ᑭᑫᑕᒨᔑᐌᐎᓐ 22 - Ojibwe Kihcimasina'ikan

¹ Miinawaa ninkii'waapanta'ik a'a encal i'i siipi kaapimaatisiishkaakemakahk i'i nipi ehpiihciwaahshekamik taapishkoo waahsehcikanaapihk ehshaapona'inaakwahk ishinaakwan 'i siipi, ehpionciciwank i'imaa okihciapiwinink Kishemanitoo kaye 'a Maanahcaanihshenhs.

² Naawaya'ii i'imaa ishiciwan ehpimamok miihkana 'imaa ootenaank. Eyiitawakaam kii'ishipatahkiso pimaatisiwini mihtik. A'ahsh mihtik kiihkiishi⁠shoominiwi ehtahsokiisihs, mitaahswahshiniishink entahso⁠ahki. Ini aniipiihshan e'aniipiihshiwitc a'a shoominaahtik inaapatanoonan cionciminoayaa'intwaa kahkina kaapepahkaanwewaanakisiwaatc pemaatisiwaatc.

³ Shikwa kahkina kekoon kaamacakintank Kishemanitoo kaawiin wiihkaa 'imaa tamihkikaatehsinoon ootenaank. Okihciapiwiniwaa Kishemanitoo kaye 'a Maanahcaanihshenhs i'imaa ta‑ayaani ootenaank. Kaye otanohkii'aakana' okakihci‑inenimikoo'.

⁴ Okawaapamikoo' owatenkonk, kaye owiinsowin Kishemanitoo taoshipii'ikaateni oskahtikoniink otanohkii'aakana'.

⁵ Kaawiin miinawaa wiihkaa tatipihkahsinoon. Kaawiin kaye oka‑antawentansiinaawaa waahsahkonencikan cionciwaahseyaak, kaawiin kaye kiisihs owaahsesiwin. Aaniihsh kaaTipencikenitc Kishemanitoon okawaahseshkaakowaan. Miitahsh iwe takihciokimaawiwak ahpane piko pishihshik citipencikewaatc.

Weyiip ninkapiishaa e'ihkitotc Ciisahs

⁶ Ninkii'ik itahsh a'a encal: “Ayaankwaamentaakwanoon kaye tepwewiniwanoon ono ihkitowinan. KaaTipenciketc Kishemanitoo kaamiinaatc otAhcaahkwan ini otipaacimowininiima' kaakanootamaakotc, mii 'awe kaapi‑ishinisha'waatc otencaliman ciwaapanta'aanitc otanohkii'aakana' 'iwe weyiip keni‑ishihsenik.”

⁷ “Pisintan!” ihkito 'a Ciisahs. “Weyiip ninkapiishaa! Tashawentaakosi a'a kaakanawentank ono ihkitowinan Kishemanitoo kaaishikanootamawintc o'omaa masina'ikanink kaaishipii'ikaatenikin,” ihkito.

⁸ Niin Cwaan ninkii'noontaanan kaye ninkii'waapantaanan kahkina ono. Ahpii kaa'ishkwaanoontamaan kaye kaa'ishkwaawaapantamaan ninkiihpatapipani' imaa eshisitekaapawitc ewiihkihci‑inenimak a'a encal kaakii'waapanta'itc ono.

⁹ Ninkii'ik itahsh: “Keko 'i tootanken! Niin 'a peshik kiwiicianohkiimaakan kaye owiitanohkiimaakaniwaan iki kiicihkiweyak, miiwak iki Kishemanitoo otipaacimowininiima' kaakanootamaakotc, kaye kahkina awiya kaakanawentank ini ihkitowinan o'omaa masina'ikanink kaa‑ayaakin. Kihci‑inenim Kishemanitoo, mii ehta 'awe.”

¹⁰ Kayehsh ninkii'ik a'a encal: “Keko kipa'anken ini ihkitowinan Kishemanitoo kaaishikanootamawintc o'omaa masina'ikanink kaa‑ayaakin. Aaniihsh pehshonaakwan ono kahkina citipihsekin.

¹¹ 'Awe kaawiihkwayahkopimaatisihsik, maano keyaapi tatashimaci‑ishiwepisi. A'ahsh kaye kaawiinentaakositc maano keyaapi tatashiwiinaatisi. A'ahsh kaakwayahkopimaatisitc taka kaawiin okapoonihtoohsiin cikwayahkopimaatisitc. 'Awehsh miina kaainakintisotc citipenimikotc Kishemanitoon, taka mii 'i keinakintisotc,” ninkii'ik a'a encal.

¹² “Nashke pisintan!” ihkito Ciisahs. “Weyiip ninkatakohshin,” ihkito. “Ninkapikikitakohshin nintipa'amaakewinan. Entahsopeshikowaatc ninkamiinaak kaaishinaakwaninik otishihcikewin.

¹³ Niin a'a nihtam kaakii'ayaatc, kaye piinihsh ishkwaac keayaatc. Niin a'a kaakii'maacihsek kahkina miinawaa kekiishihsek,” ihkito.

¹⁴ Tashawentaakosiwak iki kaakisiipiikinamowaatc okikishkikaniwaan. Tatepakentaakosiwak itahsh iki cinaasihkawaawaatc ini pimaatisiwini mihtikoon cionciwiihsiniwaatc, kaye i'imaa kaaishi‑ishkwaantemiwaninik cioncipiintikewaatc i'imaa ootenaank.

¹⁵ Akwaciink itahsh ta‑ayaawak iki anoociko eshiwepisiwaatc, kaye kaakosaapantamowaatc, kaapihshikwaatisiwaatc, kaanihshiwewaatc, kaye kaamanitoohkewaatc kekoon, kaye awenen iko kaasaakihtootc ehkiiwanimotc kaye ehkakiinawishkiayishihciketc.

¹⁶ “Niin Ciisahs ninkii'ishinisha'waa nintencalim citipaacimohtawinek ono aanti piko kaamaawaci'itiwaatc otepwehtamook. Niin 'imaa onihtaawiki'aakanink Tepit (David) nintoontahkaanes. Niin a'a kaakiihkaayaahsiketc waapanank,” ihkito.

¹⁷ “Pitakwihshinin!” ihkitowak Kishemanitoo otAhcaahkwan kaye 'a Wiikihtoowihkwe. Kaye kahkina kaanoontank a'a maano taihkito: “Pitakwihshinin!” Kaye kiin aweneniwiyan iko kaanoontaayaapaakweyan, ampe piishaan. Piko awiya inentank pisaan iko okaotaahpinaan kaapimaatisiishkaakemakahk nipi.

Ayaankwaamimiwewin

¹⁸ Niin Cwaan (John) nintayaankwaamimaak kahkina kaanoontamowaatc ono ihkitowinan Kishemanitoo kaaishikanootamawintc, o'omaa masina'ikanink kaa‑ayaanikin: Kiishpin nankihtootc awiya kekoon ono ihkitowinan, kewiin Kishemanitoo okanankihtamaakoon otipa'amaakoowinink ini kotakihtoowinan omaa kaaoshipii'ikaatekin masina'ikanink.

¹⁹ Kiishpin kaye awiya piko keaciwinamokwen ono ihkitowinan ekaa cimisiweyaahsininik Kishemanitoo okanootamaakoowin omaa masina'ikanink kaa‑ayaanik, okaotaahpinamaakoon Kishemanitoon kewiin kewiici'iwehpan imaa pimaatisiwini mihtikonk cionciamominehsik, kaye kewiici'iwehpan Kishemanitoo otootenaamink, omaa kaatanaatotekin masina'ikanink.

²⁰ Awe kaatipaatotank ehtepwemakahkin onoweniwan kaye wiin ihkito: “Tepwe! Wiipa ninkapitakohshin!” Haw, mii 'iwe keishiwepahk! Pitakwihshinin, Ciisahs kaaTipencikeyan!

²¹ Oshawencikewin kaaTipenciketc Ciisahs okawii'wiiciiwikonaawaa kahkina awiya. Emen.