ᑭᑫᑕᒨᔑᐌᐎᓐ 3 - Ojibwe Kihcimasina'ikan

Saartihs kaaishiayaawaatc eshipii'amawintwaa

¹ “Ini otencaliman otepwehtamook kaatashimaamawianami'aawaatc i'imaa Saartihs (Sardis), 'owe oshipii'amaw: O'owe ihkito a'a kaa‑ayaawaatc niishwaahso (7) Kishemanitoon otAhcaahkoni kaye i'i niishwaahso wanankohsha': Ninkihkentaan eshihcikeyek. Aanawiin ehpimaatisiyek e'inakinsoyek, kinipom itahsh.

² Koshkosik, mashkawisiihtook keyaapi kaa‑ayaayek kekaa kaanipoomakahkin. Kaawiin nintooncimihkansiin cikiishihtooyek kaakii'ineniminek ninKishemanitoom; otishiwaapantaan itahsh ehkiishihtaawaahsiwek.

³ Maamihkawik i'iwe kaakii'ishimiinikooyek kaye kaakii'ishinoontamek. Mii 'iwe kihciwinamohk, kaye pakitinamohk i'iwe kaaishimacitootamek. Kiishpin itahsh ekaa koshkosihsiwek, taapishkoo okimootishk kaaishikoshkowishiwetc takwihshink mii 'iwe keinentaakosiyaan: kaawiin kikakihkentansiim ahpii mayaa kepiotihsinakook.

⁴ Pankii piko kitahshim imaa Saartihsink kaa‑ayaayek mooshak ehpehkihtooyek kikikishkikaniwaan. Kiinawaa ko kikawaapishkihkonayem ciwiicipimohsemiyek, aaniihsh kiteahpiihtentaakosim.

⁵ Awenen iko kepahkinaaketc mii 'iwe keishihkonayetc: tawaapishkaaniwan okikishkikanan. Kaawiin kaye ninkakaahsi'amawaahsiin imaa masina'ikanink kaaoshipii'ikaasowaatc oko tepwe kaapimaatisiwaatc. Miiwak itahsh oko kewaawiinakwaa ehtipenimakwaa, i'imaa enaahsamiinitc ninTeten, i'i kaye kaaishiayaanitc ninTeten otencalimini ninkawaawiinaak.

⁶ A'awe tahsh kaaonoontamaawinitc maano okapisintawaan Kishemanitoon otAhcaahkoni kaainaanitc i'i otepwehtamoo' pepahkaan kaaishimaamaawaci'itinitc.”

Pilatelhpiyaank kaaishiayaawaatc eshipii'amawintwaa

⁷ “Kaye ini otencalimiwaan otepwehtamook i'imaa Pilatelhpiyaank (Philadelphia) kaatashimaawaci'itiwaatc, owe ishipii'amaw: O'o kitikowaa 'awe misiwe kaakwayahkwaatisitc kaye kaatepwewiniwitc, a'a kaa‑ayaatc aapaapihka'ikan Tepit (David) kaakii'ayaahpan. Wa'a tahsh inini ahpii paahkinank ishkwaantem, kaawiin miinawaa awiya okakashkihtoohsiin cikipa'ank, kaye ahpii kipa'ank kaawiin miinawaa awiya okakashkihtoohsiin cipaahkinank.

⁸ Wiin ihkito: Ninkihkentaan eshihcikeyek. Aanawiin pankii e'mashkawisiiyek, minooc kikiihkanawentaam kaakii'ihkitoyaan. Kaawiin kaye kikii'aanawenimihsiim cipoonipiminisha'oyek. Nashke kikiihpaahkintenamawininim miinawaa awiya kekipa'ansik.

⁹ Inashke mii 'owe ketootawakwaa ikiweniwak kaawiici'iwewaatc i'imaa Setan (Satan) omaawaci'iwewinink. Miiwak iki okiiwanimook, Coowak (Jews) nintinowimin kaaihkitowaatc, kaawiin tepwe tinowihsiiwak. Nashke ninkaishi'aak cipiociciinkwanapiwaatc imaa eshisitekaapawiyek. Okakihkentaanaawaa tahsh ehsaaki'inakook.

¹⁰ Kikiihkanawentaam kaakii'ininakook cishashiipentamek. Kaye niin kikakanawenimininim ahpii pakamishkaamakahk kakweci'iwewin, amiitahsh o'o kekakweci'ikowaatc omaa ahkiink kahkina kaaotaawiniwaatc.

¹¹ Weyiip ninkapiishaa. Minciminamohk itahsh i'iwe kaa‑ayaayek, ekaa awiya cimahkamihsinowek kitipa'amaakoowiniwaa kaawii'miinikooyek pahkinaakeyek.

¹² A'awe tahsh kepahkinaaketc ninkaishi'aa peshik citinowitc ini kaashipatahkitekin kaa‑aahswaahkwa'ikaakaaniwankin i'imaa okihcianami'ewikamikonk ninKishemanitoom. Kaawiin miinawaa wiihkaa tasaaka'ansii. Miitahsh o'o keishipii'wak: ninkaoshipii'amowaan owiinsowinini ninKishemanitooman, i'iwehsh kaye ninKishemanitooman otootenaamini kaaishinihkaatenik, mii 'iwe Oshki Ceroosalam (Jerusalem), i'imaa kihcikiishikonk kepioncinaashishkaanik, i'imaa ninKishemanitoomink kepionciinik. Nintooshkiwiinsowin kaye ninkaoshipii'amowaan opimaatisiwinink a'a kepahkinaaketc.

¹³ A'a kaaonoontamaawinitc maano okapisintawaan ini Kishemanitoon otAhcaahkoni i'i kaainaanitc otepwehtamoo' pepahkaan kaaishimaamaawaci'itinitc.”

Ikiweniwak Leyaatihsiiyaank kaa‑ayaawaatc eshipii'amawintwaa

¹⁴ “Ini otencalimiwaan otepwehtamook kaamaamawianami'aawaatc Leyaatihsiiya (Laodicea) ootenaank, o'owe ishipii'amaw: O'o kitikowaa a'a Emen (Amen) kaaishinihkaasotc, kaa‑ayaankwamisitc kaye kaatepwetc Otipaacimo. Mii 'awe kaakii'oncimaacihsininik minihk kekoon Kishemanitoo kaakii'oshihtootc.

¹⁵ O'owe ihkito: Ninkihkentaan kaakiihpimi‑ishihcikeyek. Miihsh 'iwe kitinenimininim i'i miicim ekaa e'minohpokwahsinok ekaa ehtekishitehsinok ekaahsh kaye ehtetahkaahsinok. Ampehsh kanake peshik o'o ishiayaayek kaakishitek kemaa kaye kaatahkaak kekoon.

¹⁶ Nimaashihpitaan itahsh i'i kaainentaakosiyek ekaa ehkishitehsinok kitishiayaawiniwaa kaye ekaa wawiinke ehtahkaahsinok, kikakitanewepamininim itahsh.

¹⁷ Aaniihsh mii 'iwe ehkitoyek: ‘Niwenootisimin, ninkii'animaawacihcikemin, kaawiin kaye kekoon ninoontehsehsiimin.’ Kaawiin itahsh kikihkentansiim eshiayaayek, ehkakwaatakipimaatisiyek kaye ehkoohpaasinaakosiyek. Kikitimaakisim itahsh, kiwaahsaahkonawem kaye, kaawiin kaye kiwaapihsiim.

¹⁸ O'owe tahsh kitishikihkino'amawininim keshihcikeyek: niin ataamihshik osaawi shooniyaa kaakiihpehkaapihkaahkisotc ciwenootisiyek itahsh. Kaye ataamihshik waapishki kikishkikanan cikikishkikeyek, aakwanawahpisok iwe kaaishiwaahsaahkonaweyek ekaa ciakasinaakosihsiwek. Ataamihshik kaye poonsinikan cipoonsinamek kishkiinshikowaan ciwaapantamaayek.

¹⁹ Niin itahsh minihk hsa ko kaasaaki'akwaa nimaamiinokihkino'amawaak, nimpahshanshe'waak kaye. Ayaankwaamisik, pakitinamohk itahsh kaaishimacitootamek.

²⁰ Inashke pisintamohk! Niniipaw akwaciink i'imaa ishkwaantenk, nimpaahpaawa'ike. Awiya tahsh noontawitc ehkiikitoyaan, paahkintenamawitc, ninkapiintikawaa tahsh, ninkawiiciwiihsiniimik, kaye wiin tahsh ninkawiiciwiihsiniimaa.

²¹ A'awe keshaakoocihtwaatc ninkashimiinaa ciwiitapimitc ninkihciapiwinink taapishkoo niinihtam kaakii'ishishaakoocihtwaayaan kaye noonkom e'wiitapimak ninTete okihciapiwinink.

²² A'a kaaonoontamaawinitc okapisintawaan Kishemanitoon otAhcaahkoni ini kaainaanitc otepwehtamoo' pepahkaan kaaishimaamaawaci'itinitc.”