ᑭᑫᑕᒨᔑᐌᐎᓐ 19 - Ojibwe Kihcimasina'ikan

¹ Onoweniwan itahsh kaa'ishkwaahsekin, ninkii'noontaan taapishkoo ehkishiiwewaatc ehpaahtiinowaatc pemaatisiwaatc ehtanihtaakosiwaatc kihcikiishikonk: “Aalilooya! Pimaaci'iwewin, kihci‑inentaakosiwin, kashki'ewisiwin otayaan kiKishemanitoominaan!

² Tepwewaniniwan kaye kwayahkwaniniwan ini otinaahkonikewinan. Aaniihsh okii'ishionaahkonaan ini kihcipihshikwaacihkwewan, opihshikwaatisiwininiink kaakii'ishinihshiwanaaci'aanitc ahkiink kaa‑ayaanitc. Kishemanitoo okiihtipa'amawaan ini pihshikwaacihkwewan ekii'nihsaanitc ini otanohkii'aakana'.”

³ Miinawaa tahsh kiihkihcishaakowewak weti kihcikiishikonk: “Aalilooya! Mooshak ahpane taishpaapahte ehcaakitek kihciootena!” e'ihkitowaatc.

⁴ Kii'acicipani'owak itahsh ikiweniwak niishtanahshiniiwin (24) kaaniikaanakinsowaatc kaye iki niiwin opimaatisiik, e'ishpenimaawaatc Kishemanitoon i'imaa kaanamatapinitc kihciapiwinink. Shikwa kii'ihkitowak: “Emen! Aalilooya!”

Ehtipihsek cikihciwiikihtootc a'a Maanahcaanihshenhs

⁵ Inwewin itahsh kihciapiwinink kii'oncinoontaakwan e'ihkitoomakahk: “Nanaahkomihk kiKishemanitoominaan, kahkina kiinawaa otanohkii'aakana' kaye kahkina awiya kaakohtaanenimek, kaa‑akaahsentaakosiyek kaye kaakihci‑inentaakosiyek, nanaahkomihk!”

⁶ Miitahsh ninkii'noontawaak taapishkoo e'onsaamiinowaatc awiyak, kaye taapishkoo e'matweciwank kihcipaawihtik, kaye taapishkoo kaakihcipinehsiwank e'inwek, maamaw e'ihkitowaatc: “Aalilooya! Aasha noonkom maaciikihciokimaawi 'awe kaaTipenciketc, kiKishemanitoominaan kaaMaamawi⁠Mashkawentaakositc!

⁷ Minwentantaa! Kihciminwentantaa! Kihci‑inakimaataa! Aasha tipihse cikihciwiikihtootc a'a Maanahcaanihshenhs. Aasha kii'waweshi'itisowan ini kaawii'wiitikemaatc.

⁸ 'Awe ihkwe kii'miinaa cikikishkank e'onishihshink waapishkiikin e'waahsitek, ehpehkahk.” 'Iwe kaaonishihshink waapishkiikin mii 'oweni kaaicikaatenik okwayahkohcikewinini Kishemanitoo okwayahkwaatisiima'.

⁹ O'ohsh ninkii'ik a'a encal: “Oshipii'an: Shawentaakosiwak iki kaawiihkwamintwaa 'imaa owiikihtoowi wiihkwantiwinink a'a Maanahcaanihshenhs.” Miihsh 'owe miinawaa ninkii'ik: “Miiwan ono otihkitowinan Kishemanitoo kaatepwemakaninikin.”

¹⁰ Miitahsh ninkii'acicipani'owaan ositink a'a encal ewii'ishpenimak. Miihsh i'i ninkiihkanoonik: “Keko 'i tootanken! Niin kiwiitanohkiimaakan kaye owiitanohkiimaakaniwaan kiwiiciotepwehtamook, miiwak oko kaakihciwinamowaatc Ciisahs otepwewi tipaacimowin. Kishemanitoo ehta ishpenim!” Aaniihsh otipaacimowin Ciisahs mii 'iwe eshikiikitowaatc kahkina kaakanootamawaawaatc Kishemanitoon.

A'awe kaatehsapitc kaawaapishkisinitc mihtatimoon

¹¹ Ninkii'waapantaan itahsh kihcikiishik ekiihpaahkintenikaatek. Mii weti kaa'ayaatc kaawaapishkisitc mihtatim. A'awehsh kaatehsapitc Okwayahkwentaakosii kaye kaaTepwetc ishinihkaanaa. Kwayahkwaatisiwinink ishionahshowe kaye ishiantamiikaaso.

¹² Oshkiinshikoon taapishkoo kii'waahsiteniwan kaa‑ahpiihciwaahsahkonek ishkote, kaye ohtikwaanink ekii'ayaanikin niipiwa' kihciokimaawaanohkwaanan, ekii'ishipii'ikaatenik owiinsowin pahkaan awiya kaakihkentansik, piko wiinehta.

¹³ I'iweni kaakiihkikishkank miskwiink kiihkintaanikaateni. Miihsh i'i ishinihkaanaa: “OtIhkitowin Kishemanitoo.”

¹⁴ Iki tahsh kihcikiishikonk kaa‑ayaawaatc shimaakanihshak okii'ayoohko wiiciiwaawaan ekiihpiminisha'waawaatc, ehpitehsapiwaatc e'waapishkisinitc mihtatimoo'. Okikishkaanaawaa waapishkiikin e'waapishkaak ehpehkahk.

¹⁵ I'imaahsh otoonink a'awe kaapiminisha'ontc kii'onciimakanini ehkaahshaanik kihcimoohkomaan, mii 'iwe kaawii'onci⁠shaakooci'aatc kahkina pemaatisinitc kaatahswewaanakisinitc. Okaishitipenimaa' itahsh ehpiiwaapihkowaninik osahka'onaahtik ketahkonank. Okatashi siiskopiikishkawaa' i'i shoomina' entashi shoominaapohkaakaaniwinitc, mii 'iwe enentaakwaninik okihcinishkaatisiwin a'a Kishemanitoo kaaMaamawi⁠Mashkawentaakositc.

¹⁶ 'Awe tahsh kaatehsapitc okikishkikanink kaye opwaamink kii'oshipii'ikaateni 'owe wiinsowin: “Okihciokimaamiwaan kihciokimaak kaye kaaTipenimaatc otipencike'.”

¹⁷ Ninkii'waapamaa tahsh encal e'niipawitc kiisihsonk. Enikohk ehkishiiwetc oshaakowaanaa' kahkina pinehshiinsha' kaapapaamihsenitc newacikiishikonk: “Piantamaamawi'itik, Kishemanitoo takihciwiihkwanke!” okii'inaa'.

¹⁸ “Piantamiicik owiiyaahsiwaan kihciokimaak, shimaakanihshiiwikimaak, shimaakanihshak. Kaye owiiyaahsiwaan mihtatimook, iki kaye kaatehsapiwaatc, kaye kahkina pemaatisiwaatc, iki kaatipenimintwaa kaye kaatipenintisowaatc, iki kaakihci‑inentaakosiwaatc kaye kaa‑akaahsentaakosiwaatc, owiiyaahsiwaan kahkina piantamiicik!” okii'inaa'.

¹⁹ Ninkii'waapamaak a'a pikwaciaya'aawihsh kaye kaakihciokimaawiwaatc ahkiink kaye oshiimaakanihshiimiwaa' kahkina e'maawaci'itinitc, ewii'antamiikaanaawaatc ini kaapimitehsapinitc kaye oshiimakanihshiimini kaaoohkowiiciiwikonitc.

²⁰ A'ahsh pikwaciaya'aawihsh kii'otaahpinaa ahshic kaye ini aya'aan kaakiihkanootamaakotc kaakiiwanimonitc, miiwan ini kaakii'mamaantawihcikenitc e'waapantank. Mii wa'a omamaantawihcikewinink ekii'onciwayeshi'aatc i'iweniwa' kaakii'onci⁠kihkinawaacipii'ikaniwinitc pikwaciaya'aawihsh okihkinawaacihcikan, iniweniwa' omasinihkoocikan kaakii'ociciinkwanapiihtaminitc. A'a tahsh pikwaciaya'aawihsh kaye ini kaakihkanootamaakotc, minciniish ehpimaatisiwaatc i'imaa kii'ahpakinaawak ishkotewisaaka'ikaniink, i'imaa ehtakocaakisotc a'a ahsin kaaninkisotc e'wiihsakaapahsowetc.

²¹ Oshimaakanihshiimiwaa' itahsh okii'nihsikoni 'iwe omoohkomaan otoonink kaaonciimakaninik a'awe kaatehsapitc mihtatimonk. Miihsh kahkina pinehshiinshak wawiinke kiihtewiihsiniwak e'miiciwaatc owiiyaahsini.