ᑲᑮᑖᐎᑮᔗᐎᓇᓐ 13 - Ojibwe Kihcimasina'ikan

Swaalaman Okakiihtaawikiishwewinan

¹ Kekiihtaawentank okosihsimaa hsa opisintaan eshi kihkino'amaakotc oteten. A'a tahsh wiin kekiipaatisitc omihci maanentaan kii⁠onci'aakaniwitc.

² Kaa⁠sekaa pimaatisiwaatc hsa tashi tipa'amawaawak aaniin ehkitowaatc, iki tahsh ke⁠wayeshihtaakosiwaatc omihsawentaanaawaa piikwahkamikisiwin.

³ Awiya hsa kaa⁠manaa ihkitotc kekoon okanawentaan opimaatisiwin, awiya tahsh wiin kekoon kaa⁠manaaci ihkitohsik oka otihsikon ke⁠nihshiwanaaci'ikotc.

⁴ Kehtimishkitc hsa kekoon omihsawentaan, kaawiin itahsh kekoon oka tepinansiin. A'a tahsh wiin nehtaa wanohkiitc oka wenoocihtoon entawentank.

⁵ Kweyahkwaatisiwaatc hsa oshiinkentaanaawaan kiiwanimowinan, iki tahsh wiin meci'ishiwepisiwaatc akatentaakosiwak, noociko kaye inentaakosiwak.

⁶ Kwayahkwaatisiwin hsa okanawenimikon awiya kekoon kaashi anaamentaakosihsik, macikekoon itahsh wiin oshaakooci'ikon a'a mecaatisitc.

⁷ Peshik hsa awiya wenootisiihkaaso, aanawiin eh⁠kitimaakisitc, kotak itahsh awiya kitimaakisiihkaaso, aanawiin e⁠wenootisitc.

⁸ Kaa⁠wenootisitc hsa otinaapaci'aan oshooniyaaman ci⁠naatamaakotc, ketimaakisitc tahsh wiin kaawiin awiyan opapaamimikohsiin.

⁹ Kweyahkwaatisiwaatc hsa ishinaakosiwak taapishkoo waahsahkonencikan kaa⁠pakahkaahtek, meci'ishiwepisiwaatc itahsh wiin taapishkoo waahsahkonencikan kaani aahtawek.

¹⁰ Kii⁠kihci inenintisonaaniwank hsa mii 'imaa wenciik maanshi wiiciintiwin, iki tahsh wiin kaa⁠na'ihtamowaatc miiwak iki eyaawaatc kakiihtaawentamowin.

¹¹ Wayeshihtaakosiwinink hsa awiya kaa⁠onci wenootisitc acina ehta ta⁠wenootisi, a'a tahsh wiin pepankii kaa⁠kashkihciketc tani wenootisi.

¹² Awiya nanahsh kaa‑ahpenimohsik, mii 'awe kaa⁠piikwentam, awiya tahsh wiin eshihsenik eshi mihsawentank, mii hsa kaa⁠ishinaakositc taapishkoo mihtik kaa⁠minokitc.

¹³ Awiya hsa kaa⁠maanentank kihkino'ikewin mii hsa awe ke⁠maanshihsetc, a'a tahsh wiin kehtentank mii 'awe ke⁠mino tipa'amawintc.

¹⁴ Eshi kihkino'ikewaatc kekiihtaawentamowaatc hsa inentaakwanini taapishkoo pimaatisiwin kaa⁠moohkiciwank, mii hsa imaa ke⁠onci wiici'ikoowisitc ci⁠tapasiinotank eshi nakwaashiwemakaninik nipowin.

¹⁵ Awiya hsa kaa⁠onihsitohtamowinitc oka kashkihtoon minwaapamikoowin, a'a tahsh wiin kaa⁠tepweyentaakosihsik sanakanini opimaatisiwin.

¹⁶ Entahsopeshikowaatc hsa kekiihtaawisiwaatc okihkentaanaawaa eshihcikewaatc, kekiipaatisitc itahsh wiin onaakohtoon okakiipaatisiwin.

¹⁷ Noociko hsa kaa⁠papaa inaacimotc otoompwenaan maanshihsewin, a'a tahsh wiin kaa⁠tepweyentaakositc oka piitoon ke⁠onci minohsenk.

¹⁸ Awiya hsa ke⁠aanawentank eshi kihkino'amawintc oka otihsikoon kitimaakihsewin, akatentaakosiwin kaye, a'a tahsh wiin pesintank eshi⁠kihkino'amawintc ta⁠kihtenimaa.

¹⁹ Aahpici hsa awiya ta⁠tepinawewakentam opimaatisiwinink kiih⁠tepinank eshi antawentank, kekiipaatisiwaatc itahsh wiin kaawiin inentansiiwak ci⁠poonihtoowaahpan macikekoon.

²⁰ Awiya hsa ke⁠wiiciiwaatc kekiihtaawentaminitc tani kakiihtaawentam, awiya tahsh ke⁠wiiciiwaatc kekiipaatisinitc ta⁠nihshiwanaaci'itiso.