ᐱᓬᐃᐱᔭᓇᒃ 4 - Ojibwe Kihcimasina'ikan

Aaniin keshiminowiiciintiwaatc otepwehtamook

¹ Niwiiciotepwehtamook! Kiinawaa kaasaaki'inakook, aahpici kinantawenimininim, aahpici kiminwentami'im, aahpici kiwaawishenimininim. Siyaaki'inakook, mii 'owe ishisoonkikaapawik i'iwe kaapi‑ininakook ciani‑ishiwiiciiwek kaaTipenciketc.

² Shikwa kiin Yo'ootiya (Euodia), kaye kiin Sintihki (Syntyche), kikakaansomikoom: kakwepeshikwentamok, mii 'i ishiwiiciiwihk kaaTipenciketc.

³ Kaye kiin niwiitanohkiimaakan, kaakwayahkwentaakosiyan, wiici' oko ihkwewak. Enikohk ninkii'wiitanohkiimikook cimaaciishkaanik i'i minwaacimowin. Kaye okii'wiitanohkiimaawaan ini Kalemantan (Clement) kaye ini kotak niwiitanohkiimaakana', iniweniwa' owiinsowinini kaa‑ayaanikin i'imaa omasina'ikanink Kishemanitoo kaaishioshipii'waatc awenena' kaakii'miinaatc pimaatisiwin.

⁴ Mooshak ciihkentamok e'wiiciiwek kaaTipenciketc. Miinawaa nintihkit: ciihkentamok!

⁵ Misiwe noohkaatisik kahkina awiya cikihkeniminekwaa. Pehshonaakwanini citakohshink kaaTipenciketc.

⁶ Keko kekoon kitaawanaayentami'ikohsiim. Anami'aak itahsh, kakwecimihk Kishemanitoo wekonen iko kaaishinoontehseyek pehkihsh kaye cimiikwehciwentamek.

⁷ Kikaotihsikom opisaanentamo'iwewin Kishemanitoo, wawiinke kaapahkinaakemakaninik eshiayaak kikihkentamowininaan. Kikashikanawentamaakom kite'iwaank kaye kinaakatawencikaniwaank, ekaa kekoon i'imaa ci‑ishihsehsiwek e'wiiciiwek Christ Ciisahs.

⁸ Miinawaa ishkwaac, niwiiciotepwehtamoomak, naanaakatawentamohk ono kaatinowiwankin, wekonen iko kaatepwewakentaakwahk, shikwa kaakihtentaakwahk, wekonen iko kaakwayahkwahk, kaye kaapehkentaakwahk, kaye kaaminonaakwahk, kaye kaaminwaatotek. Wekonen hsa ko minoishiwepisiwin kaainentaakwahk kaye kaaminohcikewakentaakwahk, mii 'iwe ishinaakatawentamohk.

⁹ Kakwenihtaatootamohk wekonen iko kaakiihkihkino'amaakooyek kaye kaakii'miinikooyek, kemaa kaakiihpisintawiyek kemaa kaye kaakii'ishiwaapamiyek niin ehtootamaan. Kikaishiwiiciiwikowaa 'awe Kishemanitoo 'awe kaapisaanentamo'inank.

Ekii'miikwehciwi'aatc ootepwehtamoo' kaakii'miinikotc

¹⁰ Niin itahsh e'wiiciiwak kaaTipenciketc, ninciihkentamo'ikon noonkom miinawaa ehpiminotootawiyek, aasha kinwesh ekii'nehpici‑ishihsehsinok citootawiyek. Aanawiin kaawiin wiihkaa kikiihpoonimaamitonenimihsiim, kaawiinhsh nanaash kii'ishihsehsinoon nintihkit.

¹¹ Kaawiin ihsa noontehsewin nintoonci‑ihkitohsii, aaniihsh ninkiihkihkino'amaakoowis citepihsewakentamaan aaniin iko eshiwepisiyaan.

¹² Ninkii'ani‑ishiwaapantaan inkotink cinoontehseyaan, kaye inkotink ciwenoocihseyaan. Kayehsh ninkii'mihkwentaan keishina'entamaan piko ahpii, aanti ko ayaayaan, maakishaa tewiihsiniyaan, maakishaa kaye noonteskateyaan; kemaa wenoocihseyaan kemaa kaye noontehseyaan, nina'entam.

¹³ Kahkina kekoon ninkashkihtoon e'ishi'itc a'a Christ kaamashkawisii'itc.

¹⁴ Wawiinke tahsh kikii'minohcikem ekii'minowiici'iyek mekwaa nintoocaanimisiwinink.

¹⁵ Kiinawaa Pilipaayink (Philippi) kaaishimaawaci'itiyek, kiminokihkentaam aaniin kaaishiwepisiyaan 'iwe ahpii ekii'oncimaacaayaan Maahsitooniyaawahkiink (Macedonia), weti nihtam ekii'maaciiwiintamaakeyaan minwaacimowin. Kiinawaa ehta kikii'wiici'im, kaawiin pahkaan awiya otanami'aak ninkii'onciwiici'ikohsiik. Kiinehtawaa nihtam kikii'ishiwiici'iwem miinikoowinink kaye onciihtamaakewinink.

¹⁶ Kaye ahpii kaa'ayaayaan Tehsalanaihkaank (Thessalonica), kaawiin ehta aapitink kikiihpi‑ishinisha'amawihsiim kaa'noontehseyaan.

¹⁷ Kaawiin wiin i'i cimiinikooyaan nintinentansiin. Nawac itahsh kinantawenimininim minokekoon cinankakinsoyek.

¹⁸ Ninkiihtipimiinikoo, kii'awahshimehse kaamiishiyek. Ninkiihpiwenoocimiinik 'awe Ipaahparataitahs (Epaphroditus), kahkina ekii'miishitc kaakiihpi‑ishinisha'amawiyek. Inentaakwanoon taapishkoo pakitinikewin e'minomaakwahk, keshiotaahpinank Kishemanitoo kaye keshiminonank.

¹⁹ Shikwa kahkina kiinawaa keshinoontehseyek kikaonciihtamaakowaa ninKishemanitoom, i'imaa cionciimakaninik e'onishihshininik owenootisiwin, i'imaa kaa‑ayaamakaninik Christ Ciisahs e'ayaatc.

²⁰ KiKishemanitoominaan kaye Koohsinaan kihtentaakosiwinink tainakimaa pishihshik iko ahpane. Emen.

Ehpooshoo'aatc

²¹ Kahkina tapooshoo'aawak Kishemanitoo opimaatisiima' ikiweniwak Christ Ciisahsoon kaatipenimikowaatc. Kaye owiicitepwehtamoomaak o'omaa kaawiiciayaamiwaatc kewiinawaa kipooshoo'ikowaak.

²² Kaye kahkina Kishemanitoo opimaatisiima' o'omaa kaa‑ayaawaatc kipooshoo'ikowaak, memintake ikiweniwak i'imaa kaatipentaakosiwaatc maawac kihciokimaa owaahkaa'ikanink.

²³ Okishewaatisiwin kaaTipenciketc Ciisahs Christ kikawii'wiiciiwikom kitahcaahkowaank.