ᑭᑫᑕᒨᔑᐌᐎᓐ 13 - Ojibwe Kihcimasina'ikan

¹ A'awe tahsh kihciohkaatiikinepik i'imaa kii'niipawi ciikew mihtaawankaank kihcikamiink. Ninkii'waapamaa tahsh peshik pikwaciaya'aawihsh ehpiakwaasiitc kihcikamiink, e'mitaahcinitc oteshkana' kaye e'niishwaahcininikin ohtikwaanan. Entahsopeshikonitc itahsh oteshkana' mii 'imaa peshik eyaanik okimaawi pahsihkwepison. Miitahsh kaatahsininikin ohtikwaanan maciwiinsowin e'macipaahpinemintc Kishemanitoo kii'ishipii'ikaate.

Niishin pikwaciaya'aawihshak kaamayakinaakosiwaatc ehtashimintwaa

² A'a tahsh pikwaciaya'aawihsh kaawaapamak kihcipooshenhsink kii'ishinaakosi, ositink kaye taapishkoo mahkositaan, otoon kaye taapishkoo mihshipishiwitoon kii'ishinaakwanini. Ini tahsh kihciohkaatiikinepikoon okii'miinikoon tipinawe omashkawisiiwinini, okihtapiwinini kaye okihcitipencikewinini kaye.

³ Peshik itahsh i'iweni ohtikwaan a'a pikwaciaya'aawihsh pisaan iko kii'ishinaakwanini ekii'maahkihcikaatenik cioncinipotc. Miinawaa tahsh kii'minoyayaahcikaateni kekii'nihsikohpan kaakii'ishimaahkicikaniwitc ohtikwaanink. Kahkina tahsh misiwehkamik kaa‑ayaawaatc okii'maamahkaatenimaawaan ini pikwaciaya'aawihshan ehpiminisha'waawaatc.

⁴ Kahkina iki pemaatisiwaatc okii'ociciinkwaniihtawaawaan ini kihciohkaatiikinepikoon ehkihci‑inenimaawaatc, aaniihsh otipencikewinini ekii'miinaanitc ini pikwaciaya'aawihshan. Kaye wiin ini pikwaciaya'aawihshan okii'ociciinkwaniihtawaawaan e'ihkitowaatc: “Awenen eshiayaatc taapishkoo 'awe pikwaciaya'aawihsh? Awenehsh kekashkihtoohpan cimiikaanaatc?”

⁵ Kii'ishimiinaa cikakihcimotc cimacipaahpinemaatc ini Kishemanitoon. Kii'ishimiinaa kaye tipencikewin ciayaatc niimitanahshiniishin (42) tahsokiisihs.

⁶ Miitahsh e'maaciikakitotc okii'mamacitashimaan Kishemanitoon, kaye okii'mamacitashintamawaan owiinsowinini kaye otayaawinini, weti kaye kahkina kihcikiishikonk kaaotaawininitc.

⁷ Kii'miinaa kaye ciawimiikaatamawaatc Kishemanitoon opimaatisiimini kaye cishaakooci'aatc. Kii'miinaa kaye citipenimaatc kahkina pepahkaan kaa‑aayoonciinitc kaye kahkina pepahkaan kaa‑aayooncitipentaakosinitc kaye entahsopepahkaanikiishwenitc kaye kahkina kaatahswewaanakinaakosinitc.

⁸ Kahkina 'imaa ahkiink kaa‑ayaawaatc okaociciinkwaniihtawaawaan ini pikwaciaya'aawihshan. Ikiweniwak ehta kaaoshipii'ikaasowaatc pimatisiwinimasina'ikanink, kaawiin taishihcikehsiiwak. 'Awe aaniihsh Maanahcaanihshenhs kaakii'nihsintc otipentaan masina'ikan i'imaa kaaishioshipii'ikaasowaatc awenena' pishihshik kepimaatisiwaatc. Aasha kii'oshipii'waawak cipwaa oshihcikaatek ahki. Amiiwak ehta oko kaawiin okaociciinwaniihtawaahsiiwaawaan ini pikwaciaya'aawihsan.

⁹ Kiishpin awiya wenoontamaawinikwen maano okapisintaan!

¹⁰ Awenen iko enentaakositc cikaahcitinitc kehcinaac takaahcitinaa cimaaciinintc. Awenen iko enentaakositc moohkomaanink cioncinihsintc, taoncinihsaa moohkomaanink. Miihsh 'i eshiantawentaakosinitc Kishemanitoo okwayahkwaatisiima' cimashkawentaminitc kaye cikapetepwehtaminitc.

¹¹ Niwaapamaa tahsh kotak pikwaciaya'aawihsh ahkiink ehpioncimoohkiitc, e'niishinitc oteshkana' taapishkoo kaaishiteshkanenitc maanahcaanihshenhsan. Kihciohkaatiikinepikonk itahsh kii'inihtaakosi ehkiikitotc.

¹² Wa'a kotak aya'aawihsh okii'aapacihtamawaan okihcitipencikewinini ini nihtam aya'aawihshan mekwaa ehkanawaapamikotc. Okiihkashkihtoon ahkiini kaye iki ahkiink kaa‑ayaawaatc ciociciinkwaniihtawaanitc ini nihtam pikwaciaya'aawihshan ini kaakii'minoyaayaahcikaatenik onihsikoowin kaa'ishimaahkicikaniwitc.

¹³ A'a tahsh kotak pikwaciaya'aawihsh okiihtootaanan kihcimaamahkaacihcikewinan, pooshke awaac cipinaashahkiihsenik ishkote ahkiink, kiishikonk cioncihsenik, e'waapamikotc kahkina pemaatisinitc.

¹⁴ Miihsh i'i okii'onciwayeshi'aa' ini ahkiink kaa‑ayaanitc ini omaamahkaacihcikewinan ekii'aapacihtootc kaakii'miinintc citootank e'waapamikotc ini nihtam pikwaciaya'aawihshan. Okii'wiintamawaa': “Oshi'ihk manitoohkaaniwihkoocikan, cikihci‑inencikaniwitc a'a peshik pikwaciaya'aawihsh kihcimoohkomaanink kaakii'oncimaahkakanaansotc, miinawaa tahsh ehpimaatisitc,” kii'ihkito.

¹⁵ A'a tahsh kotak aya'aawihsh kii'miinaa ekiihpakitanaamonotawaatc ini oshihkoocikanan cipimaatisinitc, miiwan ini nihtam aya'aawihshan kaaishinaakosinitc oshihkoocikanan. Wa'ahsh oshihkoocikan okiihkashkihtoon cikakitotc kaye cinihsimintc awenenan iko kaawii'ociciinkwaniihtaakohsik.

¹⁶ A'awe tahsh aya'aawihsh okiihkashki'aa' kahkina awiya' cikihkinawaacihcikaniwinitc okihcinihkiniink kemaa oskahtikoniink. Kahkina awiya kiihkihkinawaaci'aa, kaa‑akaahsentaakosiwaatc kaye kaakihci‑inentaakosiwaatc, kaawenootisiwaatc kaye kaakitimaakisiwaatc, kaatipenintisowaatc kaye kaatipentaakosiwaatc.

¹⁷ Kiishpin awiya miinaahsiwintc i'iwe kihkinawaacipii'okoowin, kaawiin ta‑ataawehsii, kaawiin kaye kekoon ta‑ataawaakehsii, mii ehta awiya ishioshipii'ontc owiinsowinini ini pikwaciaya'aawihshan kemaa 'iweni otakintaahsowinini, mii 'owe owiinsowinini kaaicikaatenik.

¹⁸ Antawentaakosi awiya cikihkentamaawisitc: awenen iko a'a kaakihkentaahsotc okanioncimaamihkwentaan aaniin kaaicikaatenik 'iwe otakintaahsowinini ini pikwaciaya'aawihshan. Aaniihsh mii ecikaatek ininiiwi wiinsowin, amii 'owe e'inakintek i'i wiinsowin: ninkotwaahswaahk ninkotwaahsimitanahshininkotwaahso (666).