ᑭᑫᑕᒨᔑᐌᐎᓐ 18 - Ojibwe Kihcimasina'ikan

Keshinihshiwanaacihcikaatek kihciootena Paapilan

¹ Miitahsh miinawaa kotak ninkii'waapamaa encal ehpioncinaashishkaatc kihcikiishikonk, tepwe e'ayaatc tipencikewin. Miitahsh kaa‑ahpiihciwaahsesitc a'a encal kii'onciwaahseyaa 'imaa ahkiink.

² Miitahsh enikohk kiihshaakowe ekii'ihkitotc: “Aasha nihshiwanaatan! nihshiwanaatan kaakihci‑inentaakwahk ootena Paapilan (Babylon). Miihsh i'imaa ishiotaawiniwak maciahcaahkwak kaye kaawiinisiwaatc ahcaahkwak, kaye kahkina pinehshiinshak i'imaa ayaawak tino kaawiinentaakosiwaatc kaye kaaminwentaakosihsikwaa.

³ Kahkina pemaatisiwaatc pepahkaanonk kaaonciiwaatc okii'minihkwaataanaawaa kaamashkawaakamininik oshoominaapoomini, mii hsa 'iweni opihshikwaaci mihsawentamowinini. Iki kihciokimaak i'imaa ahkiink kaa‑ayaawaatc okii'wiici pihshikwaatisiintaanaawaa 'iwe kihciootena. Otataawek itahsh kii'onciwenootisiwak, aaniihsh kii'onsaamiinatinini kaaonci⁠na'entamo'itisonaaniwank i'imaa ootenaank.”

⁴ Ninkii'noontaan itahsh miinawaa kotak inwewin kihcikiishikonk e'oncinoontaakwahk: “Pioncimaacaak, nimpimaatisiimak! Pioncimaacaak i'imaa kihciootenaank! Keko omacihcikewinink ishiwiitoohkaasohkek, cikakwaatakihtoohsiwek ehkakwaataki'ikotc!

⁵ Aaniihsh kii'ani‑ishpahteniwan ini omacihcikewinan piinihsh e'aniocihcihsininikin kihcikiishikonk. Kishemanitoo omihkawinotaanan kahkina kekoon kaakiihpi‑ishiwanitootaminitc.

⁶ Mayaa kaahtootawinek a'a ootena kikakiiwetipa'amawaawaa. Niishwaa (2) minihk tootawihk kahkina kekoon 'iwe kaakii'ishihciketc. I'iwe minihkwaakan kaakii'ishimina'inek, kekiinawaa niishwaa kikakiiwemina'aawaa ciminihkwetc kakwaataki'ikoowin.

⁷ I'iwe minihk kaakihci‑inakintisotc ehkashkihtamaasotc wenootisiwin kaakii'mihci na'entami'itisotc, mii 'i minihk kihcikakwaatakihtoowin, piikwentamowin kaye, tipa'amawihk! Aaniihsh mii 'iwe inenintiso: ‘Okimaahkwenk nintinap. Kaawiin niin ninkiiwaacihkwewihsii. Kaawiin wiihkaa ninkawaapantansiin piikwentamowin.’

⁸ Mii 'iwe onci kaaihkitotc, peshiko kiishik ehta ishihsek kahkina okaotihsikonan ono kakwaatakihtoowinan: nipowin, piikwentamowin, ehkawaskatenaaniwank. Wawiinkehsh taoncicaakiso ishkotenk, aaniihsh mashkawisii kaaTipenciketc Kishemanitoo kaaonaahkonaatc ini ihkwewan.”

⁹ Iki tahsh kihciokimaak ahkiink kaa‑ayaawaatc, kaakii'wiiciiwaawaatc opihshikwaatisiwininiink kaye ona'entami'itisowininiink, tamawiwak, tamoohkwentamook, ahpii waapantamowaatc e'akwaapahtek ehsahkitek i'i kihciootena.

¹⁰ Waahsa ko ehkotepinaakwahk taniipawiwak ehkohtamowaatc okakwaatakihtoowinini kewiinawaa citootawintwaa. Miihsh ehkitowaatc: “Ooy! Kakwaanihsakentaakwan! O'o kaamashkawentaakwahk kihciootena Paapilan! Peshikotipa'ikan ehta ishihse, mii aasha kakwaatakihtoowin ehtipa'amaakooyan!” otitaanaawaa 'i ootena.

¹¹ Kewiinawaa tamawiwak otataawek ahkiink kaa‑ayaawaatc, tamoohkwentamook. Kaawiin aaniihsh awiyan keyaapi ayaahsiiwan ciataamikowaatc.

¹² Kaawiin awiyan ta‑ataawehsiiwan osaawi shooniyaan, kaye waapishkishooniyaan, kaa‑aahkwakinsonitc ahsinii' kaye miikihsa' kaye e'onishihshininik waapishkiikin, kaye e'mahkatemiskwaak ishiikin kaye senipaawekin, kaye pakahkimiskwekin, kaye kahkina kaaonishihshinkin mayakaahtikoon kahkina kaye kekoon misiwekan wiipitink kaaoncioshihcikaatek, kaye e'aahkwakintek mihtikonk e'oncioshihcikaatek, kaye e'osaawaapihkowankin kaye ehpiiwaapihkowankin kaye shooshkwahsiniik,

¹³ kaye wiihkenhsh sinaman (cinnamon) kaaicikaatek takonikan, kaye ahpancikanan, kaye wiinkimaahsikan, kaye pikiw minaakwa'on mar (myrrh) kaaishinihkaatek, kaye 'i minaahsikan parenkinsenhs (frankincense) kaaishinihkaatek. Kaawiin kaye shoominaapo, kaye pimite, kaye ehpiihsipoonintc pahkweshikan, kaye pahkweshikanikihtikaan, kaye awahkaanak, maanahcaanihshak, mihtatimook, tihtipitaapaanaahkwak, kaye kaa‑awahkaasowaatc anohkii'aakanak, ampooshke kaye ininiwak opimaatisiwiniwaan. Ono kahkina kaawiin keyaapi tatashiataawaakaaniwansinoonan.

¹⁴ Miinawaahsh otataawek otinaawaan ini kihciootenawan: “Aasha ahpan kikii'nakanikonan ini kaaonishihshinkin kaakii'mihsawentaman kaawii'maawacihtooyampan, kaye kahkina kekoonan kaa‑aahkwakintekin kaye kaaminonaakwahkin. Kaawiin miina wiihkaa kikamihkansiinan.”

¹⁵ Iki otataawaakek miiwak okoweniwak i'imaa kaakii'onci⁠wenootisiwaatc i'i ootena, waahsa taniipawiwak e'ahpiihcikohtamowaatc ekaa kewiinawaa citako⁠kakwaatakihtoohsikwaa. Takakwaatakentamowak, tamoohkwentamowak

¹⁶ e'ihkitowaatc: “Ooy! Kakwaanihsakentaakwan i'iwe kaaishiwepisitc a'a kihciootena! 'Awe kaakii'ishi⁠kikishkiketc i'iwe kaaonishihshink waapishkiikin kaye e'mahkatemiskwaanik ishiikin kaye pakahkimiskwekin, kaakii'waweshi'owaaketc osaawi shooniyaan kaye e'aahkwakinsonitc ahsinii' kaye miikihsa'.

^17-18 Peshikotipa'ikan ehta ishihse e'nihshiwanaataninik kahkina owenootisiwin.” Kahkina tahsh naapihkwaaniokimaak kaye kaapoosiwaatc, kaye pimaahshiwininiwak, kaye minihk i'imaa kaakiihkashkihcikewaatc kihcikamiink, waahsa kii'niipawiwak ehkanawaapantamowaatc i'iwe e'akwaapahtek ehsahkitek i'i ootena, kaye ehshaakowewaatc: “Kaawiin wiihkaa kii'ishinaakwahsinoon ootena kaakii'ahpiihci onishihshink o'owe ootena!”

¹⁹ Kiihpihtaanohkwaane'otisowak i'i mihtaawank kaa‑ahpiihcimaanentamowaatc, ekiihkihcimawiwaatc ekiihkakwaatakihtaakosiwaatc. “Ooy!” ihkitowak, “Kakwaanihsakentaakwan i'i kihciootena kaaishiwepahk. Kahkina kihcikamiink ehpimiayaanikin onaapihkwaaniwaan kii'onciwenootisiwak i'imaa ehpiihciwenootahk i'i ootena. Peshikotipa'ikan ehta kii'ishihse kahkina kekoon ekii'nihshiwanaacihcikaatek kaakii'ayaak i'imaa ootenaank.”

²⁰ Minwentan kiin kihcikiishik! Kaye kiinawaa Kishemanitoo kaatipeniminek kaye otishinisha'waakana' kaye otipaacimook kaakanootamawek, aaniihsh aasha Kishemanitoo okiihkiiwetipa'amawaataan i'iwe ootena kaakiihtootaakoyek!

²¹ Miitahsh peshik kaamashkawentaakositc encal okii'otaahpinaan ahsiniin taapishkoo piihsipoocikanahsiniin enikohkwaapihkisinitc, kihcikamiink itahsh opahkopiiwepinaan, o'owe e'ihkitotc: “Mii 'iwe keishiwepinikaatek i'i kihciootena Paapilan. Kaawiin miinawaa wiihkaa tamihkikaatehsinoon.

²² Kiin kihciootena! I'imaa kaaishiayaayan kaawiin miina wiihkaa tanoontaakosihsiiwak iki kaamatweyaapiikipicikewaatc kaye onikamook. Pootaacikanenhs kaye kihcipootaacikan kaanoontaakohtoowaatc kaawiin miinawaa wiihkaa tanoontaakosihsiiwak. Kaawiin miinawaa wiihkaa tamihkawaahsiiwak kaanihtaaoshihcikewaatc, aaniin iko kekoon kaakiihpianohkaatamowaatc. Kaawiin miinawaa wiihkaa okatashinoontansiinaawaa enihtaakwaninik ehkishipaashkaanitc piihsipoocikanahsiniin.

²³ Kaawiin kaye wiihkaa tanaakwahsinoon waahsahkonencikan ciwaahseyaak i'imaa kaaishiayaayan. Kaawiin miinawaa tanoontaakwahsinoon ciciihkahkamikisiwaatc e'wiikihtoowaatc inini kaye ihkwe. Kitataawewininiimak nawac kii'niikaani kihciokimaawiwak ahpiihc kahkina otataawek ahkiink kaa‑ayaawaatc. Kaye kimacimamaantaawihcikewin kikii'onci wayeshi'aak kahkina kaatahswewaanakisiwaatc ininiwak 'omaa ahkiink!” kii'ihkito a'a encal.

²⁴ Mii 'iwe kii'ishinihshiwanaatan kihciootena Paapilan onci 'iwe ekii'mihkikaatek i'imaa omiskwiini Kishemanitoo otipaacimowininiima' kaye okwayahkwaatisiima', kaye omiskwiini kahkina awiya kaakiihpinihsintc ahkiink.