ᑲᑮᑖᐎᑮᔗᐎᓇᓐ 15 - Ojibwe Kihcimasina'ikan

Ishikiishwewinan Ehtashintekin

¹ Weweni awiya kii⁠nahkwehtawintc mii 'i eshi poonikitaasotc, awiya tahsh wiin kii⁠manaasomaahsiwintc mii 'i eshi ompwenikaatek nishkaatisiwin.

² Kaa⁠kakiihtaawentamowaatc hsa kiih⁠kiikitowaatc wiinke ominohsitoonaawaa kihkentamaawin, iki tahsh kaa⁠kakiipaatisiwaatc niipiwa' anoociko ishikiishwewak.

³ KaaTipenciketc ohsha misiwe ayiinaapi, eh⁠kanawaapantank maci kekoon, mino kekoon kaye.

⁴ Maminokiishwewinan hsa mii 'i enentaakwahkin taapishkoo mihtik kaa⁠pimaatisiwiniwitc, ini tahsh wiin mamaanshikiishwewin mii 'imaa wenci wiihsakaahpinanintc ahcaahk.

⁵ Aahpici ohsha kakiipaasinaakwan ci⁠aanawentamowatc kitete kaa⁠ishi kihkino'amawihk; aahpici tahsh wiin kakiihtaawinaakwanini awiya kaa⁠na'ihtank oteten kaashi maamiinomikotc.

⁶ Kihci wenootisiwinan hsa mooshkineniwan owaahkaa'ikanink a'a kaa⁠kwayahkwaatisitc, a'a tahsh wiin kaa⁠maci'ishiwepisitc maanshihsewin ehta kashkihtamaaso.

⁷ Kaa⁠ihkitowaatc hsa okakiihtaawentamook mii 'imaa wenci misihteshkaanik kihkentamaawin, kaawiin tahsh i'i ishihcikehsiiwak kaa⁠kakiipaatisiwaatc.

⁸ KaaTipenciketc hsa ominwaapantaan kii⁠anami'ehtaakotc kaa⁠kwayahkwaatisinitc, wiinke tahsh oshiinkentaanan pakitinaahsowinan kaa⁠piitamaakotc i'i kaa⁠maci'ishiwepisinitc.

⁹ KaaTipenciketc kaye oshiinkentaan kaa⁠ishihtwaanitc kaa⁠maci'ishiwepisinitc; osaaki'aa' itahsh wiin i'i kaa⁠piminisha'aminitc kwayahkwaatisiwin.