Oroot 4 - Ojibwe Kihcimasina'ikan

Oroot Kiiwiitiketc

¹ Poowaas (Boaz) hsa kii‑ishaa kaakii ishi'ayaanik kihci ootenaawi ishkwaantem, mii hsa weti kaa⁠ishi apitc. Okii waapamaan tahsh eh⁠pimohsenitc ininiwan kaakiih tashimaatc nawac pehsho e⁠inawemaanitc Iilimelehkoon (Elimelech). Miihsh Poowaas kaa'inaatc, “Ampe o'omaa nahke ishi pahken.” Miitahsh shemaak kaa⁠ishi pahkenitc.

² Miihsh kaye Poowaas kaakii antomaatc mitaahso kaakii niikaanentaakosinitc ootenaank, ekiih kanoonaatc ci⁠namatapinitc. Miihsh kewiin i'imaa kaa⁠ishi onapitc.

³ Miitahsh kaa'inaatc ini otinawemaakanan, “Neyoomii (Naomi) hsa weti Moowap (Moab) ahkiink kaakiih pi'onci kiiwetc otataawaaken otahkiimini kaakiih tipentaminitc kaakii inawemimankipan Iilimelehkoon.

⁴ Kinantawenimin tahsh ci⁠kihkentaman. Kiishpin tahsh wii⁠ataawewatc i'i otahkiim noonkom hsa ataawen mekwaa e⁠ayaawaatc o'omaa oko kaa⁠niikaanisiwaatc ootenaank, oko kaye kihci aya'aak. Kiishpin tahsh wii⁠ataaweyan, tipaacimon, aaniihsh mii 'i eshinaakwahk kiin nihtam eh⁠tipinawewisiyan ci⁠ataaweyan. Niin tahsh iko i'imaa tani ishihse ci⁠ataaweyaan,” kii‑ihkito. Ini tahsh nawac pehsho inawemaakanan kii‑ihkitowan, “Eya', niwii ataawe.”

⁵ Miihsh Poowaas kaa'inaatc, “Ahpii kiishikahk ataamatc Neyoomii i'i ahkiini, mii hsa kaye eshinaakwahk ci⁠ayaawatc Oroot (Ruth) eshinihkaasotc Moowap ahkiink wenciitc, ci⁠nihtaawiki'imatc kaye ke⁠oniicaanihsitc. A'a tahsh inini kaa⁠pimaatisihsik keyaapi ci⁠tipentaminitc opiiwesiima' i'i ahkiini,” okii inaan.

⁶ Ini tahsh nawac pehsho inawemaakanan kii‑ihkitowan, “Kiishpin hsa 'i ishihsek, intawaa hsa ninka pakitinaan kaashi tipinawewisiyaan niin nihtam cikii ataaweyaampaan i'i ahki, aaniihsh niniicaanihsak kaawiin mihsawaa otaani tipentansiinaawaa. Kiin hsa intawaa ataawen, kaawiin niin niwii ataawehsii,” okii'ikoon.

⁷ Miitahsh o'o mewisha kaa⁠ishihcikewaatc Isriyalak (Israel) awiya kiiwii ataawetc ahkiini, komaa kaye awiya kiiwii meshkotoonank otahkiim, a'a hsa inini kaakii ataawaaketc otahkiim kii⁠kiihtahkisine ekii miinaatc i'i omahkisin ininiwan kaakii wii ataamikotc. Miitahsh o'o kaa⁠ishihcikewaatc e⁠nana'ahtoowaatc kekoon.

⁸ Miihsh ini pehsho inawemaakanan kaa'ikotc, “Kiin hsa intawaa ataawen i'i ahki.” Miitahsh kaa⁠ishi kiihcikoshkaminitc peshik omahkisinini ekii miinikotc Poowaas.

⁹ Miitahsh Poowaas kaa'inaatc kaa⁠niikaanisinitc, i'i kaye kahkina i'imaa kaa‑ayaanitc, “Kiinawaa kiwaapamihshim noonkom kaa⁠kiishikahk ekii ataamak Neyoomii kahkina kekoonini kaakiih tipentaminitc Iilimelehkopanen. Kahkina kaye kekoonini kaakiih tipentaminitc Kiliyanan (Chilion), ini kaye Melanan (Mahlon).

¹⁰ A'a hsa kaye Oroot, Melan kaakii'inintc okiiwahshihkweman, mii hsa awe ke⁠wiiwiyaan, ci⁠ompiki'imak kaye ke⁠oniicaanihsitc. A'a hsa ininiipan kaa⁠pimaatisihsik otinawemaakana' ci⁠tipentaminitc i'i ahki. Owiinsowin kaye a'a ininiipan cini ayaanik kaashi ayaanitc otinawemaakana', kaakii ishi nihtaawikitc kaye. Kiinawaa iitok kiwaapamihshim noonkom kaa⁠kiishikahk,” kii‑ihkito.

¹¹ Iki tahsh kaa⁠niikaanisiwaatc, iki kaye i'imaa kaa‑ayaawaatc kii‑ihkitowak, “Niinawint hsa tepwe kiwaapamikoo. Taka kaye kaaTipenciketc oka ishi'aan kiwiiwan taapishkoo Orehcalwan (Rachel), Liiyawan (Leah) kaye kaakii inentaakosinitc. Niipiwa' ekii ayaawaawaatc apinoonciisha' Cekaponk (Jacob) ekii ontinaawaatc. Taka kaye kika wenootis i'imaa kaashi inawentiwaatc iki Ehparaht kaa⁠ishi tipentaakosiwaatc, wiinke kaye ci⁠kihkentaakosiyan i'imaa Pehtalihemink (Bethlehem).

¹² Taka kaaTipenciketc ke⁠miinihk apinoonciisha' kiwiiwink onci, kitaawin ta⁠ishinaakwan kaakii ishinaakwaninik Piiris (Perez) otaawin. Mii iitok a'a kaakii okosihsimikotc Cootawan (Judah) kaakii ishinihkaasonitc, omaamaan tahsh Temaar (Tamar) kii‑ishinihkaasowan,” mii 'i kaa'ikotc.

Poowaas, I'i Kaye Opiiwesiima' Ehtashinsonitc

¹³ Poowaas (Boaz) tahsh okiih kiiwewinaan Orootan (Ruth) ekii wiiwitc. Miihsh a'a ihkwe kaaTipencikenitc kaakiih shawenimikotc. Apinoonciishan okii ayaawaan ekiih kwiiwisenhsiwinitc.

¹⁴ Ihkwewak tahsh okii'inaawaan Neyoomiiwan (Naomi), “Taka ta⁠miikwehciwentaakosi kaaTipenciketc, e⁠miinihk keni naanaakaci'imihk noonkom kaa⁠kiishikaninik. A'a tahsh kwiiwisenhs tani kihci inentaakwanini owiinsowin i'imaa Isriyalihkaank (Israel).

¹⁵ Kihshimihs hsa kaye kisaaki'ik, aahpici kaye niipiwa' kipi tootaak ahpiihc wiin niishwaahso (7) okosihsimaak kekiih tootawihkwaapan. Noonkom itahsh kaa⁠kiishikaninik kimiinik kwiiwisenhsan ke⁠oyooshihsiwatc. Mii hsa tahsh i'imaa ke⁠onci kiiwe mashkawaatisiyan, miikaye a'a keni naanaakaci'ihk kihci ayaa'aawiyan,” okii'ikoo'.

¹⁶ Miitahsh Neyoomii kaakii otaahpinaatc ini apinoonciishan ekiih tahkonaatc ociinkwanink, wiin kaye okii naanaakaci'aan.

¹⁷ Ihkwewa' tahsh pehsho kaakii wiicitaamaatc kii‑ihkitowa', “Neyoomii nihtaawikiwan okosihsan,” kii‑ihkitowa'. Oopet (Obed) itahsh okii ishinihkaanaawaan ini kwiiwisenhsan. Oopet hsa kii⁠ani okosihsi Cehsiwan (Jesse), Tepitoon (David) kaakii otetenitc.

¹⁸ Miiwa' itahsh ono Piiris (Perez) kaakii ani ayaanihke nihtaawiki'aatc. Piiris kii⁠okosihsi Hesranan (Hezron).

¹⁹ Hesran kii⁠okosihsi Oraaman (Ram). Oraam kii⁠okosihsi Aminataapoon (Amminadab).

²⁰ Aminataap kii⁠okosihsi Nahshanoon (Nahshon). Nahshan kii⁠okosihsi Saalmanan (Salmon).

²¹ Saalman tahsh kii⁠okosihsi Poowaasan. Poowaas tahsh kii⁠okosihsi Oopetan (Obed).

²² Oopet itahsh kii⁠okosihsi Cesiin. Cehsi tahsh kii⁠okosihsi Tepitoon.