ᐱᓬᐃᐱᔭᓇᒃ 1 - Ojibwe Kihcimasina'ikan

¹ Niinawint Pwaal (Paul) kaye Timahti (Timothy) otanohkii'aakana' Christ Ciisahs. Kiinawaa kitooshipii'amaakoom i'imaa Pilipaai (Philippi) ootenaank kaa‑ayaayek, kiinawaa Kishemanitoo opimaatisiima' kaawiiciiwek Christ Ciisahs, tako kaye ikiweniwak oniikaanisiik kaye owiici'iwek nintooshipii'amawaanaanik.

² Shawentaakosiwin kaye pisaanentamowin kikaonciihtamaakowaa Kishemanitoo 'awe Koohsinaan kaye kaaTipenciketc Ciisahs Christ.

Kaaishiminomihkwenimaatc otepwehtamoo' kaaishianami'ehtamawaatc kaye

³ Tahsink iko e'mihkweniminakook nimiikwehciwi'aa Kishemanitoo.

⁴ Tahsink iko mooshak e'anami'aayaan ninciihkentam ehkanoocikehtamawinakook

⁵ onci 'iwe kaapi‑ishiwiici'iweyek ehpimiwiincikaatek minwaacimowin, nihtam iko ekii'maaciiotaahpinamek piinihsh iko noonkom.

⁶ Mii 'owe ehkehcinaa'entamaan, i'iwe ominoanohkiiwin Kishemanitoo kaakii'maatanohkaatank ekiihkikishkamo'inek, keyaapi cini‑ishianohkaatank piinihsh iko ahpii kiishikaninik Christ Ciisahs kaawiihtipentank, amii 'i ahpii cikiishihcikaatek.

⁷ Kwayahkwan ihsa 'owe ci‑ineniminakook, mooshak ehtaneniminakook ninte'ink. Aaniihsh kahkina kaatahshiyek kikiihpi‑ishiwiici'iwem nimiinikoowisiwinink kaaishipakitinamawitc Kishemanitoo, aaniihsh noonkom ehkipa'okooyaan kaye otaanaank mekwaa ekiihpiniskwesiyaan ekiihkanoocikehtamawaatamaan i'i minwaacimowin ekiihpimiaayiitahtooyaan, mooshak kikiihpiwiitoohkawim.

⁸ Kishemanitoo nintaatipaacimik aahpici ko ewii'waapaminakook. I'imaa wiin Christ Ciisahs osaaki'iwewinink onciimakanini o'o kaaineniminakook.

⁹ O'o tahsh nintishianami'aa, keyaapi awahshime cianiwenoociayaamakahk kisaaki'iwewiniwaa, tako kaye ciokihkentamaawiniyek kaye wiinke cinihsitaawinamek,

¹⁰ mii 'iwe ci‑ishikashkihtooyek maawac kaaonishihshinkin ciotaahpinamek. Miitahsh 'iwe misiwe keshitepweyentaakosiyek kaye ekaa kekoon ci‑ishianaamentaakosihsiwek ahpii okiishikaamitc Christ.

¹¹ Kikaishimooshkineshkaakoom kekoonan kwayahkopimaatisiwin wiin Christ Ciisahs kaanihtaawikihtootc, mii 'iwe keoncikihtakimintc Kishemanitoo kaye keoncinanaahkomintc.

¹² Niiciotepwehtamook, kinantawenimininim cikihkentamek 'owe kaapi‑ishihseyaan, mii 'imaa keyaapi wencinikihkentaakwahk i'i minwaacimowin.

¹³ I'iwe onci kahkina shimaakanihshak kaakanawentamowaatc okimaawikamik ninkihkenimikook Christan e'otanohkii'aakaniminitc e'oncikipa'okooyaan, kaye kahkina pehkaanisiwaatc ninkihkenimikook.

¹⁴ Shikwa niipiwa' iki owiicihkiweyimaak kaaTipencikenitc ehtepweyenimaawaatc, e'waapamiwaatc eshikipa'okooyaan, onciteinenimowak, awahshime e'animashkawenimowaatc ciwaawiintamowaatc Kishemanitoo otipaacimowin, ekaa ehkohtaacihsikwaa.

¹⁵ Tepwe miinawaa aaninta otishikakiihkwenotawaawaan Christan aayaahshentamowinink kaye kakwepahkinaatiwinink. Aanint itahsh kwayahk wiiminowiici'iwewak, e'oncikakiihkwewaatc.

¹⁶ Okoweniwak saaki'iwewinink ishihcikewak. Okihkentaanaawaa Kishemanitoo ekii'inanohkii'itc cikanoocikehtamawaatamaan i'i minwaacimowin.

¹⁷ Iki tahsh pehkaanisiwaatc kaawiin tepwewinink otishikakiihkwenotawaahsiwaawaan Christan. Wiinawaa tahsh iko ehta wii'niikaanentaakosiwak. Inentamook aaniihsh keyaapi sanakisiwin ewiihkakwe kashkihtamawiwaatc o'omaa eshikipa'okooyaan.

¹⁸ Kaawiin inkotano nintinentansiin. Niminwentam kiishpin ehta kakiihkwenotawintc a'a Christ, aaniin iko keishihsenik, maakishaa nahpaac inentamowinink, maakishaa kaye kwayahk inentamowinink oncikakiihkwenotawintc. Shikwa keyaapi ninkani‑ishiminwentam.

¹⁹ Ninkihkentaan aaniihsh e'anami'ehtamawiyek kaye ehpiwiici'imitc Ciisahs Christ otAhcaahkwan, ninkaoncipakitinikoo.

²⁰ Mii 'owe ehkihcimihsawentamaan ehpakohsenimoyaan, ekaa wiihkaa kekoon cioncimenihshentansiwaan, mooshak itahsh cimashkawenimoyaan, memintake ko kaye noonkom, enikiniyaan iko cikihtentaako'ak a'a Christ, kemaa pimaatisiyaan kemaa nipoyaan.

²¹ Wekonen aaniihsh niin waa'oncipimaatisiyaan? Christ ehta 'awe kaaoncipimaatisiyaan. Miitahsh i'i nipoyaan nawac nintaaminohsa'ikon.

²² Kiishpin tahsh keyaapi kashkihtooyaan minoanohkiiwin keyaapi niwiiyawink pimaatisiyaan, miihsh i'i eshiwawaanentamaan aaniin mayaa keishihcikeyaan.

²³ Niishwayak nintoonciwiihkopinikoo. Maawac nimihsawentaan cimaacaayaan ciawiwiiciiwak 'awe Christ, mii 'iwe maawac keonishihshink.

²⁴ Kiinawaa tahsh nawac taa‑antawentaakwan keyaapi niwiiyawink cipimaatisiyaan.

²⁵ Mii 'iwe ehkwayahkwentamaan, e'ishikihkentamaan keyaapi ciniayaayaan. Keyaapi kikaniwiicipimaatisiimininim kahkina, kikaishiwiici'ininim cinimaaciishkaayek kaye cini‑ishimoocikentamek kitepwehtamowiniwaank.

²⁶ Ahpiihsh miinawaa wiiciayaaminakook nawac keyaapi kekoon kika‑ayaanaawaa cionci‑ishpenimek Christ Ciisahs e'aniwiiciiwek.

²⁷ O'owe ehta kitinininim: ishipimaatisiyok cipeshikonaakwahk eshiayaanik ominwaacimowin a'a Christ. Miihsh kiishpin ishaayaan ciwaapaminakook, kiishpin kaye waapamihsinowinakook, ninkanoontaan eshiayaayek, keyaapi ehsoonkikaapawiyek peshikwan iko maamaw e'inentamek, peshikwan ehta kinantawentamowiniwaank enikohk cimaamawi⁠wiici'itiyek, ehkakwemaacaahtooyek i'i tepwewin kaaishitepwehtamank 'iwe kaaishinoontamank minwaacimowinink.

²⁸ Keko kohsaahkekwaanik ikiweniwak kenakaashkawinekwaa. Taoncikihkentamook wiinawaa ewii'nihshiwanaatisiwaatc, kiinawaa tahsh cipimaaci'ikoowisiyek. Kishemanitoo aaniihsh a'awe kaawiici'inek.

²⁹ Kikii'miinikoowisim cipamiihtawek 'awe Christ. Kaawiin ehta ehtepwehtawek, i'iwehsh kaye cioncikakwaatakihtooyek.

³⁰ Kaye kiinawaa ciwiici'iweyek i'imaa miikaatiwinink, i'iwe niin otaanaank kaakii'ishiwaapamiyek kaye hsa ko noonkom eshinoontamek ehtashimiikaasoyaan.