ᑭᑫᑕᒨᔑᐌᐎᓐ 1 - Ojibwe Kihcimasina'ikan

¹ Okihkentamooshiwewin Ciisahs Christ Kishemanitoon kaakii'miinikotc ciwaapanta'aatc otanohkii'aakana' wiipa keni‑ishiwepaninik. Otencaliman okiihpinaashinisha'waan ekiihkihkentamoonaanitc otanohkii'aakanan Cwaanan (John).

² Shikwa Cwaan okiihtipaatotaanan kahkina ini kaakii'waapantank, mii 'oweni otihkitowinini Kishemanitoon kaye otepwewinini Ciisahs Christan kaakiihkihkentamooshiwenitc.

³ Shawentaakosi a'a keanamihtamaaketc o'o masina'ikan kaye kaapisintamowaatc ono ihkitowinan Kishemanitoo kaaishikanootamawintc, iki kaye kaakanawentamowaatc omaa kaaoshipii'ikaatenikin. Aaniihsh pehsho aasha cianiocihcihsenik.

Ehpooshoo'intwaa kaaniishwaahswewaanakisiwaatc otepwehtamook

⁴ Niin Cwaan nintooshipii'amawaak iki otepwehtamook imaa kaatashimaamaawaci'itiwaatc e'niishwaahcinkin (7) ootenawan Eshaawahkiink (Asia). Shawenimikoowin kaye pisaanentamowin kikaonciihtamaakowaa a'a Kishemanitoo omaa noonkom kaa‑ayaatc kaye mewisha kaapionciayaatc kaye kaawiihpiayaatc, kaye ikiweniwak niishwaahso Ahcaahkwak kaainaahsamikaapawiwaatc Kishemanitoo okihtapiwinink,

⁵ Ciisahs Christ kaye kaaKwayahkwentaakositc Otipaacimo, a'awe nihtam kaa'nihtaawikitc Kishemanitoonaank, kaakiihkiiwepimaatisitc, kaatipenimaatc kihciokimaa' ahkiink kaa‑ayaanitc. Kisaaki'ikonaan hsa, omiskwiimink kaye kikii'onciaapa'okonaan cipoonitipenimikoyank kimacitootamowininaanin kaakiihpitootamank.

⁶ Kikii'ishi'ikonaan itahsh citinowiyank citipenimiweyank, citashikihcianami'ewikimaawiyank, cianohkiihtawimank oKishemanitooman Kaaoyoohsimaatc. Wiin oka‑ayaan kihci‑inentaakosiwin kaye tipencikewin pishihshik iko ahpane. Emen.

⁷ Inashke tapinaakosi wahkwiink! Kahkina tahsh awiya okawaapamaawaan, impooshke kaye iki kaakiihpashipa'waawaatc. Kahkina tahsh kaatahswewaanakisitc ahkiink taoncimawiwak ahpii waapamaawaatc. Amii hsa ko taishiwepan. Emen.

⁸ Niin a'awe nihtam kaakii'ayaatc miinawaa ishkwaac keayaatc, ihkito kaaTipenciketc Kishemanitoo maawac kaamashkawentaakositc. Mii a'awe noonkom kaa‑ayaatc kaye otaanaank kaakii'ayaatc, kaye kepiayaatc.

Cwaan ekii'waapamaatc Christan

⁹ Niin Cwaan (John) kiicihkiwensiwaa keniin e'wiiciiwak Ciisahs, kiwiiciiwininim e'ishishashiipentamek kimikoshkaaci'ikoowiniwaank, i'iwe ocaanimisiwin i'imaa kaaonciimakahk e'ayaak otipencikewinink Ciisahs. Ninkii'nakanikoo 'imaa minihsink Paatimahs (Patmos) kaaishinihkaatek. Ninkii'onciahsikoo ekii'wiintamaakeyaan Kishemanitoo otihkitowin kaye otepwewin Ciisahs.

¹⁰ Ahpii ehkiishikahk kaaTipenciketc oKiishikaam kaaishiwiintek ninkii'wiiciiwimik ini Kishemanitoo otAhcaahkwan. Ninkii'noontaan itahsh ehkihcikishiiwek inwewin taapishkoo kihcipootaacikanink, weti nimpihkwanink awiya ehkanooshitc.

¹¹ Mii 'owe eshitc: “I'iwe kaawaapantaman mii 'iwe oshipii'an masina'ikanink. Mii 'imaa ishinisha'amaw iki otepwehtamook i'imaa kaatashimaamaawaci'itiwaatc e'niishwaahcinkin (7) ootenawan. Miiwan ono ootenawan: Ehpihsahs (Ephesus), Simirna (Smyrna), Parkamam (Pergamum), Tayahtaira (Thyatira), Saartihs (Sardis), Pilatelhpiya (Philadelphia), Leyaatihsiiya (Laodicea).”

¹² Miitahsh ninkiihkwehkikaapaw ewii'waapamak awenen otinwewin kaakanooshitc. Ninkii'waapantaanan itahsh niishwaahso waahsahkonencikanaahtikoon e'osaawi shooniyaawankin.

¹³ Mekweya'ii 'imaa waahsahkonencikanaahtikonk awiya ninkii'waapamaa taapishkoo pemaatisitc, ehkikishkank kihcimakoot ositink e'ahkwekaninik, miinawaa ehkihcihpisotc ohkaahkikanehpison e'osaawi shooniyaawinaakwaninik.

¹⁴ Ohtikwaanink itahsh wiinisihsan kii'waapishkaaniwan taapishkoo maanahcaanihshipiiwayink; taapishkoo koon kaawaapishkisitc kii'ahpiihciwaapishkaaniwan. Kii'waahsiteniwan itahsh ini oshkiinshikoon taapishkoo kaa‑ahpiihciwaahsitek ishkote.

¹⁵ Ositan itahsh kaye taapishkoo osaawaapihk ekiihpehkaapihkitek kaye wiinke ehshooshkwaapihkahk kii'ishinaakwaniniwan. Mii kaye kaa'inihtaakositc taapishkoo kaamatweciwank kihcipaawihtik.

¹⁶ Okihcinihkink itahsh kii'apiwa' niishwaahso wanankohsha'. Amiihsh miinawaa otoonink kii'oncihseni kaaiitawikaahshaanik kihcimoohkomaan. Miihsh kaye eshinaakwaninik owatenk taapishkoo kiisihs kaa‑ahpiihciwaahseyaahsiketc kii'ishinaakwanini.

¹⁷ Ahpii e'waapamak ninkiihkawipani'owaan ositink. Taapishkoo awiya e'nipotc ninkii'ishinaakos. Ninkiihtaankinik itahsh okihcinihkink, ekii'ishitc: “Keko sekisihken! Niin a'a Nihtam Kaakii'ayaatc kaye piinihsh Ishkwaac Keayaatc.

¹⁸ Niin a'a KaaPimaatisitc. Ninkii'nip, miinawaahsh nimpimaatis, kaye nehpic pishihshik ninkapimaatis. Niin ninteinentaakos citipentamaan nipowin kaye iki i'imaa kaanipowaatc kaaishiayaawaatc.

¹⁹ Oshipii'an itahsh ini kaawaapantaman, miiwan iniweniwan noonkom kaa‑ayaakin kaye niikaan weti keni‑ishihsek.

²⁰ Kikihkentamoonin 'iwe enentaakosiwaatc oko niishwaahso (7) wanankohshak kaakii'waapamatwaa ninkihcinihkink e'apiwaatc, kaye ini niishwaahso osaawi shooniyaawi waahsahkonencikanaahtikoon, i'iwe kaakaacikaatek. Oko niishwaahso wanankohshak, miiwa' otencalimiwaa' otepwehtamook kaatashimaawacianami'aawaatc kaaniishwaahcinkin ootenawan. Ini kaye niishwaahso waahsahkonencikanaahtikoon, miiwak iki otepwehtamook e'niishwaahcinkin pepahkaan kaaishimaamaawaci'itiwaatc.”