ᑲᑮᑖᐎᑮᔗᐎᓇᓐ 8 - Ojibwe Kihcimasina'ikan

Ekihci inencikaatek Kakiihtaawentamowin

¹ Antohtamok, kakiihtaawentamowin ohsha antomiwemakan! Nihsitohtamowin ohsha kaye kiikitoomakan.

² I'imaa hsa ishi niipawimakan kaashi papiihkwatinaak caciikihkanaank, kaashi maamataamiimohkin miihkanawan kaye.

³ I'imaa kaye kaashi ishkwaantemiwaninik kihci ootenaank kaa⁠onci piintikewintc ishi niipawimakan o'o e⁠ihkitoomakahk,

⁴ “Kikanoonininim kiinawaa kaa⁠ininiiwiyek, kahkina hsa ko pemaatisiyek kinantomininim.

⁵ Kiinawaa hsa kaa⁠eshaawaatisihsiwek taka kakwe ontinamok kakiihtaawentamowin, kiinawaa kaye kaa⁠kakiipaatisiyek taka kakwe ontinamok nihsitohtamowin.

⁶ Pisintawihshik, kekoon aaniihsh ahpiihtentaakwan kaa'ininakook, kwayahkwentaakwan kaye kaa'ininakook.

⁷ Kaa'ininakook ohsha tepwewiniwan; nishiinkentaanan iitok wiin kiiwanimowinan.

⁸ Kahkina hsa kaa'ininakook tepwemakanoon, kaawiin awaac iko wawaanentaakwahsinoonan, kaawiin kaye waniwishiwemakahsinoonan.

⁹ Iki hsa kaa⁠onihsitohtamowiniwaatc wiinke okwayahkwentaanaawaa ehkitowak, iki hsa kaa⁠okihkentamaawiniwaatc wiin opehtentaanaawaa.

¹⁰ Otaahpinan kaashi kihkino'amaakeyaan ahpiihc wiin a'a waapaapihko shooniyaa waapihk, kihkentamaawin kaye onentan ahpiihc wiin a'a osaawi shooniyaa waapihk.”

¹¹ “Kakiihtaawentamowin ohsha nawac kihci inakinte ahpiihc wiin a'a miskwaapihkahsin Oroopi (Ruby) kaa'inintc, kaawiin tahsh kekoon kaa⁠mihsawentaman i'i ahpiihtentaakwahsinoon.

¹² Niin ohsha kakiihtaawentamowin, nintayaan nihsitawentamowin, nintayaan kaye kihkentamaawin, kaa⁠onci nihsitawinikaatek kekoon kaa⁠onishihshik, kaa⁠maanaatahk kaye.

¹³ Kii⁠kohtaanenimintc ohsha kaaTipenciketc mii 'i eh⁠shiinkencikaatek macikekoon; miiwan hsa ono kaa⁠shiinkentamaan: ishpenintisowin, kihci inenintisowin, maci'ishiwepisiwin, noociko ihkitowin kaye.

¹⁴ Niin hsa nintipentaan weweni awiyak kaashi kanoonintwaa aaniin ke⁠ishihcikewaatc, kwayahk kaye inaahkonikewin, nintayaan kaye nihsitohtamowin, mashkawisiiwin kaye.

¹⁵ Niin ohsha kihciokimaak kaa⁠onci okimaahkantaakewaatc, iki kaye tepenimiwewaatc kwayahk kaa⁠onci inahtoowaatc inaahkonikewinan.

¹⁶ Niin kaye kaa⁠onci kashkihtoowaatc ci⁠tipencikewaatc o'omaa ahkiink iki kaa⁠okimaawiwaatc, iki kaye kaani aanihkewikimaawiwaatc.

¹⁷ Nisaaki'aak hsa iki kaa⁠saaki'iwaatc, iki kaye wenini kaa⁠nanaantone'owaatc ninka mihkaakook.

¹⁸ Nintayaanan hsa wenootisiwinan, kihtentaakosi'iwewin kaye ke⁠miikiweyaan, kaa⁠poonihsehsinok kaye wenootisiwin, i'i kaye minohsewin.

¹⁹ I'i hsa ke⁠miininaan nawac onishihshin ahpiihc wiin a'a kaa⁠onishihshitc osaawi shooniyaa waapihk, a'a kaye kaa⁠maawaci minonaakositc waapaapihko shooniyaa waapihk.

²⁰ Kwayahkwaatisiwinink hsa nintishi pimaatis, weweni kaye nimpiminisha'aan i'i inaahkonikewin.

²¹ Nimiinaak kaye iki kaa⁠saaki'iwaatc ci⁠wenootisiwaatc, wenooci kekoonan kaye ninka mamooshkinahtaawaanan owaahkaa'ikaniwaank.”

²² “Miitahsh eni ihkitoomakahk kakiihtaawentamowin, kaaTipenciketc ohsha niin maawac nihtam ninkii oshi'ik mewisha cipwaa ayaanikin otishi maaciiwinan.

²³ Weti hsa nehpic otaanaank kihci mewisha aasha niin ninkii onahsikoo, niin maawac iko nihtam cipwaa ayaak ahki.

²⁴ Cipwaa ayaakin kihcikamiin, cipwaa pimiciwankin kaye moohkiciwanipiin aasha niin ninkii ayaa.

²⁵ Cipwaa onahcikaatekin kihci waciin, kaa⁠papiihkwatinaakin kaye aasha niin ninkii ayaa.

²⁶ Kishemanitoo kaye cipwaa oshihtootc ahkiini, kaashi papashkwaanik kaye, cipwaa ayaanik kaye kaa⁠paashkinehkamikihsenik, aasha niin ninkii ayaa.

²⁷ Aasha niin ninkii ayaa kii⁠onahtootc kiishikooni weti ishpimink, kii⁠kihkinawaacihtootc kaye ke⁠ahko tepinaakwaninik weti nahke kihcikamiink.

²⁸ Kii⁠onakootootc kaye wahkwiin ishpimink, kii⁠oshihsitootc kaye ke⁠onciciwaninik nipiini aasha niin ninkii ayaa.

²⁹ Ahpii hsa kaye kiih⁠kanootank kihcikam aaniin minihk ke⁠ahkonipiihkaanik, kii⁠onahtootc kaye ahkiini kaashi ahtenik aasha niin ninkii ayaa i'i ahpii.

³⁰ Niin hsa kaye ninkii wiiciiwaa ekii wiici'ak kii⁠onaapantank ke⁠ishihtootc ahkiini. Kii⁠minwentam hsa entahso kiishik, mooshak iko ekiih ciihkentamowak ekii ayaawak eshi'ayaatc.

³¹ Ninkii minwaapantaan o'o ahki, ekii minwaapamakwaa kaye pemaatisiwaatc o'omaa ahkiink.”

³² “Ninkosihsak, taka tahsh noonkom pisintawihshik; aahpici hsa ta⁠shawentaakosiwak iki kaa⁠tootamowaatc kaashi antawentamowak.

³³ Pisintamok kaashi kihkino'amawinakook, kakiihtaawentamok kaye, keko aanawentankek.

³⁴ Aahpici hsa ta⁠shawentaakosi a'a kaa⁠pisintawitc; kaa⁠nihtaa ayaatc nintishkwaantemink, kaa⁠pii'otc kaye enishi piintikenk niwaahkaa'ikanink.

³⁵ Awenen hsa piko ke⁠mihkawitc omihkaan ke⁠onci pimaatisitc, kaaTipencikenitc hsa kaye oka minwaapamikoon.

³⁶ Awenen tahsh iko kaa⁠mihkawihsik, mii hsa awe kaa⁠wiihsakentamo'itisotc; awenen tahsh iko kaa⁠shiinkenimitc, mii hsa awe kaa⁠saakihtootc nipowin!” ihkitoomakan kakiihtaawentamowin.