Oroot 3 - Ojibwe Kihcimasina'ikan

Oroot Kiimihkawaatc Ke'onaapemitc

¹ Neyoomii (Naomi) tahsh okii'inaan ohshimihsan, “Mii hsa 'i eshinaakwahk ci⁠mihkawakipan ke⁠onaapemiyan, kiin hsa piko ci⁠ayaayan ke⁠ishitaayan.

² A'a ohsha Poowaas (Boaz) kaa⁠inawemank kaakii wiitanohkiimimatc kaa⁠ihkwewinitc otanohkii'aakana', onaakohshininik iitok owiih kisiiyaashimaan parlii tino manoominan weti kaa⁠tashi pawakanaasonitc parlii tino manoominan.

³ Taka hsa kisiihsipanintison, minaako'otison kaye. Maawac iko wenishihshinkin kikikishkikanan pihsihkamoohkan, ci‑ishaayan aaniinti waah⁠tashi pawakanaancikenaaniwank. Kika manaa kihkenimik weti e⁠ayaawatc piinihsh ci‑ishkwaa wiihsinitc, piinihsh kaye ci‑ishkwaa minihkwetc.

⁴ Kakwe kihkenimaahkan itahsh aanti keshi kawihshimotc, kii‑ishkwaa kawihshimotc itahsh, kika naasihkawaa eshi pimihshink. Paahkiikipinaahkan eshi sitehshink, mii hsa tahsh i'imaa keshi pimihshinan. Miitahsh i'i ahpii ke⁠wiintamawihk aaniin ke⁠ishihcikewatc,” mii 'i kaakii'inaatc.

⁵ Miihsh Oroot (Ruth) kaa'inaatc osikohsan, “Kahkina hsa kaa'ishiyan ninka ishihcike,” okii'inaan.

⁶ Miihsh Oroot kaakii ishaatc kaakiih tashi pawakanaasonitc parlii tino manoominan, ekii ishihciketc kahkina kaakii ishi anoonikotc osikohsan.

⁷ Ahpii tahsh Poowaasan ekii ishkwaa wiihsininitc, ekii ishkwaa minihkwenitc kaye aahpici kiih⁠ciihkamanci'owan. Miitahsh kaakii ishaanitc ekii anta nipaanitc eshi ohkohsininikin parlii tino manoominan. Mii hsa tahsh i'i ahpii Oroot kaakiih kiimooci naasihkawaatc eshi pimihshininitc. Miitahsh kaa⁠ishi paahkiikipinaatc eshi sitehshininitc, miihsh i'imaa kaa⁠ishi pimihshink.

⁸ E⁠aapihtaa tipihkaninik tahsh Poowaas kiih⁠koshkosi ekiih kwehkihshink, kiih⁠koshkwentam tahsh wiinke ekii mihkawaatc ihkwewan eh⁠pimihshininitc eshi sitehshink.

⁹ Miihsh kaa⁠ihkitotc, “Awenen kiin,” kii‑ihkito. A'a tahsh ihkwe kii‑ishi nahkwehtam, “Niin Oroot kaakii anohkiihtawinaan. Taka akwana'ohshin i'i kaa‑akwaniiyan, kiin iitok pehsho kitinawemin,” kii‑ihkito.

¹⁰ Miihsh o'o Poowaas kaa'inaatc, “KaaTipenciketc hsa kishawenimik, miitahsh o'omaa eshi naakohtooyan o'o noonkom ishkwaac kaa⁠ishihcikeyan nawac ekihci inentaakwahk ahpiihc wiin i'i nihtam kaakii ishihcikeyan. Ekiih kakwe kashki'aahsiwatwaa oshkiniikiwak kaa⁠wenootisiwaatc, iki kaye kaa⁠kitimaakisiwaatc.

¹¹ Oroot keko tahsh sekisihken, ninka ishihcike hsa aaniin kaashi kakwecimiyan. Kahkina kaye pemaatisiwaatc o'omaa ootenaank kikihkenimikook wiinke eh⁠sasekaa ihkwewiyan.

¹² Tepwe hsa pehsho kitinawemin, shaakooc itahsh ayaa peshik inini nawac pehsho enawemihk.

¹³ Miitahsh o'omaa ayaan kapetipihk. Kishepaawakahk itahsh kika kihkentaamin taka ciwii otaahpininokwen ci⁠naanaakaci'ihk. Kiishpin tahsh inentank ci⁠naanaakaci'ihk, mii 'iwe kwayahk, maano hsa kika naanaakaci'ik. Kiishpin itahsh wiin inentansik ci⁠otaahpinihk, kehcinaac iko e⁠kehcinaa'oyaan kaaTipenciketc wiin misiwe eh⁠tipenciketc, kitahshotamawin niin hsa piko kika otaahpinin ci⁠naanaakaci'inaan. Miitahsh i'imaa ishi pimihshinin piinihsh ci⁠waapank,” kii‑ihkito.

¹⁴ Miitahsh i'imaa Orootan kaa⁠ishi pimihshininitc eshi sitehshink. Wiipa tahsh cipwaa piitaapaninik kii⁠wanishkaawan cipwaa nihsitawinawimintc. Miihsh Poowaas kaa'inaatc, “Taka ta⁠manaa kihkentaakwan ihkwe ekiih piishaatc o'omaa kaa⁠tashi pawakanaancikenk,” kii‑ihkito.

¹⁵ Miihsh Poowaas kaa‑ani'inaatc Orootan, “Miishihshin i'i kaa⁠kashkiikiiyan, ci⁠tashwekinaman,” okii'inaan. Miihsh kaa⁠ishihcikenitc. Miihsh i'imaa kaashi kashkiikinank naanimitana tahso tipaapiishkoocikan parlii tino manoominan ci⁠kiiwewinaanitc, miihsh kaa⁠ishi pihciwane'aatc. Miitahsh Oroot ootenaank kaakii ishi kiiwetc.

¹⁶ Ahpii tahsh kaapi takohshink otaawinink osikohsan okii'ikoon, “Aaniin tahsh kaa‑ayishiiyan?” okii'ikoon. Miihsh Oroot kaakii wiintamawaatc aaniin kaa⁠ishi wiitoohkaakotc ini Poowaasan.

¹⁷ Miitahsh kaye kaa‑ani ihkitotc, “Inashke kaye naanimitana tahso tipaapiishkoocikan parlii tino manoominan ninkii miinik. Aaniihsh kii‑ihkito, ‘Kaawiin ta⁠onishihshinsinoon ci⁠pakaminanawisiyampan,’ ” okii'inaan.

¹⁸ Miihsh Neyoomiiwan kaa'ikotc, “Nihshimihs, pinamaa ahkawaa'on taka ke⁠ishihsekwen kekoon. Kaawiin ohsha Poowaas ta‑anwepihsii paanimaa kii⁠nana'ahtootc kahkina kekoon,” okii'ikoon.