ᑭᑫᑕᒨᔑᐌᐎᓐ 4 - Ojibwe Kihcimasina'ikan

Kihcikiishikonk kaa‑ayaawaatc ehkihci‑inentaako'aawaatc Kishemanitoon

¹ Ishkwaahsekin ini kaakiihpiwaapantamaan, miitahsh miinawaa kekoon niwaapantaan. Ayaa 'iweti ehpaahkihsink ishkwaantem kihcikiishikonk. 'Iweti nihtam kaakii'noontawak kihcipootaacikanink kaakii'inwetc kaakiihkanooshitc, miinawaa kii'ihkito: “Piishaan o'omaa ishpimink, miihsh iwe kiwii'waapanta'in ini kekoonan kehcinaac iko ciani‑ishiwepahkipan,” nintik.

² Shemaak itahsh ninkii'wiici‑inentamoshkaakowaan Kishemanitoo otAhcaahkwan. Niwaapantaan e'onahtek kihcikiishikonk kihciapiwin, kaye awiya niwaapamaa e'namatapitc i'imaa,

³ e'waahsiinkwesotc; taapishkoo kaaishinaakosiwaatc oko tino niishin ahsiniik kaa‑ahpiihcionishihshiwaatc, caaspar (jasper) eshioshaawashkwaapihkisitc, kaarniiliyan (carnelian) kaye eshimiskwaapihkisitc, mii 'i eshinaakositc e'waahsiinkwesotc. Kiisihsweyaap kaye i'imaa kii'ayaa waahkaaya'ii kihciapiwinink, taapishkoo e'inaahsahkonek kaaishinaakositc a'a emaralt (emerald) ahsin, shinkopiink eshishaapwaahtenaakositc.

⁴ Imaahsh kaashiahtek kihciapiwin kii'waahkaahtewan kihciapiwinan niishtanahshiniiwin (24) ehtahsinkin. Niishtanahshiniiwin itahsh i'imaa oniikaanisiik kii'namatapiwak ekii'waapishkaanikin okikishkikaniwaan kaye ekii'osaawi shooniyaawiwaninikin ini otookimaawaanohkwaaniwaan kaakikishkamowaatc ohtikwaaniwaank.

⁵ Imaa tahsh kihciapiwinink kii'onciwaawaahtehse kaye kii'oncimatwewehtaakwan inihtaakosiwin kaye ehpinehsiwank kaainihtaakwahk. Niishwaahso (7) tahsh imaa waahsahkonencikanan kiihtanahkonewan oncishkaw inahke kihciapiwinink. Amiiwa' ini kaaniishwaahcinitc otAhcaahkwa' Kishemanitoo.

⁶ Kaye e'inaahsamahtek kihciapiwin mii 'imaa kaa‑ayaak saaka'ikaniink kaaishinaakwahk, taapishkoo waahsehcikanaapihk ehtinowank, taapishkoo mihkwamiink kaaishishaaponaakositc miihsh eshinaakwahk kaa‑ahtek. Kaye mekwaya'ii kaye waahkaaya'ii kihciapiwinink niiwin awiyak opimaatisiik kii'ayaawak, misiwe e'oshkiinshikowaatc, niikaanaya'ii kaye otaanaank kii'oshkiinshikowak.

⁷ Awe tahsh nihtam opimaatisii taapishkoo mihsipishiw ishinaakosi. Awe tahsh kotak taapishkoo naapepishihki. Shikwa miinawaa 'a kotak kii'inatenkwe ininiink. Miinawaahsh a'a kotak mikisi ehpimihsetc ishinaakosi.

⁸ Mii entahshiwaatc opimaatisiik kaaniiwiwaatc ninkotwahcininiwan oninkwiikaniwaan. Misiwehsh oshkiinshikowak waahkaaya'ii kaye piincaya'ii. Kaawiin wiihkaa aahtenikamohsiiwak, ehkiishikaninik nikamowak kaye ehtipihkaninik, o'owe e'ina'amowaatc: “Wawiinke kwayahkwaatisi! Wawiinke kwayahkwaatisi! Wawiinke kwayahkwaatisi kaaTipenciketc Kishemanitoo wawiinke kaaMashkawaatisitc! aweti kaakii'ayaatc, omaahsh noonkom kaa‑ayaatc, miinawaahsh cipiayaatc!” ina'amook.

⁹ Otipaacimaawaan eshi ahpiihci onishihshiwencikaniwinitc, kaye okihtakimaawaan kaye onanaahkomaawaan ini kihciapiwinink kaanamatapinitc ahpane pishihshik kaapimaatisinitc.

¹⁰ Ahpii hkwa eshihcikewaatc opimaatisiik, kaye wiinawaa kaaniishtanahshiniiwiwaatc (24) oniikaanisiik otoociciinkwanapiihtawaawaan ini kihciapiwinink kaanamatapinitc ahpane pishihshik kaapimaatisinitc, kaye otahpakitoonaawaan okihciokimaawaanohkwaaniwaan i'imaa enaahsamahtek i'i kihciapiwin e'ishpenimaawaatc. Mii 'owe ehkitowaatc:

¹¹ “Kiin kaaTipenimiyaank ninKishemanitoominaan! Kiin kitepakentaakos ciwiincikaatek ciahpiihci onishihshiwencikaniwiyan, kaye ciahpiihci ishpenimikooyan, kaye ciahpiihci kihcimashkawentaakosiyan, aaniihsh kahkina kekoon kikii'oshihtoon. Kiin iko ekii'inentaman kii'onciayaawan kaye kii'oshihcikaatewan,” amii 'iwe otinaawaan.