ᑭᑫᑕᒨᔑᐌᐎᓐ 11 - Ojibwe Kihcimasina'ikan

Iki kaaniishiwaatc otipaacimook

¹ Miitahsh ninkii'miinikoo 'i tipa'ikanaahtik, taapishkoo sahka'onaahtik e'ishinaakwahk. Shikwahsh ninkiihkanoonikoo: “Pasikwiin, awitipa'an oKihcianami'ewikamik a'a Kishemanitoo kaye 'i pakitinaahsowinaapihk i'imaa kaa‑ayaak. Ikiweniwak itahsh imaa piintik kaa‑anami'aawaatc akim.

² Iniwe tahsh kaawaahkaa'ikaatekin imaa akwaciya'ii Kihcianami'ewikamikonk, keko wiin iniwe pimentanken, keko tipa'anken. Kii'miinaawak iki tino pahkaan kaa‑ayoonciiwaatc ekaa kaa‑anami'aahsikwaa. 'Owe Ootena Kishemanitoo kaaTipentank okatataahkohkaataanaawaa niimitanahshiniishin (42) tahso kiisihs minihk.

³ Ninkamaacinisha'waak itahsh iki kaaniishiwaatc ketipaacimiwaatc. Ahsapiiwekin okapikikishkaanaawaa. Mitaahswaahk kaye niishwaahk ninkotwaahsimitana (1,260) tahso kiishik minihk okakanootamawaawaan Kishemanitoon,” kii'ihkito.

⁴ Oko kaaniishiwaatc tipaacimowininiwak, amiiwak oko ecikaasowaatc iki niishin aalip (olive) shoominaahtikook, iki kaye niishin waahsahkonencikanaahtikook imaa kaapatahkisowaatc imaa enaahsamiayaanitc ini kaaTipentaminitc 'iweni ahkiini.

⁵ Kiishpin awiyan kekoon wiihtootaakowaatc, ishkote taonciini otooniwaank citashi nihshiwanaatisinitc ini kaashiinkenimikowaatc. Amii 'owe nahke taishinihsimaawa' awenena' iko kaawii'macitootaakowaatc.

⁶ Otayaanaawaa okashki'ewisiwiniwaa cikipa'amowaatc i'i kiishik ekaa cikimiwansininik mekwaa e'anikanootamawaawaatc Kishemanitoon. Okashkihtoonaawaa kaye nipiin cikwehkihtoowaatc kaamoohkiciwanipiikowaninikin, miskwiink ci‑inaakamininikin. Okashkihtoonaawaan kaye kahkina ciotihshiwemakaninikin kekakwaataki'iwemakaninikin o'omaa ahkiink, tahswaa piko keinentamowaakwen taishihcikewak.

⁷ Miihsh 'iwe ahpii kekiishihtoowaatc otipaacimowiniwaa, mii ahpii kemiikaanikowaatc ini pikwaciaya'aawihshan kaapioncimoohkiinitc i'imaa kaaishiwiimpahkamikaak i'iwe kaamishahkiiyaahsinok. Okashaakooci'ikowaan kaye okanihsikowaan.

⁸ Ini tahsh wiiyawiwaan kaakii'nipowaatc ta‑ahteniwan mayaawihkana i'imaa kihciootenaank, i'imaa kaye kaakiitashi akwaahkosaka'ikaniwinitc ini kaaTipenimikowaatc. Mii 'owe eshikihkinawaaciwiintek i'i ootena, Swaatam (Sodom) kaye Iicip (Egypt).

⁹ Mii 'imaa nihsokiishik aapihta kahkina awiyak okashikanawaapantamawaawaa' kaakii'niponitc wiiyawini, misiwe kaaonciiwaatc pepahkaan kaaishiwiinsowaatc, kahkina kaye kaatahswewaanakinaakosiwaatc, pepahkaan kaye kaaishikiishwewaatc, mii oko kahkina okakanawaapantaanaawaan ini wiiyawimaan. Kaawiin kaye okapakitinansiinaawaa cina'ahcikaatenikin wiiyawini.

¹⁰ Iki 'imaa ahkiink kaa‑ayaawaatc tamoocikentamook ekii'niponitc o'o niishin otipaacimoo'. Tamoocikahkamikisiwak, tamemeshkwaci⁠miinitiwak kaye. O'owe taonci‑ishihcikewak, aaniihsh kii'nipowa' o'o otipaacimoo' kaakiihkihci kakwaataki'ikowaahpan.

¹¹ Nihsokiishik aapihta tahsh e'ishihsenik, kaakii'nihsintwaa oko otipaacimook, okiihpiincishkaakonaawaa pakitanaamowin Kishemanitoonk kaaonciinik ekiihkiiwepimaatisi'ikowaatc; kiihpasikwiiwak itahsh. Miitahsh kiihkihcisekisiwa' kahkina kaawaapamikowaatc.

¹² Okii'noontaanaawaa tahsh iki otipaacimook ehkihcikishiiwek inwewin kihcikiishikonk inahke ehkanoonikowaatc: “O'omaa piishaak!” Miihsh i'i kii'animaacaawak kihcikiishikonk wahkwiink, mekwaa ehkanawaapamikowaatc i'i kaashiinkenimikowaatc.

¹³ Miitahsh 'iwe ahpii e'ishihsek, wiinke kiihkihcinininkihseni ahki. Miihsh i'i ahpii entahsomitaahcinkin waahkaa'ikanan i'imaa ehkihciootenawank peshik kii'nihshiwanaatan. Niishwaahcink mitaahswaahk (7,000) itahsh kiihtahshiwak kaakii'nihshiwanaatisiwaatc ehkihcinininkihsenik ahki. Kotak itahsh kaa'ishko'intwaa kiihkihcisekisiwak kaye okiihkihtakimaawaan Kishemanitoon kihcikiishikonk kaa‑ayaanitc.

¹⁴ Mii 'iwe niishink aasha 'owe ekiihpoonihsek ocaanimisiwin kaakakwaanihsakentaakwahk. Nashke hsa! Keyaapi peshik kekakwaanihsakentaakwahk ocaanimisiwin kitaahtap iko taishihse, mii'i nihsink (3) ci‑ishihsek.

Kotak encal ehpootaaciketc, mii niishwaahso

¹⁵ Miinawaa kotak encal okii'noontaakohtoon opootaacikan, mii niishwaahso encalak ekiihpootaacikewaatc. Miihsh ehkihci‑inihtaakwahkin inwewinan kihcikiishikonk, o'owe e'ihkitowaatc e'maamawihtaakosiwaatc: “Kii'miinaa i'i ahki ciokimaahkantank a'a kaaTipeniminank kaye ini kaakii'onaapamaatc cipimaaci'iwenitc. Wiin iko ahpan iko mooshak pishihshik tatipencike.”

¹⁶ Ikiweniwak niishtanahshiniiwin (24) oniikaanisiik, miiwak iki okihciapiwiniwaank kaainaahsamapiihtawaawaatc Kishemanitoon, kii'animihkopani'owak enaahsamapinitc, ehkihci‑inenimaawaatc Kishemanitoon,

¹⁷ o'owe e'inaawaatc: “Miikwehc kitikoo kiin Tepencikeyan, Kishemanitoo Miyaamawi Mashkawisiiyan, kiin o'omaa noonkom kaa‑ayaayan, mewisha ko kaye kaapionciayaayan, miikwehc e'maaciiaapacihtooyan kikihcimashkawisiiwin e'maaciitipencikeyan!

¹⁸ Kaatahswewaanakisiwaatc ikiweniwak kaakihkenimihsinohkwaa kii'oncikihcinishkaatisiwak, e'ocihcihsek kinishkaatisiwin cipitakohshinoomakahk, iki tahsh kaye kaanipowaatc citipaahkonintwaa. Aasha ocihcihse citipa'amawatwaa kitanohkii'aakanak kaakiihkanootamawihkwaa, iki kaye kahkina kaakwayahkopimaatisiwaatc kaatipenimatwaa, iki kaye kaakihci‑inentamowaatc kiwiinsowin, kaakihci‑inentaakosiwaatc, iki kaye pankii enentaakosiwaatc, kahkina tamiinaawak. Mii 'o ahpii e'ocihcihsek cinihshiwanaaci'intwaa iki kaanihshiwanaacihtoowaatc i'i ahki,” ihkitowak oniikaanisiik.

¹⁹ Kiihpaahkinikaateni tahsh Kishemanitoo okihcianami'ewikamik kihcikiishikonk kaa‑ayaanik. I'imaahsh kii'naakwanini anami'emahkahk kaaishipiintenik ahshotamaatiwin Kishemanitoo kaakii'miinaatc opimaatisiima'. Kii'oncii 'imaa e'waawaahtehsek, kiihpapiitihkowe tahsh kaye, pinehsiwak kaye kii'noontaakosiwak. Ahki kaye kii'nininkihse, wiinke kaye kiihkihcisehsekan.