ᑭᑫᑕᒨᔑᐌᐎᓐ 20 - Ojibwe Kihcimasina'ikan

Mitaahswaahk tahso ahki ewiihtipencikewaatc Christ, okwayahkwaatisiima' kaye

¹ Miitahsh ninkii'waapamaa encal kihcikiishikonk ehpioncinaashahkiitc, ehtahkonank aapaapihka'ikan i'iwe kaaishiwiimpahkamikaak kaamishahkiiyaahsinok kekipa'ikaakaaniwank, kaye kihcisakaapaan ehtahkonank.

² Okii'otihtinaan ini kihciohkaatiikinepikoon, miiwan ini mewisha kaakii'onciinitc macikinepikohshan, mii 'awe maciaya'aa kaye Setan (Satan) kaatinowitc. Miiwan ini okii'mamaancikwahpinaan 'awe encal, mitaahswaahk tahso ahki minihk cimamaancikwahpisonitc.

³ Okiihpiinciwepinaan i'imaa kaaishiwiimpahkamikaak. Amiihsh i'i okiihkipa'aan, okiihkipiakoshkiwahsaan, ekaa miinawaa wiihkaa cikashkih'ohsinik cisaaka'ansinik, ciwayeshi'aahsinik ini kaapepahkaanwewaanakisinitc ahkiink, paanimaa mitaahswaahk tahso ahki kiikishipiayaak. Miitahsh i'i ahpii ciaapa'ontc acina.

⁴ Miitahsh ninkii'waapantaanan kihciapiwinan. Iki tahsh kaatehsapiwaatc kii'miinaawak cionaahkonikewaatc. Miinawaa kaye ninkii'waapamimaa' otahcaahkowaa' ikiweniwak kaakiihkiishkikweta'ontwaa, oko kaakii'oncinihsintwaa ekiihtipaacimaawaatc Ciisahsoon, ekii'wiintamaakewaatc kaye Kishemanitoon otihkitowinini. Kaawiin okii'ociciinkwaniihtawaahsiwaawaan ini pikwaciaya'aawihshan kaye omanitoohkewihkoocikanini. Kaawiin kaye i'imaa kii'oncikihkinawaacipii'waahsiiwak oskahtikowaank kaye oninciiwaank citipenimikowaahpan. Okoweniwak miinawaa kiihpimaatisiwak, kaye mitaahswaahk tahso ahki okii'wiicitipencikemaawaan ini Christan.

⁵ Ikihsh wiin kotak kaanipowaatc, kaa mahshi kiihkiiwepimaatisihsiiwak, paanimaa ko kii‑ishkwaahsek mitaahswaahk tahso ahki. Okoweniwak itahsh aasha kaakiiwepimaatisiwaatc, mii 'owe nihtam cikiiwepimaatisinaaniwank.

⁶ Shawentaakosiwak oko i'imaa kaa‑ahshitakimintwaa nihtam kiiwepimaatisiwinink. Inakimaawak ehtipenimikowaatc Kishemanitoon. Amiiwak oko niishwaa nipowin kaawiin okatipenimikohsiinaawaa. Kihcianami'ewikimaak itahsh okainanohkii'ikowaan Kishemanitoon kaye Christan. Mitaahswaahk tahso ahki okawiicitipencikemaawaan Christan.

Keshishaakooci'intc Setan, i'i kaye kaawiiciiwikotc

⁷ Ahpii tahsh mitaahswaahk tahso ahki kepoonihsenik, miitahsh i'i Setan (Satan) ta/⁠aapa'ikaniwi okipa'okoowinink onci.

⁸ Tapisaaka'am, tamaacaa ciwayeshi'aatc ini pemaatisinitc kahkina kaatahswewaanakisinitc misiwe ahkiink kaa‑ayaanitc, miiwa' i'i Kwaak (Gog), Mekwaak (Magog) kaainimintc. A'awe Setan okamaamawi'aa' kahkina cimiikaasonitc entahshinitc onoweniwa', taapishkoo entahswaawankaak ciikew mihtaawank kaaishinaakwahk, mii 'iwe keishinaakosiwaatc.

⁹ Kii'animooshkinenaakosiwak misiwehkamik, kaye okii'waahkaashkaanaawaa kaaishikapehshinitc i'i Kishemanitoon opimaatisiimini, 'iweni tahsh kaye ootena kaasaakihtoonitc. Ishkote tahsh kihcikiishikonk kiihpioncihse, amiitahsh Setan omiikaasowininiima' okiihcaakaahkisokonaawaa.

¹⁰ Miitahsh wa'a maciaya'aa kaakii'wayeshi'aatc 'imaa kii'ishiwepinaa saaka'ikaniink, ishkote eshiayaanik kaye kaapiskanenitc ahsiniin kaawiihsakaapahsowenitc. Mii 'imaa aasha kaakiihpiinciwepinintwaa pikwaciaya'aawihsh kaye ini kaakiihkanootamaakotc kaakii'wayeshi'iweshkinitc. Mii 'imaa takakwaataki'aawak ehkiishikaninik kaye ehtipihkaninik, mii ko ahpan iko pishihshik.

Keshitipaahkonintwaa onipook

¹¹ Miinawaa tahsh ninkii'waapantaan e'waapishkaak kihciapiwin e'mihshaak. Kaye ninkii'waapamaa 'awe kaatehsapitc. Onaakosiwinink itahsh kii'onci oshimoomakan ahki, i'i kaye kiishik. Kaawiinhsh miinawaa wiihkaa kii'naakwahsinoonan.

¹² Ninkii'waapamaak onipook kahkina e'niipawiwaatc. Kaakihci‑inentaakosiwaatc kaye kaa‑akaahsentaakosiwaatc kahkina okii'oncishkawikaapawiihtaanaawaa 'i kihciapiwin. Kiihpaahkiikinikaatewan tahsh masina'ikanan. Kaye kotak miinawaa masina'ikan kiihpaahkiikinikaate. Mii 'owe masina'ikan kaaishioshipii'ontwaa tepwe kaa‑ayaawaatc pimaatisiwin. Onipook itahsh kii'onci tipaahkonaawak i'iwe onci kaaoshipii'ikaatenikin masina'ikanihkaank, mii 'imaa eshiahtenikin otishihcikewiniwaan.

¹³ A'a kihcikam okiihpakitinaa' i'i kaaniponitc i'imaa kaa‑ayaanitc miinawaa cinaakosinitc. Kaye nipowin kaye Hetiis (Hades) okiihpakitinaawaa' i'i onipoo' 'imaa kaa‑ayaanitc. Miitahsh kahkina kaaishionahshowaanintwaa kaaishinaakwaninikin otishihcikewiniwaan.

¹⁴ Miihsh o'owe nipowin i'i kaye Hetiis (Hades) kii'ishiwepinikaatewan kaaishkotewank saaka'ikaniink. Amii 'owe tahsh niishwaa (2) nipowin, kaaishkotewank saaka'ikan.

¹⁵ Awenen itahsh iko ekaa e'oshipii'waahsiwintc 'imaa masina'ikanink iki tepwe kaapimaatisiwaatc kaaishipii'ontwaa, mii 'imaa kii'ishiwepinaa ishkotewisaaka'ikaniink.