ᑲᑮᑖᐎᑮᔗᐎᓇᓐ 1 - Ojibwe Kihcimasina'ikan

Ehpiihtentaakwahkin Kakiihtaawikiishwewinan

¹ Miiwan ihsa ono kaakii ishi kakiihtaawikiishwetc Swaalaman (Solomon) kaakiih kihciokimaawitc i'imaa Isriyal (Israel) ahkiink, Tepitan (David) kaakii otetetc.

² Miiwan itahsh ono kakiihtaawikiishwewinan ke⁠onci kihkentaman kakiihtaawentamowin, i'i kaye kwayahk wiintamaakewin. Miihsh kaye ke⁠onci nihsitohtaman ihkitowinan kaa⁠sanakahkin ci⁠nihsitoohcikaatekin.

³ Kakiihtaawikiishwewinink ihsa kika onci kihkentaan weweni kwayahk ke⁠onci pimaatisiyan. Miihsh kaye i'imaa ke⁠onci kihkentaman kwayahkohcikewin, kaawiin kaye kika wayeshinkehsii, kwayahk kaye kika tootaake.

⁴ Miihsh kaye i'imaa awiya kekiipaatentaakositc ke⁠ontinank kakiihtaawentamowin, aaniin kaye ke⁠onci nihsitawentank kekoon kaa⁠oshkaatisitc.

⁵ Miitahsh kaye i'imaa ke⁠onci nanki kihkentaasotc a'a kekiihtaawentank, a'a kaye kaa⁠nihsitawentank kekoon ke⁠onci kihkentank inahke ke⁠ishaatc.

⁶ Miitahsh i'imaa ke⁠onci nihsitohtamowaatc aaniin mayaa ke⁠ihkitoomakaninikin ini kakiihtaawikiishwewinan, aaniin kaye ehkitonitc iniweniwa' kekiihtaawentaminitc.

Eshikanoonintwaa Oshkiniikiwak

⁷ Kii⁠kohtaanenimintc kaaTipenciketc mii 'imaa wenci maacihsek kihkentamaawin, Kekiipaatisiwaatc ihsa oshiinkentaanaawaa kakiihtaawentamowin, kaawiin kaye inentansiiwak ci⁠kihkino'amawintwaa.

⁸ Ninkosihs, pisintaw kitete aaniin eshi kihkino'amawihk, keko kaye nakatanken aaniin kimaamaa eshi kihkino'amawihk.

⁹ Eshi kihkino'amawihkwaa hsa kika onci weweni pimaatis taapishkoo kaa⁠onci minonaakosiyan kii⁠kikishkaman naapihkwehpison, naapihkaakanimin kaye.

¹⁰ Ninkosihs, ahpii hsa mecaatisiwaatc kakwe kashkimihkwaa ci⁠macitootaman, keko pakiciihken.

¹¹ Kiishpin ihkitowaatc, “Ampe taka wiiciiwihshinaam, mihkawaataa awiya ke⁠nihsank. Taka miikaanaataa awiya kekoon eshi mamaashiihsik ishi anihshaa piko.”

¹² Aana hsa ta⁠pimaatisiwak ahpii mihkawankitwaa, kehcinaac itahsh iko ta⁠nipowak ahpii kiih⁠kiishiihkantawankitwaa.

¹³ Niipiwa' ihsa wenooci kekoonan kika mihkaamin ci⁠mooshkinahtooyank kiwaahkaa'ikaninaanin.

¹⁴ Ampe taka wiiciiwihshinaam. Kahkina hsa kika mamaata'onitimin kekoonan ke⁠kiimootiyank.

¹⁵ Ninkosihs, keko wiiciiwaahken iki tino awiyak. Keko ishaahken inahke eshi pimohsewaatc miihkanaank.

¹⁶ Kaawiin ihsa anisaa'ohsiiwak ewii maci'ishihcikewaatc. Aahpici weyiipisiwak ewii nihshiwewaatc.

¹⁷ Kaawiin iitok kekoon inaapatahsinoon kii⁠tashwekipinintc ahsap ci⁠kaahcitinintwaapan pinehshiinshak, kiishpin kota waapamaawaatc ini ahsapiin.

¹⁸ Wiinawaa hsa piko oshihtamaasowak aanti ke⁠onci nipowaatc, wiinawaa piko e⁠mamaashiihkantaasowaatc.

¹⁹ Mii hsa 'i kahkina ke⁠ishihsewaatc okimootiwiniwaank kaa⁠ontinamowaatc kekoon. Iki hsa kaa⁠kimootiwaatc ta⁠ishkwaahseniwan opimaatisiwiniwaan.

Kakiihtaawentamowin Ehkiikitoomakahk

²⁰ Kakiihtaawentamowin ihsa ishi kiikitoomakan inahke miihkanaank, enikoohk e⁠ishi kiikitoomakahk eshi ayayaanitc pemaatisinitc.

²¹ Enikoohk kiikitoomakan eshi ayishkwaantemiwank kihci ootena, miihkanaahkaank eshi ayohkwiinonitc pemaatisinitc.

²² Aaniin minihk kiinawaa kekiipaatisiyek waa⁠saakihtooyek kikakiipaatisiwiniwaa? Aaniin minihk kiinawaa kaa⁠nihtaa miihkinsohtaakosiyek waah⁠saakihtooyek kimiihkinsohtaakosiwiniwaa, iki kaye kaa⁠maci kakiipaatisiwaatc waah⁠shiinkentamowaatc kihkentamaawin?

²³ Kiishpin pisintaman eshi kihci kanooninaan, kwayahk inahke kika'inin ke⁠ishihcikeyan. Kaye tahsh kika tootawin ci⁠kihkentaman aaniin enentamaan.

²⁴ Aana tahsh eh⁠kanooninaan, aana kaye e⁠antominaan, kaawiin kinoontansii. Kaawiin kaye kipisintansii.

²⁵ Kaawiin kipapaamihtansii aana kanooninaan aaniin ke⁠ishihcikeyan, kaawiin kaye kitinentansii ci⁠pisintaman aanakii⁠maamiinomikooyan.

²⁶ Ahpii tahsh maanshihsewin otihsikoyan, kika paahpi'in, kika miihkinsomin kaye kihci wahsitaawihsewin otihsikoyan.

²⁷ Ahpii otihsikoyan maanshihsewin taapishkoo kii⁠kihci pakamaanimahk, taapishkoo kii⁠kishipaayaanimahk kii‑inentaakwahk, ahpii sako wiihsakentaman, kakwaatakentaman kaye.

²⁸ Miitahsh nanapaawihsh keshi kanooshiyan, kaawiin itahsh kika nahkwehtawihsinoon. Misiwe hsa piko kika ishi kakwe mihkawihsh, kaawiin itahsh kika mihkawihsii.

²⁹ Kishiinkentaan iitok kakiihtaawentamowin, kaawiin kaye kitinentansii ci⁠kohtaanenimatc kaaTipenciketc.

³⁰ Kaawiin kaye wiihkaa kinoontansii kii⁠kanoonikooyan ke⁠ishihcikeyan, kaawiin kaye kipisitansii kii⁠maamiinomikooyan.

³¹ Miitahsh ci⁠otihsikoyan aaniin eshi kashkihtamaasoyan, kiin piko kitishihcikewinink kika⁠onci maanshihse.

³² I'i hsa otishiwepisiwiniwaan ta⁠onci nipowak kehkentansikwaa kekoon. Iki kaye kaa⁠maci kakiipaatisiwaatc ta⁠onci nihshiwanaatisiwak eh⁠papaapisiskentansikwaa kekoon.

³³ Awekwen itahsh iko ke⁠pisintawitc weweni pisaan ta⁠pimaatisi. Kaawiin kekoon oka papaamenimikoohsiin, kaawiin kekoon oka kohtansiin ke⁠onci wiihsakentank.