ᐱᓬᐃᐱᔭᓇᒃ 3 - Ojibwe Kihcimasina'ikan

Aanti kwayahkwaatisiwin keontinikaatek

¹ 'Owe tahsh ishkwaac kitishiwiintamawininim, niiciotepwehtamook: onciciihkentamok 'iwe eshiwiiciiwek kaaTipenciketc. Kaawiin inkotano nintinentansiin miinawaa peshikwan ciwiintamaan i'iwe otaanaank kaakii'ishipii'amawinakook, nawac i'imaa ci‑ishikanawentaakosiyek.

² Na'aasiihkantawihkok iki kaatootamowaatc ekaa kaakwayahkwahsininik, iki animohshink kaainentaakosiwaatc. Na'aasiihkantawihkok iki kaawiihpehshishamowaatc wiiyawiwaan.

³ Kiinawint ohsha kitaawimin kaamiinikoowisiyank kwayahk kihkinawaatashakeshokoowinink kaainentaakwahk. Aaniihsh kiinawint kitishianami'ehtawaanaan Kishemanitoo e'ishikashkihtoo'iminank otAhcaahkwan. Shikwa kitooncimoocikentaamin 'iwe e'wiiciiwinank Christ Ciisahs. Kaawiin kanake kitahpenimonotansiimin kekoon wakicinaw ehta ehtoocikaatek.

⁴ Keniin hsa ko nintaakashkihtoonaapan i'imaa ciahpenimoyaan ishihtwaawinink wakicinaw kaatoocikaatek. Kiishpin awiya inentank ehkashkihtootc ci‑ishiahpenimonotank i'i wakicinaw kaatoocikaatek, nawac niin iko nintaateinakins.

⁵ Kaye niin ninkiihkihkinawaatashakeshokoo kiinihshwaahsokiishikahk (8) ahpane ekii'nihtaawikiyaan. Kaye niin i'imaa Isriyal (Israel) ininiinaank ninkii'oncii, kaye i'imaa tahswewaanakisiwinink Penciman (Benjamin) e'ontahkaanesiyaan. Nimisiwes Hiiparoo (Hebrew) ehtinowiyaan. Kaye tahsh ninkiih⁠Perahsiiwininiiw (Pharisee) kaakii'ishikanawentamaan Coowak otInaahkonikewiniwaa.

⁶ Wiinke ninkii'ishionsaamentaan nintanami'aawin ekii'oncikakwaataki'imak Christ otanami'aakana'. Shikwa minihk eshikashkihtootc awiya ehkanawentank i'i Inaahkonikewin, wawiinke 'imaa ninkiihkwayahkotootam.

⁷ Ono tahsh kahkina ontisiwin kekii'inakintamaampaan, noonkom nintishinaanan ekii'wanihcikeyaan, nawac Christ ewiihkihkenimak.

⁸ Kaawiin iniweniwan ehta nintishinansiinan, kahkina kekoon aanatootamaan nintishinaan misiwe ekii'wanihcikeyaan, nawac iko ewii'ayaayaan kekoon maawac kaaonishihshink, mii 'iwe cikihkenimak Christ Ciisahs kaaTipenimitc. Wiin ewii'ayaawak ninkii'onciwepinaan kahkina. Cimihciwepinikaatek ehta nintinakintaan kahkina, nawac ewii'ontinak a'a Christ.

⁹ Misiwe peshikwan niwii'ishitakowiiciiwaa. Kaawiin keyaapi niin nintooshihtamaasohsii ninkwayahkwaatisiwin, 'iwe tino kaaonciimakahk Inaahkonikewin ehkanawencikaatek kaawiin nintayaahsiin. Noonkom itahsh nintayaan i'i kwayahkwaatisiwin i'imaa hsa e'onciimakahk ehtepwehtawintc a'a Christ. Mii 'iwe kwayahkwaatisiwin Kishemanitoo kaamiishitc kaatepwehtamowak.

¹⁰ O'owe hsa ehta ninantawentaan, wiin Christ cikihkenimak kaye cipikihkentamawak 'iwe mashkawisiiwin i'imaa wenciimakahk okiiwepimaatisiwinink. Kaye niwii'wiici'iwe okotakihtoowinink Christ, niwii'naapaatisiimaa kaainaatisitc onipowinink,

¹¹ o'owe e'inentamaan aaniin iko kaye niin ci‑ishiotihtamaan cionciwanishkaanikooyaan nipowinink cikiiwepimaatisiyaan.

Kakwecihkanitiwinink e'ishinaakwaninik ehkakweotihtank i'iwe kaawii'miinikotc Kishemanitoon

¹² Kaawiin 'iwe nintaaihkitohsii aasha cikashkihtooyaan, kaawiin kaye ehkiishi'ikoowisiyaan. Enikohk itahsh nintanikakwekaahcitinamaas i'iwe kaakiiwii'miishitc kaakii'oncikaahcitinitc Christ Ciisahs.

¹³ Niiciotepwehtamowitok! Kaawiin aasha nintinentansiin ehkaahcitinamaasoyaan. Peshik itahsh kekoon nintootam: niwiihkakwenakataanan otaanaank kaa‑ayaakin cimaamihkawihsiwaan, niikaanaya'ii ka‑ayaamakahkin ninkakwekaahcitinaanan.

¹⁴ Kwayahk iko ahpane nintahpahtoo ciocihcipahtooyaan weti kaaishikihkinawaasinaakwahk pahkinaakewin, mii 'imaa citashimiinikooyaan nintipa'amaakoowin, mii 'iwe ishpimink citanaatisiyaan, mii 'iwe kaaishiantomitc Kishemanitoo Ciisahs Christink.

¹⁵ Tahsin iko kiinawint kaakiishianami'ewaatisiyank peshikwan o'owe kakweinentantaa. Kiishpin itahsh pahkaan inentamowin ayaawekwen aaninta, mii 'iwe kikawaapanta'ikowaa Kishemanitoo.

¹⁶ Maano tahsh keyaapi ciani‑ishimaacaayank peshikwan i'iwe aasha kaapi‑ishiotihtamank.

¹⁷ Niwiiciotepwehtamook! Naanaapinawihshik kaaishihcikeyaan, kanawaapamihkok ikiweniwak kaainaatisiwaatc niinawint kaakii'ishihcikeyaank, ekiihkihkinawaapanta'ikooyek.

¹⁸ 'Iwe tahsh niipiwa'aank aasha kaakii'wiintamawinakook, noonkom miinawaa kiwiintamawininim, kaye niwiihsaka'okon e'wiintamawinakook o'owe: niipiwa' ishipimaatisiwak ewii'naahpakentansikwaa Christan otashinipowinini aashiteyaahtikonk.

¹⁹ Piciinak tapaahkaciayaawak nihshiwanaatisiwinink. Aaniihsh omanitoomiwak wiiyawiwaan kaaishiantawentamoomakaninikin. I'iwe kekiimenihshentamowaahpan nawac itahsh owaawishentaanaawaa, ahkiiwaya'iin ehta ehpapaamentamowaatc.

²⁰ Kiinawint itahsh imaa kihcikiishikonk kitooncitipentaakosimin. Kitaahkopii'aanaan kitOopimaaci'iweminaan i'imaa cioncitakohshink, mii 'awe kaaTipenciketc Ciisahs Christ.

²¹ Wiin kika‑aanciihtamaakonaan kiwiiyawinaanin kaamacentaakwaninikin. Okaoshihtoonan wiin ehkihtentaakwaninik wiiyaw ci‑ishinaakwaninikin. Omashkawisiiwin oka‑aapacihtoon i'iwe e'oncikashkihtootc kahkina kekoon ehtipentank.