ᑲᑮᑖᐎᑮᔗᐎᓇᓐ 10 - Ojibwe Kihcimasina'ikan

Swaalaman Eshikakiihtaawikiishwetc

¹ Miiwan ihsa ono Swaalaman (Solomon) okakiihtaawikiishwewinan. Okosihsimaa kekiihtaawentank ihsa okihci inenimikoon oteten. A'a tahsh wiin kekiipaatisitc omaanentami'aan omaamaan.

² Kakayenisiwinink awiya kaa⁠onci wenootisitc, kaawiin kekoon oka inaapacihtoohsiin. Awiya hsa kaa⁠kwayahkwaatisitc mii 'awe ke⁠pimaaci'itisotc.

³ KaaTipenciketc kaawiin oka pakitinaahsiin okwayahkwaatisiin ci⁠noonteskatenitc. Kaawiin itahsh oka pakitinaahsiin omacaatisiin ci⁠tepinaminitc entawentaminitc.

⁴ Awiya kaa⁠kihtimitc ta⁠kitimaakisi. A'a tahsh kaa⁠kihci anohkiitc ta‑ani wenootisi.

⁵ Awiya hsa kaa⁠maawacihtootc kihtikewin e⁠niipininik mii hsa awe iinsan kekiihtaawi ishi'ayaatc. A'a tahsh kaa⁠ontamiinkwaamitc ahpii kii⁠manishikenk, mii iinsan a'a kaa⁠kakiipaaci ishi'ayaatc.

⁶ Shawentaakosi hsa kwayahk inini. A'a tahsh omacaatis otihkitowinink otoonci kaatoon omaci ishi'ayaawin.

⁷ Kii⁠maamihkawinotawintwaa okwayahkwaatisiik iitok wiinke tetako minwentaakwan, iki tahsh omacaatisiik ta⁠mihci waniihkenotawaawak.

⁸ Iki hsa kekiihtaawi ishi'ayaawaatc pisintamok kii⁠maamiinomintwaa, iki tahsh wiin kaa⁠kakiipaaci kiishwewaatc ta⁠nihshiwanaatisiwak.

⁹ A'a hsa kwayahk kaa⁠pimohsetc weweni ta⁠pimaatisi, a'a tahsh kwayahk kaa⁠ishihcikesik tani kihkentaakosi.

¹⁰ Awiya hsa kaa⁠nakaanank tepwewin otooshihtoon maanshihsewin. Iki tahsh wiin kaa⁠kakiipaaci kiishwewaatc ta⁠nihshiwanaatisiwak.

¹¹ Eshi kakiitotc kwayahk inini mii 'imaa wenciik opimaatisiwin taapishkoo nipi kaa⁠moohkiciwank. A'a tahsh omacaatis otihkitowinink otoonci kaatoon omaci ishi'ayaawin.

¹² Awiyak kii⁠shiinkenintiwaatc mii 'imaa wencihsek maanshi wiiciintiwin, iki tahsh wiin kaa⁠saaki'itiwaatc poonentamaatiwak eshi maanshi wiiciintiwaatc.

¹³ Iki hsa kekiihtaawentamowaatc kakiihtaawikiishwewak, iki tahsh kekiipaatisiwaatc tepinamaasowak ci⁠nana'ahsintwaapan.

¹⁴ Kekiihtaawentamowaatc ihsa awahshime kakwe kihkentaasowak, kekiipaatisiwaatc itahsh kii⁠kiikitowaatc aahpici pehsho tanentaakwan maanshihsewin.

¹⁵ Awiya hsa kaa⁠wenootisitc, owenootisiwin okanawenimikon, a'a tahsh wiin ketimaakisitc okitimaakisiwin oka nihshiwanaaci'ikon.

¹⁶ Pimaatisiwin hsa awiya tipa'amawaa kwayahk kiishi pimaatisitc, awiya tahsh wiin kii⁠macitootank kashkihtamaaso aanciike ke⁠onci nana'ahsintc.

¹⁷ Ikiweniwak ihsa kaa⁠pisintamowaatc kii⁠maamiinomintwaa ta⁠pimaatisiwak. Iki tahsh wiin kaa⁠papaamihtansikwaa e⁠maamiinomintwaa miiwak iki kaa⁠wanihshinowaatc.

¹⁸ Awiya hsa kaa⁠kaatootc oshiinkenimiwewin, mii 'awe kaa⁠kakiinawishkitc. A'a tahsh kaye misiwe kaa⁠papaa tashimiwetc kakiipaatisi.

¹⁹ Awiya hsa kii⁠kihci kaakiikitotc kehcinaac iko ta⁠macitootam. A'a tahsh wiin kekiihtaawentank, kaawiin noontaatihsii.

²⁰ Kwayahk inini ehkitotc inentaakwanini taapishkoo wencitoo piko waapaapihko shooniyaa waapihk, a'a tahsh enentank okakiipaatis kaawiin kekoon inentaakwahsinini.

²¹ Kwayahk inini ehkitotc ihsa niipiwa' awiya' onci minohsewa', awiya tahsh kaa⁠kakiipaatisitc ta⁠ontaahpinanintiso kaa⁠nihsitawinansik.

²² KaaTipenciketc oshawencikewinink ohsha awiya kaa⁠onci wenootisitc. Kaawiin tako miikiwehsii maanshihsewin.

²³ Kekiipaatisitc ihsa onci minwentam e⁠macitootank. A'a tahsh kehkentamaawinitc osaakihtoon kakiihtaawentamowin.

²⁴ Okwayahkwaatis ihsa ta⁠miinikoowisi eshi pakohsentank, a'a tahsh okakiipaatis oka otihsikon kaa⁠kohtaanentank.

²⁵ Ahpii tahsh kii⁠kihci pakamaanimahk omacaatisiik ta⁠caakiwepaahshiwak, iki tahsh wiin okwayahkwaatisiik ta⁠kanawentaakosiwak.

²⁶ Keko wiihkaa anoonaahken kehtimaatisitc kekoon ishi anohkiihtawihk, mii hsa 'i ke⁠inentaakositc taapishkoo kekoon kaa⁠wiihsakaakamink, taapishkoo kaye paashkine kaa⁠inaapahtek kishkiinshikonk.

²⁷ Kii⁠kohtaanenimintc kaaTipenciketc awiya kinwesh onci pimaatisi, omacaatisiik itahsh wiin ta⁠noonte kiishkinamawaawak minihk kekiih pimaatisiwaahpan.

²⁸ Okwayahkwaatis eshi pakohsenimotc ci‑ishihsetc ta⁠onci ciihkentam. Iki tahsh wiin omacaatisiik eshi pakohsenimowaatc kaawiin ta⁠ishihsehsinini.

²⁹ KaaTipenciketc otishihtwaawin iitok onaatamaakonaawaa okwayahkwaatisiik, iki tahsh wiin omacaatisiik kaa⁠tootamowaatc mii 'iweni ke⁠nihshiwanaaci'ikowaatc.

³⁰ Okwayahkwaatisiik ihsa kaawiin wiihkaa kikiciipihk ta⁠pahkwacipinaahsiiwak, iki tahsh omacaatisiik kaawiin keyaapi ta⁠ishitaahsiiwak i'imaa ahkiink.

³¹ Okwayahkwaatisiik ehkiikitowaatc aahpici kakiihtaawikiishwewak, i'i tahsh wiin otenaniw onsaam kaa⁠maci ishikiishwemakahk ta⁠kipihtinikaate.

³² Okwayahkwaatisiik ihsa okihkentaanaawaa keshi manaasomaawaatc awiyan. Iki tahsh omacaatisiik nihtaa ihkitowak mooshak aaniin awiyan ke⁠onci mikoshkaatentaminitc.