ᑲᑮᑖᐎᑮᔗᐎᓇᓐ 23 - Ojibwe Kihcimasina'ikan

⁴ Keko caakii'itisohken ci⁠kakwe wenootisiyan; siiyaaken iko kakiihtaawentan ci⁠manaa onsosaamentaman.

⁵ Ahpii hsa kaahcitaapantaman wenootisiwin, mii 'i kaawiin ta⁠kihkentaakwahsinoon, mii hsa eshinaakwahk wenootisiwin e⁠oninkwiikaniimakahk, taapishkoo mikisi ishpimink inahke kaashi maacihsetc.

¹⁰ Keko wiin aantahkitoohken kehte kihkinawaacihcikan eshi tipa'ahkaatek ahki, keko kaye otaahpinanken kwiiwahshishaanak otahkiimiwaan;

¹¹ mashkawisiiwan iitok kaa⁠naatamaakowaatc; miiwan hsa ini ke⁠nanakinamaakowaatc.

¹⁹ Ninkosihs, pisintan, kakiihtaawentan kite'ink ishi kanawenintison kwayahk inahke ci‑ishaayan.

²⁰ Keko wiiciiwaahken iki niipiwa' nehtaa minihkwewaatc shoominaapooni, komaa niipiwa' kaa⁠nihtaa wiihsiniwaatc.

²¹ Kaa⁠kiiwashkwepiishkiwaatc hsa, okaashakek kaye tani kitimaakihsewak, noontenkwahshiwinink itahsh ta⁠onci koohpaacihkonayewak.

²² Na'ihtaw kitete kaakii nihtaawiki'ihk, keko tahsh kaye aanawenimaahken kimaamaa ahpii kihci aya'aawitc.

²³ Te'ahpiihtentaakwan hsa tepwewin, kakiihtaawentamowin, kihkino'amaakoowin, nihsitohtamowin kaye cikii ataawenaaniwankipan, keko tahsh ataawaakehken.

²⁴ Kweyahkwaatisitc hsa oteten ta⁠minwentamoon, a'a hsa kaye eyaawaatc kekiihtaawentaminitc okosihsan oka ciihki'ikoon.

²⁵ Taka kitete, kimaamaa kaye ta⁠minwentamook, taka kaye kimaamaa ta⁠onci minwentam kekii nihtaawiki'ihk.

²⁹ Awenen hsa kaa⁠koohpaasinaakositc? Awenen kaye kaa⁠maanentank? Awenen kaye kaa⁠maamiikaasotc? Awenen kaye kaa⁠nihtaa kihci kaakiikitotc? Awenen hsa ishi anihshaa kaa⁠pihcihshimoonotc? Awenen kaye memiskocaapitc?

³⁰ Miiwak hsa iki kaa⁠noocihtoowaatc shoominaapo, iki kaa‑anta kocihpitamowaatc kii⁠takwaakaminikaatenik shoominaapo.

³¹ Keko hsa kanawaapantanken shoominaapo kii⁠miskwaakamink, kii⁠saasaakaahteyaakamisek kaye minihkwaakanink, ahpii kaye kii⁠wentahk eh⁠kwancikaatek.

³² Weti tahsh ishkwaac mii 'i enentaakwahk eh⁠maakwamiwemakahk taapishkoo kinepik kaashi maakwamiwetc, ewiihsakentaakwahk taapishkoo kaashi ciihsowetc kaa⁠pihcipooshiwetc kinepik.