Oroot 1 - Ojibwe Kihcimasina'ikan

Iilimelehk Kii'ishikositc Weti Moowap Ahkiink

¹ Ahpii tahsh Isriyalak (Israel) cipwaa ayaawaawaatc kihciokimaa' ke⁠tipenimikowaatc, i'imaa hsa ahkiink kaakii ishi'ayaawaatc kaawiin miicim kii⁠ayaahsinini aaniihsh kiih⁠paahteni i'i ahkiini. Peshik tahsh kii⁠ayaa inini Pehtalihem (Bethlehem) ootenaank, Coota (Judah) ahkiink kaakii onci tipentaakwaninik. A'a hsa inini okii maaciinaan wiiwan, i'i kaye niishin okosihsa' ekii ishiwinaatc weti ewii awi ayintaatc Moowap (Moab) ahkiink.

² A'a hsa inini Iilimelehk (Elimelech) kii‑ishinihkaaso, wiiwan Neyoomii (Naomi) kii‑ishinihkaasowan. Ini tahsh peshik okosihsan Melan (Mahlon) kii‑ishinihkaasowan, ini tahsh kotak Kiliyan (Chilion) kii‑ishinihkaasowan. I'imaa hsa kaakii ishi inawentinitc Ehparaht (Ephrath) kii‑ishi tipentaakosiwak. Mekwaa hsa tahsh weti Moowap ahkiink e⁠ayaawaatc,

³ Iilimelehk kii‑ishkwaapimaatisi, Neyoomiiwan kaakii wiiwitc. Miihsh a'a ihkwe Neyoomii niishin ehta okosihsa' okii wiici ayaamikoo'.

⁴ Iki tahsh okosihsimaak okii wiitikemaawaa' ihkwewa' Moowap ahkiink wenciinitc. Ini tahsh peshik ihkwewan Orpa (Orpah) kii‑ishinihkaasowan, ini tahsh kotak ihkwewan Oroot (Ruth) kii‑ishinihkaasowan. Ninkoci ko mitaahso pipoon e⁠ani ishihsenik weti kaakii ishi'ayaawaatc.

⁵ Minciniish Melan, a'a kaye Kiliyan kii‑ishkwaa pimaatisiwak. Mii hsa tahsh a'a Neyoomii ekii mihci peshikotc, aaniihsh onaapeman, i'i kaye niishin okosihsa' kaawiin kiih⁠pimaatisihsiiwa'.

Neyoomii Kiihkiiwe'ishaatc Pehtalihemink

⁶ Mekwaa tahsh Neyoomii (Naomi) Moowap (Moab) ahkiink e⁠ayaatc kii⁠noontam kaaTipencikenitc ekii minohse'aanitc opimaatisiimini ekii miinaanitc miicim. Miitahsh shemaak kaakii oshiihtaatc ewiih kiiwetc, ewii nakatank Moowap ahki. Ohshimihsa' kaye okii wiiciiwikoo'.

⁷ Miitahsh kaakii nakatank i'imaa kaakii ishi ayaatc, niishin ohshimihsa' ekii wiiciiwikotc, ekii ishaawaatc inahke eshi'ayaanik Coota (Judah) ahki.

⁸ Miihsh Neyoomii kaa'inaatc minciniish ohshimihsa', “Taka ani kiiwek, ci‑ishaayek eshi'ayaawaatc kimaamaawaak. Taka kaaTipenciketc kika ishi minohse'ikowaa taapishkoo kaa⁠pishi minotootawiyek, iki kaye kaakii ishi minotootawekwaa kaakii ishkwaa pimaatisiwaatc.

⁹ Taka kaye kaaTipenciketc kika inenimikowaa miinawaa ci⁠onaapemiyek, ci⁠ayaayek aanti ke⁠ishitaayek,” okii inaa'. Miihsh Neyoomii kaakii ociimaatc ohshimihsa', miihsh kaa⁠ishi kihci mawinitc ekiih kishiiwenitc.

¹⁰ Miitahsh o'o kaa'ikotc, “Kaawiin hsa 'i niwii ishihcikehsiimin. Kehcinaac hsa ko kiwii wiiciiwikoo kaawiih kiiwenotawatwaa iki kiicipimaatisiik,” okii'ikoo'.

¹¹ Miihsh o'o Neyoomii kaa⁠ishi nahkwehtawaatc ohshimihsa', “Maacaak kiiwek. Wekonen tahsh waa⁠onci kiiwe wiiciiwiyek? Nintaa kashkihtoon ina miinawaa cikii okosihsiyaampaan i'imaa nimihsataank kiinawaa kekii onaapemiyekipan?

¹² Nihshimihsak, maacaak ani kiiwek, onsaam iitok aasha ninkihci aya'aaw ci⁠onaapemiyaampaan. Kiishpin ihkitoyaan ehtanenimoyaan ci⁠onaapemiyaampaan onaakohshik, ci⁠okosihsiyaan kaye,

¹³ kitaa pii'aawaak ina ci⁠kiishikiwaahpan? Kaawiin ina kitaa onaapemihsiim ci⁠ontamii pii'ekwaapan ninkosihsak? Nihshimihsak kaawiin i'i ta⁠ishinaakwahsinoon. Nawac niin ninkakwaatakihse ahpiihc wiin kiinawaa, kaaTipenciketc iitok kaawiin nimino wiiciiwikohsii,” kii‑ihkito.

¹⁴ Miihsh miinawaa iki ohshimihsimaak kiih⁠kishiiwewak ekiih kihci mawiwaatc. A'a tahsh Orpa (Orpah) okii ociimaan ekiih pooshoo'aatc. A'a tahsh wiin Oroot (Ruth) okii minciminaan osikohsan.

¹⁵ Miitahsh Neyoomii kaa'inaatc ini ohshimihsan, “Kiwaapamaa iitok a'a kiicihkwe eh⁠kiiwe naasihkawaatc owiici onciimaakana', omanitooma' kaye. Kekiin tahsh maacaan ci⁠wiiciiwatc kiicihkwe,” kii‑ihkito.

¹⁶ Miihsh Orootan kaa⁠ishi nahkwehtaakotc, “Keko kakaansomihshihken ci⁠nakaninaan, maano kaye ci⁠piminihsha'ohsinowinaan, aanti hsa ko eshaayan ninka ishaa. Aanti hsa ko keshi kapehshiyan keniin ninkashi kapehsh, kiicipimaatisiik hsa keniin ninka owiici pimaatisiimaak, kimanitoom hsa kaye keniin ninka omanitoom.

¹⁷ Aanti hsa piko keshi nipoyan keniin ninkashi nip, mii hsa kaye keniin weti keshi ninkwa'okooyaan. Pisaan ihsa ko kaaTipenciketc kekoonini ninka tootaak awahshime kiishpin pakitinamaan kekoon ci⁠pahkewinikoyank. Nipowin ihsa ehta kiinawint kika pahkewinikomin!” okii'ikoon.

¹⁸ Ahpii tahsh Neyoomii e⁠kihkentank Orootan e⁠mashkawentaminitc ewii wiiciiwikotc, mii hsa 'i intawaa kaawiin awahshime kekoonini okii inaahsiin.

¹⁹ Miitahsh kaa⁠ishi maacaawaatc piinihsh ekiih takohshinowaatc Pehtalihem (Bethlehem) ootenaank. Ahpii tahsh kaah⁠pitakohshinowaatc, kahkina i'imaa ootenaank kaakiihtaanitc, memintake ko ihkwewa' okiih pinaasihkaakowaa' ekii ihkitonitc, “Miina wa'a tepwe Neyoomii?” kii‑ihkitowa'.

²⁰ Miitahsh Neyoomii kaa⁠ihkitotc, “Keko Neyoomii ishinihkaanihshihkek. Maara (Mara) ishinihkaashihshik. Onsaam iitok kaaMaawaci mashkawisiitc Kishemanitoo nimaanshiwiiciiwik.

²¹ Ninkii wenootisinaapan o'omaa kii⁠onci maacaayaampaan. O'o tahsh kaaTipenciketc kaa⁠pikiiwewishitc kaawiin kekoon nintayaahsiin. Wekonen tahsh Neyoomii wenci ishinihkaashiyek, kaaTipenciketc kaaMaawaci mashkawisiitc ekii nipoowakimitc, ekii miishitc kaye maanshihsewin,” kii‑ihkito.

²² Mii hsa 'i kaa⁠ishihsetc Neyoomii ahpii Moowap ahkiink kii⁠pionci takohshink, kiipi wiiciiwaatc ohshimihsan Oroot eshinihkaasonitc Moowap ahkiink wenciinitc. I'i hsa tahsh ahpii kiipi takohshinowaatc Pehtalihemink, mii hsa 'i aasha kii⁠maacihsenik ci⁠manishikaniwinitc parlii (barley) tino manoominan.