Oroot 2 - Ojibwe Kihcimasina'ikan

Oroot Kiimooshakiniketc Okihtikewahkamikoniink Poowaasan

¹ Neyoomii (Naomi) tahsh kii⁠ayaawaan otinawemaakanan, onaapemipaniink ekii onci inawemaatc, Poowaas (Boaz) ekii ishinihkaasonitc. A'a tahsh inini wiinke kii⁠wenootisi, wiinke kaye kii⁠mashkawentaakosi. Kii⁠ontahkaanesi kaye kaakii ontahkaanesinitc Iilimelehkopanen (Elimelech).

² Aapitink tahsh eh⁠kiishikaninik Oroot (Ruth) Moowap ihkwe (Moabitess) okii'inaan Neyoomiiwan, “Taka pakitinihshin ci‑ishaayaan kihtikewahkamikonk cini mooshakinamaan parlii tino manoominan kaa⁠paninaawaatc iki kaa⁠mooshakinikewaatc. Awiya maawiin ninka mihkawaa ke⁠minwaapamitc ci⁠piminisha'wak,” okii'inaan. Miihsh Neyoomiiwan kaa⁠ishi nahkwehtaakotc, “Nihshimihs, pisaan ishaan.”

³ Miitahsh Oroot kaa⁠ishi maacaatc ekii ishaatc kihtikewahkamikonk. Okiih piminisha'waa' itahsh kaakii mooshakinikenitc ekii ani mooshakinank kaakiih pininaminitc. Na'itaak iitok kii‑ishaa kihtikewahkamikonk kaakiih tipentaminitc Poowaasan kaakii wiici ontahkaanesimaanitc Iilimelehkopanen.

⁴ Naanaake tahsh Poowaas Pehtalihemink (Bethlehem) kiih⁠pi'onci takohshin, miihsh kaa'inaatc omooshakinike', “Taka kaaTipenciketc kika wiiciiwikowaa.” Miitahsh kaa⁠ishi nahkwehtaakotc, “Taka kaaTipenciketc kika shawenimik.”

⁵ Miitahsh Poowaas kaakiih kakwecimaatc otanohkii'aakanan kaakii niikaaniihtamawaanitc omanishike', “Awenen a'a tino oshkiniikihkwe,” okii'inaan.

⁶ Miitahsh kaa⁠ishi nahkwehtaakotc, “Mii'iitok a'a oshkiniikihkwe Moowap ahkiink kaakiih pakami wiiciiwaatc Neyoomiiwan, Moowap ahkiink kiih⁠pionci takohshininitc,” okii'ikoon.

⁷ “Ninkiih kakwecimik ohsha a'a ihkwe ci⁠pakitinak cini maamooshakinank kaa⁠pininaminitc omooshakinike'. Aahpici wiipa shepaa kii⁠maatanohkii, miitahsh payesh e⁠anwepitc, akawaahtenk hsa nanamatapi,” okii'ikoon.

⁸ Poowaas tahsh okii'inaan Orootan, “Oshkiniikihkwe, weweni pisintawihshin. Keko pahkaan kihtikewahkamikonk ishaahken ci⁠awi mooshakinikeyan, mii kaye eninaan, mii 'omaa ayaan ci⁠wiitanohkiimatwaa oko ihkwewak.

⁹ Kanawaapam itahsh aaniinti eshi manishikewaatc ci⁠ani piminisha'watwaa. Weweni kaye ninkiih kanoonaak anohkii'aakanak kaa⁠ininiiwiwaatc ci⁠papaamenimihsinowihkwaa, wii⁠minihkweyan kaye pisaan iko onci minihkwen i'imaa ahtoopaanink anohkii'aakanak kaa⁠mooshkinepatoowaatc,” okii'inaan.

¹⁰ Miitahsh Orootan kaakii animihkohtaanitc mihtahkamik enaahsamiitc Poowaas ekii'ikotc, “Wekonen tahsh wenci minwaapamiyan, wekonen kaye wenci minotootawiyan e⁠mayakisiyaan?” okii'ikoon.

¹¹ Miihsh o'o Poowaas kaa'inaatc, “Kahkina hsa kekoon niwiintamaakoo aaniin kaakiih pitootawatc kisikos ahpii kii‑ishkwaa pimaatisitc kaakii onaapemiyan. Ekii nakanatc kitete, kimaamaa kaye ekii nakataman kaye kitahkiim, o'omaa ekiih piishaayan ewii wiici pimaatisiimatwaa wiihkaa otaanank kaakiihpi kihkenimaahsiwatwaa.

¹² Taka kaaTipenciketc kika tipa'amaak i'i kaapi ishihcikeyan. Taka kaye kika mooshkine tipa'amaak a'a kaaTipenciketc Isriyalak (Israel) kaa⁠oKishemanitoomiwaatc, ehpi naacipa'iwaanatc oninkwiikanink ci⁠onci naatamawihk,” okii'inaan.

¹³ Miihsh Orootan kaa⁠ishi nahkwehtaakotc, “Nintookimaam, etatawe hsa weweni kiminotootawihsh. Nintoonci minomanci' kaye noohkaac eh⁠kanooshiyan, aanawiin noonta' e⁠aahpiihtentaakosiyaan kaa‑ahpiihtentaakosiwaatc kaa⁠ihkwewiwaatc kitanohkii'aakanak,” okii'ikoon.

¹⁴ Ahpii tahsh e⁠wiihsininaaniwaninik Poowaas okii'inaan Orootan, “Ampe omaa ci⁠amwatc pahkweshikan, ci⁠onci cehkipiinatc kaye kipahkweshikanim o'omaa ahpancikanink.” Okii ahshamaan tahsh kaye ci⁠miicinitc kaa⁠osaawaahkitenikin pahkweshikaniminan. Oroot tahsh okii wiitapimaa' omanishike', ekii wiihsinitc wiinke ekii minomanci'otc, kii‑ishkohseni kaye miicim kaakii ahshamintc.

¹⁵ Kaa⁠ishkwaa pasikwiinitc tahsh ekii awi anta manishikenitc, Poowaas okii inaa' otanohkii'aakana', “Maano pakitinihk cishi mooshakiniketc i'imaa kaashi ayohkohsininikin kihtikaanan. Keko kaye nishki kanoonaahkek.

¹⁶ Oncita kaye pininamok aaninta kihtikaanan kaa⁠ohkociinamek kepi mooshakinank, keko kaye kishii kanoonaahkek,” okii inaa'.

¹⁷ Miitahsh i'i Oroot kaakii mooshakiniketc i'imaa kihtikewahkamikonk piinihsh ekii ani onaakohshininik. Miitahsh kaa⁠ishi pawakanaantank kaakii mooshakinank. Niishtanashinaanan (25) tahso tipaapiishkoocikan kii⁠onciiniwan parlii tino manoominan.

¹⁸ Miitahsh kaakiih kiiwewitootc kaakii mooshakinank ekii ishaatc ootenaank, ekii waapanta'aatc osikohsan aaniin minihk kaa⁠mooshakiniketc. Ekii ahshamaatc kaye i'i miicim kaakii ishkohsenik kii⁠naawahkwe wiihsiniwaatc.

¹⁹ Miihsh Neyoomiiwan osikohsan okiih kakwecimikoon, “Aanti kaah⁠tashi maamooshakinikeyan noonkom kaa⁠kiishikahk? Awenen kaah⁠tipentank kihtikaanahkamik kaakiih tananohkiiyan? Taka, a'a kaakii minotootawihk ta⁠shawentaakosi,” okii'ikoon. Miihsh Oroot kaakii wiintamawaatc osikohsan awenenan tepentaminitc kaakiih tananohkiitc ekii ihkitotc, “A'a hsa inini kaa⁠tipentank kaakiih tananohkiiyaan noonkom kaa⁠kiishikaninik Poowaas ishinihkaaso,” kii‑ihkito.

²⁰ Miitahsh o'o Neyoomiiwan kaa⁠ihkitonitc, “Taka kaaTipencikenitc oka shawenimikoon, mooshak kaa⁠minotootawaanitc eshi ahshotamawaanitc kaa⁠pimaatisinitc, i'i kaye kaa⁠pimaatisihsinik.” Miihsh kii⁠ani ihkitonitc, “A'a hsa inini pehsho kitinawemaanaan, mii' iitok a'a peshik kaa⁠ishinaakwaninik ci⁠naanaakaci'inankipan,” kii‑ihkitowan.

²¹ Miitahsh Oroot kaa⁠ihkitotc, “Aanciko tahsh kaye ninkii'ik, ci⁠onishihshininikipan pehsho ci⁠wiitanohkiimimak otanohkii'aakana' piinihsh ci⁠ani ishkwaahsenik o'o kaa⁠manishikenaaniwaninik.”

²² Miihsh Neyoomiiwan osikohsan kaa'ikotc, “Nihshimihs, taa⁠onishihshin iitok ci⁠wiitanohkiimimatipan ini kaa⁠ihkwewinitc otanohkii'aakana'. Maakishaa pahkaan kihtikewahkamikonk ishaayan kita pimenimikoo,” okii'ikoon.

²³ Miitahsh Oroot pehsho kaa⁠ishi wiitanohkiimaatc i'i ihkwewa' ekii mooshakiniketc piinihsh ekii ani ishkwaahsenik kaakii manishikaniwinitc parlii tino manoominan, pahkweshikaniminan kaye. Osikohsan hsa okii wiici ayaamaan.