ᐱᓬᐃᐱᔭᓇᒃ 2 - Ojibwe Kihcimasina'ikan

Christ kaakii'inaatisitc kakweinaatisiyohk

¹ Kiishpin tepwe oncimashkawisiiwekwen e'wiiciiwinek a'a Christ, kiishpin kaye oncisoonkite'eyek onci 'iweni osaaki'iwewinink, kiishpin kaye menowiiciiwaawekwen ini Kishemanitoo otAhcaahkwan, kiishpin kaye oncishawenintiyek kaye tahsh cioncikitimaakenintiyek,

² kiishpin onoweniwan tepwe eshiayaawekwen, mii 'owe kitishikanoonininim wiinke cikakwemoocikentami'iyek, mayaa peshikwan ci‑inentamek kaye peshikwan ciahpiihcisaaki'itiyek kaye wiinke cipeshikwewaanakentamek, wiinke ciwiici‑inentamoontiyek.

³ Keko kaye kekoon ishihcikehkek cikakweniikaanentaako'itisoyek, nawac 'iwe kakwetapahsenimohtaatik, mooshak itahsh “Kiin nawac kikihtakins” ishinaatik.

⁴ Kaawiin awiya wiin iko tipinawe ehta taakakweminohsa'itisohsii, kahkinahsh iko cikakwenaanaakatawenintiyek.

⁵ Christ Ciisahs kaakii'inaatisitc kitaakakweinaatisim kekiinawaa:

⁶ Aanawiin Kishemanitoonk ekiihpi‑inaatisitc, kaawiin itahsh kii'inentansii cimashkawikanawentank 'iwe kaaishiKishemanitoowentaakositc.

⁷ Wiin itahsh iko meshkwac kii'inenintiso kahkina cipakitinank, kaye okii'otaahpinaan anohkii'aakanink ci‑ishipimaatisitc. Ininiink itahsh iko kii'ishinihtaawiki kaye ininiink kii'ishinaako'aakaniwi.

⁸ Kiihtapahsentaako'itiso, kiihkapenanaa'ihtam, piinihsh iko cinipotc, ekiihtashinetc aashiteyaahtikonk.

⁹ Mii hsa tahsh okii'oncikihtentaako'ikoon ini Kishemanitoon, maawac ishpimink ciniikaanakinsotc. Kaye okii'miinikoon maawac ehkihtakintenik minowiinsowin kaatahsinkin wiinsowinan.

¹⁰ Mii hsa tahsh 'awe Ciisahs owiinsowin wiincikaatenik, kahkina awiya taociciinkwaniihtaawak kihcikiishikonk kaa‑ayaawaatc, kaye tahsh ahkiink kaye anaamahkamik kaa‑ayaawaatc,

¹¹ kaye kahkina entahsopeshikotc okatipaacimaawaan Ciisahs Christan ehTipencikenitc, mii 'iwe Kishemanitoo Weyoohsimintc cioncikihtenimintc.

O'omaa ahkiink citashisaakaahtekin kipimaatisiwiniwaan

¹² Mii hsa 'iwe siyaaki'inakook, i'iwe ekii'ishipisintawiyek kiiwiiciyayaaminakook, awahshime noonkom e'wiiciayaamihsinowinakook antawentaakwan citootamek i'i kaaininakook. Kohtaanentamowinink, nininkishkaawinink ishikapeanohkaatamaasok kipimaaci'ikoowiniwaa piinihsh iko cikiishinaakwahk.

¹³ Aaniihsh Kishemanitoo 'awe kaainanohkiitc i'imaa kipimaatisiwiniwaank. Kikikishkamo'ikowaa ci‑inentamek kaye citootamek otishiantawentamowin.

¹⁴ Kahkina kekoon kakwetootamok ekaa wiihkaa kekoon citashintansiwek, kaye wiihkaa ciaayaanoontihsiwek.

¹⁵ Mii 'i Kishemanitoo oniicaanihsa' citinowiyek, ekaa kekoon ci‑ishiayaahsiwek kaye cipehkinaakosiyek, kaye ekaa kekoon citashimikoohsiwek. I'imaa mekweaya'ii kitayintaam e'ayaawaatc iki kaakwayahkohcikehsikwaa kaye anooc kaainaatisiwaatc. Kikatashisaakaahtesim taapishkoo wanankohshak e'ishiwaahsaanshewaatc kiishikonk,

¹⁶ kaye e'niiminamawekwaa i'i tipaacimowin keoncipimaatisiwaatc. Kiishpin tepwe o'owe ishihcikeyek kikaonciwaawishenimininim ahpii okiishikaamitc Christ. Taishikihkentaakwan 'i ahpii ekaa anihshaa ekiihpimanohkiihsiwaan kaye anihshaa ekii'oncicaakii'itisohsiwaan.

¹⁷ Maakishaa ninkaishinip taapishkoo ehpakitinaahswaaniwiyaan, nimpimaatisiwin cisiikinikaatek wakic i'imaa kiinawaa eshipakitinikeyek, aaniihsh kitepwehtamowiniwaa kaamiinek Kishemanitoo e'anami'ehtawek. Kiishpin i'iwe ishihsek ninkaminwentam, kaye kiinawaa kahkina ciwiici'iweyek ninciihkentamowinink,

¹⁸ mii 'i peshikwan kaye kiinawaa kitaaciihkentaam, kaye niin ciwiicimoocikentamawinakook.

Timahti, Ipaahparataitahs ehtashimintwaa

¹⁹ Nimpakohsenim kiishpin inentank kaaTipenciketc ci‑ishinisha'wak a'awe Timahti (Timothy) ciawiotihsinek, miitahsh cioncimashkawentamaan noontamaan eshipimaatisiyek.

²⁰ Aaniihsh mii ehta 'awe Timahti kewiici‑inamanci'oomak. Mii ehta 'awe tepwe kaanaakatawentamawinek kiinawaa eshiwepisiyek.

²¹ Kahkina aaniihsh pehkaanisiwaatc wiinehtawaa kanawaapantamaasowak otishiwepisiwiniwaa. Kaawiin wiin opimentamawaahsiwaawaan Ciisahs Christan otaayintiwinini.

²² Kiinawaa tahsh kikihkenimaawaa otishihcikewin a'a Timahti, ekii'naakohtootc ominwakinsowin. Taapishkoo okosihsimaa e'wiici'aatc oteten, kaye wiin ninkii'wiitanohkiimik cimaaciishkaamakahk i'i minwaacimowin.

²³ Miihsh i'i piciinak iko kihkentamaan keishiwepisiyaan, ninkainentam wiipa cikakweishinisha'wak.

²⁴ Nintahpenimonotawaa tahsh kaaTipenciketc kaye niin wiipa ci‑ishihseyaan ciotihsinakook.

²⁵ Ninkiihteishinaan itahsh e'antawentaakwahk i'imaa ci‑ishinisha'wak a'awe kiiciotepwehtamoominaan Ipaahparataitahs (Epaphroditus) ciantawaapaminek. Mii aaniihsh a'awe kaakiihpiwiitanohkiimitc kaye niwiicimiikaasowininiim e'inenimak. Kaye kiinawaa kikiihpianoonaawaa ehpi‑ishiwitootc kiwiitoohkaakewiniwaa e'miishiyek.

²⁶ Aahpici onantawentaan ciwaapaminek. Kaye kii'mikoshkaatentam ehkihkentank ekii'noontamek e'aahkosihpan.

²⁷ Tepwe hsa ko kii'aahkosi, kekaa piko ekii'oncinipotc. Okiihkitimaakinaakoon itahsh Kishemanitoon. Kaawiin tahsh wiinehta, kaye niin itahsh ninkiihkitimaakinaakoo, ekaa ciayaakwiihtawaahsinokin nimpiikwentamowinan.

²⁸ Mii hsa 'owe nawac iko ninkiihpapaashentaan ci‑ishinisha'wak, kekiinawaa ciminwentamek miinawaa kiiwaapamek. Shikwa keniin cioncimaacaamakahk nimikoshkaatentamowin.

²⁹ Miitahsh a'awe otaahpinihk kikiciihkentamowinink, mincikahkina kaaTipenciketc eshiwiiciiwinek. Kaye kihtakimihk kahkina awiya 'awe kaatinowitc.

³⁰ Wiin aaniihsh maano ko intawaac okiihpakitinaan opimaatisiwin, piinihsh ekii'oncipehshwaci'ikotc nipowin, nawac wiin Christan ewii'anohkiihtawaatc. Mii 'owe kaa'ishihciketc ekii'naapitootank kiinawaa ko kekii'ishiwiici'iyekipan ekiihkashkihtoohsiwek.