ᑭᑫᑕᒨᔑᐌᐎᓐ 12 - Ojibwe Kihcimasina'ikan

Ihkwe kaye kihciohkaatiikinepik ehkihkinawaasinaakosiwaatc

¹ Miitahsh kihcimaamahkaasinamowin kii'naakwan kihcikiishikonk. Kii'naakosi peshik ihkwe kaaishihkonayetc ini kiisihsoon ehkikishkawaatc, kaye anaamink ositink kii'ayaawan tipihkikiisihsoon, ohtikwaanink kaye ehpahsihkwepisotc mitaahshiniishin (12) wanankohsha'.

² Apinoonciishan okiihkikishkawaan, e'moohkwaahpinetc ewii'waapamaawahsotc.

³ Pahkaan miinawaa kekoon kiihkihkinawaasinaakwan kihcikiishikonk. I'imaa kii'ayaa maawac e'mintitotc ohkaatiikinepik e'miskositc, e'niishwaahcininikin (7) ohtikwaanan kaye e'mitaahcinitc oteshkana'. Shikwa kaatahsininikin ohtikwaanan okiihkikishkaanan ini pahsihkwepisonan.

⁴ Miihsh osoowink okii'niihsaakaapiikinaa' ini wanankohsha', kekaa aapihta kaatahshinitc kaa‑akoocininitc kiishikonk okii'onciniihsiwepinaa' ahkiink. Kii'inaahsamikaapawi tahsh ini ihkwewan ewii'waapamaawahsonitc, ahpiihsh naakosinitc ewii'amwaatc ini apinoonciishan.

⁵ Kii'naakosiwan itahsh ekii'okosihsitc a'a ihkwe, amiiwan ini piiwaapihkosahka'on ketahkonaminit keonaahkonaanitc kahkina kaatahswewaanakisinitc i'i pemaatisinitc. Kiihkesihkomanipinaa tahsh a'awe apinoonciish, ekii'ishiwinintc i'imaa Kishemanitoon kaaishiayaanitc, 'imaahsh kaye kaaishiayaanik okihciapiwinini.

⁶ A'awehsh ihkwe pikwatahkamik kii'ahpa'iwe, weti kaakii'ishi kiishaaci oshihtamaakotc Kishemanitoon i'imaa ciayaatc citashikanawenimintc, mitaahswaahk niishwaahk ninkotwaahsomitana (1,260) tahsokiishik 'imaa ciayaatc.

⁷ Mii 'i ahpii kii'maaciimiikaatinaaniwan kihcikiishikonk. A'a Mayihkal (Michael) kaye owiiciencalima' okii'awimiikaanaawaan ini kihciohkaatiikinepikoon. Kaye wiin kihciohkaatiikinepik kii'miikaaso e'wiici'ikotc otencalima'.

⁸ Kiihshaakoocihcikaniwi tahsh a'awe kihciohkaatiikinepik. Kaawiin miinawaa wiihkaa kiihtawinamawaahsii kihcikiishikonk ciayaatc, iniweniwa' kaye kaawiici'ikotc.

⁹ Wa'a kaamaawacimintitotc kihciohkaatiikinepik inkoci kii'ishiwepinaa. Mii 'awe kihcimewisha kaaonciitc kehtemacikinepikohsh, maciaya'aa, Setan (Satan) kaye kaaishinihkaanintc. Mii 'awe kaakii'wayeshimaatc awiya' misiwehkamik kaa‑ayaanitc. Ahkiink itahsh kii'ishiwepinaa, tako kaye omaciencalima' kaakii'wiiciiwikotc.

¹⁰ Miitahsh ninkii'noontaan awiya ehkihcikishiiwetc kihcikiishikonk e'ihkitotc: “Noonkom ocihcihse opimaaci'iwewin kiKishemanitoominaan kaye ehpinaakwaninik omashkawisiiwin kaye otipencikewin. Ini kaye kaakii'onaapamaatc cipimaaci'iwenitc aasha onaakohtooni okashki'ewisiwinini. Aaniihsh kii'niihsiwepinaa 'awe maciaya'aa kaakii'mamishimaatc ini kiwiiciotepwehtamoominaani'. Amii 'awe maciaya'aa kaakii'inaahsamikaapawiihtawaatc kiKishemanitoominaanin, ehkiishikaninik, ehtipihkaninik kaye ekiihkakwemamishimiwetc. Aasha tahsh kii'onciniihsiwepinaa kihcikiishikonk.

¹¹ Iki tahsh kiwiiciotepwehtamoominaanik okiihshaakooci'aawaan ini maciaya'aan. I'iwe Maanahcaanihshenhs omiskwiim kii'oncishaakoocihtwaawak, i'iweni tahsh kaye tepwewin kaakii'wiintamaakewaatc. Kaawiin aaniihsh okii'onsaamentansiinaawaan opimaatisiwiniwaan, kaawiin inkotano nipoyaank ekii'inentamowaatc.

¹² Taminwentamoomakan kihcikiishik, kaye i'imaa kaa‑ayaayek minwentamohk! Takakwaatakentaakwan itahsh i'imaa ahkiink kaye kihcikamiink, aaniihsh a'a maciaya'aa kikii'naasihkaakowaa 'imaa kaa‑ayaayek, e'ayaatc kihcinishkaatisiwin ehkihkentank acina piko ehta ciayaatc,” mii kaa'ihkitotc.

¹³ Ahpii tahsh a'awe kihciohkaatiikinepik e'waapantank ahkiink ekii'niihsiwepinintc, iniwenihsh itahsh ini ihkwewan okii'moohkiihtawaan kaakii'nihtaawiki'aanitc ini kwiiwisenhsan.

¹⁴ Kii'miinaa tahsh a'a ihkwe niishin ini mininkwiikanan kihcimikisi kaaishioninkwiikanitc, ci‑ishihsewaaketc pikwaciahkiink kaakii'ishi kwayaancihtamawintc, i'imaa ciawiayaatc nihsoyahki aapihta, miihsh weti ci‑ishikanawentaakositc citepinikohsik macikinepikohshan.

¹⁵ Okonewink itahsh a'a macikinepikohsh okii'noohsawisiihsopaanaan nipi pisaan iko siipi kaaishipimiciwank, cioncimaaciiyaapokonihpan ini ihkwewan.

¹⁶ Miihsh 'iweni ahkiini okii'wiici'ikon a'a ihkwe. Ehtawaniimakahk okii'iskantaan 'iwe nipiini macikinepikohsh okonewink kaakii'onciciwaninik.

¹⁷ A'a tahsh kihciohkaatiikinepik okiihkihcinishkenimaan ini ihkwewan. Miihsh kaa'ishi‑ishaatc e'antamiikaanaatc i'i kotak kaaontahkaanesinitc i'imaa ihkwenk, iniweniwa' kaakanawentaminitc Kishemanitoon otoonahshowewinini kaye kaakihciwinaminitc kaaishitipaacimimintc Ciisahsoon.