ᑲᑮᑖᐎᑮᔗᐎᓇᓐ 4 - Ojibwe Kihcimasina'ikan

Eshiwiici'iwemakahk Kakiihtaawentamowin

¹ Ninkosihsak, pisintamok aaniin eshi kihkino'amawinek kitetewaa. Weweni pisintamok, miihsh ci⁠tepinamek nihsitohtamowin.

² Onishihshin ohsha eshi kihkino'amawinakook, kanawi maamihkawik eshi kihkino'amawinakook.

³ Mekwaa tahsh niin eh⁠kwiiwisenhsiwiyaan nintete otaawinink, niin ehta nimaamaa ekii ayaawitc,

⁴ nintete hsa ninkii kihkino'amaak ekii ihkitotc, “Kanawi maamihkawin kahkina kaashi kakanooninaan, kanawentan eninaan ci⁠onci pimaatisiyan.

⁵ Tepinan kakiihtaawentamowin, nihsitohtamowin kaye. Keko nakatanken kaashi kakanooninaan, keko kaye pahkenotanken.

⁶ Keko tahsh nakatanken kakiihtaawentamowin, kika naatamaakon ohsha. Saakihtoon, weweni tahsh kika naanaakaci'ikon.

⁷ Kakiihtaawentamowin ohsha maawac kihci inentaakwan, miihsh wenci ininaan ci⁠tepinaman kakiihtaawentamowin. Mihsawaa ko kahkina kekoon eh⁠tepinaman, shaakooc itahsh tepinan kakiihtaawentamowin.

⁸ Kihci inentan ci⁠minciminaman kakiihtaawentamowin, miitahsh i'imaa ke⁠onci kihtentaakosiyan.

⁹ Miitahsh i'imaa kakiihtaawentamowinink ke⁠onci minonaakosiyan, ci⁠miinikoowisiyan okimaawaanohkwaan ke⁠minonaakoshkaakoyan.”

¹⁰ Ninkosihs, weweni pisintawihshin kaashi kakanooninaan, kinwesh itahsh kika pimaatis.

¹¹ Kikihkino'amawin ci⁠kakiihtaawentaman, e⁠ishi kihkinowininaan kwayahk cishi pimaatisiyan.

¹² Kaawiin itahsh kekoon kika kipishkaakohsiin pimohseyan, kaawiin kaye kika pisokehshinsii pimipahtooyan.

¹³ Minciminan eshi kihkino'amaakooyan, keko pakitinanken, kanawentan, mii iitok i'i kipimaatisiwin.

¹⁴ Keko wiin ishaahken eshaawaatc omacaatisiik, keko ishihcikehken aaniin eshihcikewaatc.

¹⁵ Keko i'i ishihcikehken, nakaayentan macikekoon, keko i'imaa ishi pimohsehken.

¹⁶ Kaawiin okashkihtoohsiinaawaa ci⁠nipaawaatc, paanimaa kii‑ishkwaa macitootamowaatc. Kaawiin oncita nipaahsiiwak e⁠ahkawaahtoowaatc ewii maanshitootawaawaatc awiya'.

¹⁷ Pahkweshikanink ihsa otinentaanaawaa maci'ishiwepisiwin kaye minihkwewinink otinentaanaawaa ahkwaatisiwin.

¹⁸ I'i hsa miihkana pema'atoowaatc okwayahkwaatisiik mii 'i eshinaakwaninik taapishkoo kaa⁠piitaapank, e⁠ani waahseyaak, piinihsh e⁠ani mooshkine kiishikahk.

¹⁹ I'iweni tahsh wiin miihkana pema'atoowaatc omacaatisiik, mii 'i eshinaakwaninik e⁠kashkiitipihkaninik. Kaawiin itahsh okihkentansiinaawaan wekonen wenci pisokehshinowaatc.

²⁰ Ninkosihs, pisintan aaniin eshi kakanooninaan; weweni piko noontan ehkitoyaan.

²¹ Keko pakitentanken kaa⁠ininaan, kite'ink ishi kanawentan.

²² Mii hsa imaa wentinamowaatc pimaatisiwin iki kaa⁠mihkamowaatc. Mii kaye imaa wenciimakahk mino'ayaawin.

²³ Maawac itahsh kite'ink ishi ayaankwaamisin, mii iitok i'imaa wenciik pimaatisiwin.

²⁴ Wepinan noociko ishikiishwewinan, keko aapacihtoohken kaa⁠tepwemakahsinokin.

²⁵ Niikaanaya'ii kwayahk inahke inaapin, keko acitawihkwenihken ci⁠akaciyan.

²⁶ Eshi tahtakwaak miihkanaank ishi pimohsen, ini ehta miihkanawan kaa⁠onamokin kika pimohsaataanan.

²⁷ Keko awaac pankii ayiitaweya'ii ishi pahkehken. Keko ishaahken eshi macitootamonaaniwank.