ᑲᑮᑖᐎᑮᔗᐎᓇᓐ 6 - Ojibwe Kihcimasina'ikan

Ayaankwaamimikoowinan

¹ Ninkosihs, kikii ahshotamaake na kiin ewiih tipa'amowatc pahkaan awiya omasina'ikewinan?

² Kikii onci kahcitinikoo na kiin iko kitihkitowinan, kiin iko ekii onci tahsoonikooyan ini kitahshotamaakewinan?

³ Ninkosihs, miitahsh i'i ke⁠onci tipenimihk a'a inini, o'o hsa ishihciken ke⁠onci kashki'oyan, weyiipisin anta kakwe kashkim ci⁠pakitinihk.

⁴ Keko ahkawe nipaahken, keko kaye kipihciihken ci⁠ahtehshinan.

⁵ Kakwe kashkihtoon ci⁠kashki'oyan, taapishkoo pinehshiinsh shikwa waawaashkeshi kaa⁠maaciipa'iwaanaatc ini entawencikenitc.

⁶ Kehtimishkiyan, inashke enikoo anta waapam; kihkinawaapam ci⁠kakiihtaawentaman.

⁷ Kaawiin iitok otookimaamihsii, kaawiin kaye awiyan ci⁠kanawaapamikotc, kaawiin kaye awiyan ci⁠tipenimikotc.

⁸ Shaakooc itahsh e⁠niipininik omaawantoonaan miicim eh⁠kwayaancihsitootc ke⁠miicitc pipooninik.

⁹ Aaniin itahsh minihk weti waah⁠pimihshinan, kehtimishkiyan? Aanahpii waah⁠koshkosiyan i'i kaa⁠nipaayan?

¹⁰ Miihsh o'o ehkitotc, “Acina hsa ehta ninka nanipaa. Ninka nanaponihken ci⁠anwepiyaan.”

¹¹ Mekwaa tahsh nanipaatc, mii 'i ci⁠otihsikotc kitimaakisiwin ci‑inentaakwaninik taapishkoo inahke kaashi otihshiwetc okimoocishk.

¹² Ikiweniwak kekoon kaa⁠inaapatisihsikwaa kaa⁠macaatisiwaatc e⁠papaakiiwanimowaatc.

¹³ E⁠kashkaapipani'owaatc, ewawaahkawisiteniwaatc, oninciiwaan e⁠inoo'ikaakewaatc i'i ke⁠onci wayeshimihkwaa,

¹⁴ i'imaa eshi nanaakatawentamowaatc ke⁠onci macitootawihkwaa kaye e⁠papaa mikoshkaacihcikewaatc.

¹⁵ Miitahsh sesakooc ke⁠onci otihsikowaatc wahsitaawihsewin ke⁠nihshiwanaaci'ikowaatc.

¹⁶ Niishwaahcininiwan hsa kaaTipenciketc kaa⁠shiinkentank, kekwaanihsakentank kaye. Miiwan hsa ono:

¹⁷ kihci inenintisowin, kakiinawishkiwin, i'i kaye nehsaanitc kekoon kaa⁠ishihcikehsinik,

¹⁸ awiyan kaye kaa⁠inentaminitc noociko ewii ishihcikenitc, kaa⁠kitaahtapi'naasihkaminitc kaye macikekoon,

¹⁹ awiyan kaye noociko kaa⁠inaacimonitc, ini kaye ininiwan kaa⁠ompwenaminitc ke⁠onci maanshi wiiciintinitc wiicihkiweyimaa'.

Pihshikwaatisiwin Ehtashintek Ci'ishihcikaaniwansinok

²⁰ Ninkosihs, ishihciken kitete kaa⁠ishi wiintamawihk, keko waniihkehken kimaamaa kaakii ishi kihkino'amawihk.

²¹ Kihciwinamow otihkitowiniwaan ahpane piko i'imaa kite'ink.

²² Okihkino'amaakewiniwaan kika wiici'ikonan kii pimi'ayaayan, kika kanawenimikon kii⁠tipihkaak, kika kihkinowinikon kaye kii⁠kiishikaak.

²³ Okihkino'ikewiniwaan taapishkoo kekoon kaa⁠waasahkonek, kaa⁠ishi kwayahkomihkwaa kika kihkino'amaakon ke⁠ishi pimaatisiyan.

²⁴ Miiwan itahsh ini ke⁠miitaakwenikoyan ci⁠naasihkawaahsiwatc maci ihkwe, wiiwimaa tino kaa⁠nakaci wayeshimiwetc.

²⁵ Keko kika ishi mihsawentamo'ikohsii kaa⁠ishi minonaakosiwaatc; keko i'imaa kika onci tahsoosohsii kaa⁠ishi kanawaapamihkwaa.

²⁶ Inini otaa onci wiiciiwaan pihshikwaacihkwen i'i kaa⁠inakinsotc peshikwaahtik pahkweshikanan, ini tahsh wiin wiiciiwaatc kaa⁠onaapeminitc pihshikwaacihkwen oka onci caakinike'ikoon kahkina kekoon kaa‑ayaatc.

²⁷ Kitaa pimiwitoon ina ishkote kikaahkikanink ci⁠caakitehsinok kekishkaman?

²⁸ Kitaa pimohse na eshikishaanshek ci⁠caakitehsinokin kisitan?

²⁹ Mii peshikwan ehpiihci naniisaanentaakwahk wihpemimatc awiya wiiwan. Awiya kaa⁠tootank o'o ta⁠onci kakwaatakihse.

³⁰ Kaawiin ta‑aanwaapamaahsii a'a kaa⁠kiimootitc pahkweshikanan kii⁠noonteskatetc.

³¹ Kiishpin kaahcitinikaniwitc ci⁠kiiwe tipa'iketc niishwaahcink minihk, mihsawaa ko wiinke kahkina caakiniketc.

³² A'a inini kaa⁠tootank pihshikwaatisiwin kaawiin naakatawentansii, mii ko'i e⁠nihshiwanaaci'itisotc.

³³ Wiinke ta‑aanwaapancikaniwi, ta⁠kihci niiwanawaakaniwi kaye ci⁠nehpici menihshii'aakaniwitc.

³⁴ A'a onaapemimaa kaa⁠ontentank aahpici aahkokitaaso, i'iwe kaawiih tootank kaawiin ta⁠onci tepinawesihsii kiiwi kiiwe tipa'iketc.

³⁵ Kaawiin otaa otaahpinasiin aaniin iko minihk tipa'amawaakaniwitc, kaawiin kaye otaa otaahpinasiin wekonen iko ke⁠miinaakaniwitc ci⁠onci poonikitaasotc.