ᐹᐃᓬᐄᒪᓐ 1 - Ojibwe Kihcimasina'ikan

¹ Niin Pwaal (Paul), kaaonci kipa'okooyaan Christ Ciisahs. Niwiiciiwaa Timahti (Timothy) kiicihkiwensinaan. Kitooshipii'amaakoo kiin Paailiiman (Philemon) kaasaaki wiiciiwikooyan niwiitanohkiimaakaninaan.

² Iki kaye nintako'-oshipii'amawaanaanik otepwehtamook kaamaawaci'itiwaatc kiwaahkaa'ikanink a'a kaye nintawemaanaan Aahpiya (Apphia) onci Christink. A'a kaye niici shimaakanihshiiminaan Aarhkihpahs (Archippus).

³ Taka Kishemanitoo Koohsinaan, kaaTipenciketc Ciisahs Christ kaye kika shawenimikowaa cimiininekwaa kaye pisaanentamowin.

Paailiiman osaaki'iwewin, otepwehtamowin kaye

⁴ Niicihkiwe Paailiiman entahswaa kiianami'aayaan kitanami'ehtamawin e'miikwehciwenimak kaye ninKishemanitoom.

⁵ Ninaanoontam ehshawenimimatc kahkina Kishemanitoo opimaatisiima', ehtepweyenimatc kaye kaaTipenciketc Ciisahs.

⁶ Miitahsh eshi anami'aayaan o'o kaashi wiiciintiyank i'imaa kitepwehtamowininaanink, miihsh aanciihke cinihsitohtamank kahkina eshi shaweniminank e'⁠wiici pimaatisiimank Christ.

⁷ Niicihkiwensi, wiinke hsa nintooncikihciciihkentam, nintooncimashkawentam kaye i'i kaashi saaki'iweyan. Kahkina kiciihki'aak ote'iwaank Kishemanitoo opimaatisiima'.

Kaa'ishikakwetwehtamawaatc Onehsimahsan

⁸ Miitahsh kaaonci tepakenimoyaan e'owiicihkiwentiyank i'imaa Christink cikii'-anooninaampaan aaniin kekii'-ishihcikeyampan.

⁹ Ehsaaki'inaan tahsh, kiwii'mihci kakwecimin. Niin iitok a'a Pwaal ahkiwensi, kipa'waakan onci Christ Ciisahs.

¹⁰ Miitahsh o'owe eshi kakweciminaan, ehkakwetwehtamawak Onehsimahs kaaokosihsiyaan i'imaa Christink. Oteten ekii'-inawemitc otahcaahkonk mekwaa ehkipa'okoowak.

¹¹ Mii wa'a otaanaank kekoon kaakii'-inaapaci'aahsiwatc. Noonkom tahsh kikihtaapaci'aa, keniin tahsh ninkihtaapaci'aa.

¹² Miitahsh a'a kaakiiwenisha'amawinaan taapishkoo ninte' e'⁠ishinisha'amawinaan.

¹³ Ninantawenimaa o'omaa cikii'ayaahpan ciwiici'ihpan o'o kaakipa'okooyaan minwaacimowin onci. Wiin ciwiici'ihpan cikii'-naapishkawihkipan.

¹⁴ Kaawiin tahsh kekoon niwii'-ishihcikehsii eshi antawentansiwan. Miihsh eshi mihsawentamaan kiin iko i'i kitinentamowinink ci'onci'-ishihcikeyan. Kaawiin kekoon niwii'-ishihcikehsii paanimaa kii'inentaman.

¹⁵ Mii maawiin i'i kaakii'onci nakanihk acina, ahpii tahsh pikiiwetc mooshak ciwiiciiwihk.

¹⁶ Kaawiin wiin ehta anohkii'aakanink ci'inakimatc, kaasaaki'intc tino wiicihkiwemaa ci‑inenimatc. Wiinke niin ninkihtaapatenimaa. Nawac tahsh kiin kika kihtaapatenimaa ehtinowitc anohkii'aakan kaye tahsh owiicihkiwensiimaa ehtepweyenimaatc Christan.

¹⁷ Kiishpin tahsh inenimiyan kiwiitanohkiimaakan, kiiwe otaahpin tahsh taapishkoo niin kekiih tootawiyampan.

¹⁸ Kiishpin tahsh kekoon kaa'ishi wanitootawinokwen, kiishpin kaye kekoon masina'amawihk, niin i'i masina'ikeihshin.

¹⁹ Niin hsa piko kaaoshipii'amawinaan: “Niin iko kika tipa'amawin.” Kaawiin memwehc cimaamihkoonotamawinaan, kiin iitok iko kimasina'amawihsh i'iwe kaakii'ishi wiici'inaampaan.

²⁰ Taka tahsh kaasaaki'inaan niicihkiwensi, minotootawihshin kaaTipenciketc onci. Kitoowiicihkiwensiimin iitok i'imaa Christink. Wiici'ihshin ciciihkentamaan.

²¹ O'o tahsh kaaishipii'amawinaan ehkakweciminaan, ninkihkentaan i'i ci'ishihcikeyan. Ninkihkentaan iko awahshime ci'ishihcikeyan.

²² Kaye tahsh kikakwecimin cikwayaancihtooyan pahkehcikan keshi nipaayaan. Miihsh eshi pakohsentamaan Kishemanitoo ci'ishihciketc kahkina kaashi kakwecimek miinawaa cipikiiwenotawinakook.

Ishkwaac kiipooshoo'aatc

²³ Kewiin Ehpahparahs (Epaphras) kipooshoo'ikowaa kaawiicikipa'okoomitc o'omaa Christ Ciisahsink onci.

²⁴ Iki kaye kaawiitanohkiimakwaa kipooshoo'ikowaak. Miihsh eshinihkaasowaatc Maarhk (Mark), Eristaarhkahs (Aristarchus), Tiimahs (Demas), a'a kaye Lok (Luke).

²⁵ Taka kaaTipenciketc Ciisahs Christ kaashi kishewaatisitc kika wiiciiwikowaam.