii'wiintamaan: “Keko papaamenimimaahken pahkaan awiya owiiciwaakanan, keko nihshiwehken, keko kaye mihsawentamowaahken awiya pahkaan otaya'iiman kaatipentank.”

¹⁰ Kiishpin tahsh awiya saaki'atc, kaawiin wiihkaa kikamacitootawaahsii. Mii hsa tahsh eshinaakwahk awiya kaasaaki'iwetc ehtipitootank kahkina onahshowewin.

¹¹ Miitahsh o'owe eshinaakwahk ci‑ishihcikeyek, aaniihsh kikihkentaam aasha tipa'ikan e'ocihcihsek cikoshkosiyek. Nawac iitok noonkom kipehshwaapantaam kaawii'ishipimaaci'ikooyek ahpiihc wiin kaakii'ahpiihsaapantamekipan nihtam kiimaaciitepwehtamek.

¹² Aasha ohsha kekaa ishkwaatipihkan, aasha ohsha piitaapan. Taka tahsh mii 'i ishipoonihtootaanin ini kekoonan tipihkanonk kaaoncitipentaakwahkin. Taka pihsihkantaanin ini miikaasowi⁠aapacihcikanan waahseyaasiwinink kaaoncitipentaakwahkin.

¹³ Taka tahsh weweni pimaatisitaa, ci‑ishihcikeyank kaaishihcikewaatc waahseyaank kaaishitipentaakosiwaatc. Taka kaawiin onoweniwan kikaishihcikehsiimin: papaakakiipaacihcikewin, minihkwewin, wiinaatisiwin, pihshikwaacihcikewin, kiihkaantiwin, aayaahshenintiwin.

¹⁴ O'o tahsh kikaishihcikemin: taka hsa pihsihkamowaahk kaaTipenciketc Ciisahs Christ opimaatisiwin. Kaawiin tahsh awahshime kikaishihcikehsiimin kaawii'ishihcikemakahk o'o kiwiiyawinaan aaniin kaye eshimihsawentamoomakahk.