ᑲᑮᑖᐎᑮᔗᐎᓇᓐ 12 - Ojibwe Kihcimasina'ikan

¹ Awenen ihsa ko kaa⁠saakihtootc kihkentamaawin onantawentaan ci⁠wiintamawintc kii⁠mamaashiitc. Kakiipaatentaakwan iitok awiya kii⁠antawentansik ci⁠wiintamawintc kii⁠mamaashiitc.

² KaaTipenciketc ihsa ominwaapamaa' kwayahk pemaatisinitc, i'i tahsh wiin noociko wa⁠ishihciketc otinakimaa' ci⁠niponitc.

³ Inini hsa kaawiin ta⁠onci kiishikaapawihsii maci'ishiwepisiwinink, a'a tahsh kwayahk eshi pimaatisitc ta⁠mashkawikaapawi.

⁴ Kwayahk enaatisitc wiiwimaa hsa tinowi taapishkoo kihciokimaawaanohkwaanink wenci minwentaminitc onaapeman. A'a tahsh wiiwimaa kaa‑akaci'aatc onaapeman mii 'i enentaakositc taapishkoo ohkani aahkosiwin.

⁵ Enentamowaatc ihsa kweyahkwaatisiwaatc kekoon ta⁠onci minohseni, iki tahsh mecaatisiwaatc eshi wiintamaakewaatc wii⁠onci wayeshihtaakosiwak.

⁶ Ehkitowaatc omacaatisiik ihsa inentaakwanini taapishkoo e⁠nihshiwewaatc, i'i tahsh wiin ehkitowaatc okwayahkwaatisiik naatamaakemakanini.

⁷ Mecaatisiwaatc hsa onakishkaanaawaa ke⁠onci pankihshinowaatc, kaawiin kaye tani ayaahsiiwa' opiiwesiimiwa'. Iki tahsh kweyahkwaatisiwaatc tani paahtiinowa' opiiwesiimiwa'.

⁸ Okakiihtaawentamowinink hsa ta⁠onci kihci mino tashimaa. A'a tahsh anoociko kaa⁠inentank ta‑aanawencikaniwi.

⁹ Nawac iitok ta⁠onishihshin ci⁠mihci ayininiiwitc awiya ci⁠mihtanohkiitc, ahpiihc wiin awiya kaa⁠kihci inwaanintisotc e⁠ayaahsik itahsh miicim.

¹⁰ Kwayahk inini hsa weweni okanawenimaa' otaya'aawihshima', a'a tahsh mecaatisitc aanakii minwaatisitc shaakooc kaawiin weweni okanawenimaahsii' otaya'aawihshima'.

¹¹ A'a hsa kihtikewinini kaa⁠tananohkiitc otahkiimink opaahtiinahtoon miicim, a'a tahsh kaa⁠noocihtootc nooci kekoonan kaawiin iinsan kekoon okihkentansiin.

¹² Iki hsa mecaatisiwaatc mii ehta ko waa⁠ishihcikewaatc ehkakwe mihkamowaatc macikekoon waa⁠noocihtoowaatc. A'a tahsh wiin kweyahkwaatisitc ta‑ayiicikaapawi.

¹³ Mecaatisitc ihsa ehkitotc ta⁠onci oncaanimentam, a'a tahsh kweyahkwaatisitc oka kashkihtoon ci⁠shaapwiitc.

¹⁴ Aaniin ihsa piko ehkitoyan, komaa kaye eshihcikeyan, mii 'imaa ke⁠onci tipa'amaakoowisiyan, aaniin ihsa piko eshi kashkihtamaasoyan kika naasihkaakon.

¹⁵ Kekiipaatisiwaatc mooshak iinsan inentamook kwayahk e⁠ishihcikewaatc, iki tahsh wiin kekiihtaawentamowaatc nihtaa pisintamook.

¹⁶ Ahpii hsa okakiipaatis kii⁠nishkentank, shemaak iko okihkentaakohtoon. Kaa⁠okihkentamaawinitc itahsh wiin kaawiin opapaapisiskentansiin aaniin enintc.

¹⁷ A'a hsa kaa⁠tepwetc kwayahk ishihcike, a'a tahsh wiin kaa⁠kiiwanimotc kaawiin kwayahk ishihcikehsii.

¹⁸ Awiya hsa kii⁠naanaakatawentansik aaniin ehkitotc mii 'i eshinaakwaninik taapishkoo eh⁠pashipa'owaaketc kihci moohkomaan. Awiya tahsh wiin okakiihtaawikiishwewinink mii 'imaa wenciik antawi'ikoowin.

¹⁹ Kiiwanimowin ihsa acina ehta ta‑ayaamakan, tepwewin itahsh nehpic ta‑ayaamakan.

²⁰ Wayeshihtaakosiwin ihsa okikishkaakonaawaa iki noociko kaawii ishihcikewaatc, ciihkentamowin itahsh wiin okikishkaakonaawaa iki kaa⁠noocihtoowaatc pisaanentamowin.

²¹ Kaawiin maanshihsewin oka naasihkaakohsiinaawaa kweyahkwaatisiwaatc, iki tahsh mecaatisiwaatc mooshak oka ayaanaawaa maanshihsewin.

²² KaaTipenciketc oshiinkenimaa' kaa⁠kakiinawishkiinitc, ominwaapamaa' itahsh wiin kaa⁠nihtaa tepwenitc.

²³ Awiya kaa⁠kihkentaasotc kaawiin opapaa tashintansiin kekoon kehkentank, a'a tahsh wiin okakiipaatis onaakohtoon aaniin ehpiihci kakiipaatisitc.

²⁴ A'a hsa kaa⁠nihtaa kihci anohkiitc tani mashkawentaakosi, a'a tahsh kaa⁠nihtaa kihtimitc tani tinowi kaa⁠mihci pamiihtaaketc.

²⁵ Oncaanimentamowinink ihsa awiya kaa⁠onci minwentansik ote'ink, minokiishwewinink ihsa ta⁠onci ciihkentam.

²⁶ A'a hsa kweyahkwaatisitc weweni okihkinowinaan owiicitaamaakanan, a'a tahsh wiin inahke eshaatc omacaatis waniwishiwemakanini.

²⁷ Kiishpin kihtimiyan, kaawiin wiihkaa kika ayaahsiin kaa⁠kakwe kashkihtamaasoyan, kiishpin itahsh wiin kihci anohkiiyan kika kihci inentaan kaa‑ayaayan.

²⁸ Kwayahkwaatisiwinink inahke hsa onciimakan pimaatisiwin, maci'ishihcikewinink inahke tahsh wiin onciimakan nipowin.