Oopitaaya 1 - Ojibwe Kihcimasina'ikan

¹ Oopitaaya (Obadiah) otishinamowin. Mii hsa 'oweni kaaMaawaci mashkawisiitc kaaTipenciketc e'itank Iitam (Edom) ahkiini. Ninkii noontamawaamin ihsa kaaTipenciketc otipaacimowin, miihsh kaakii ishinisha'ontc ke⁠tipaacimotc eshi'ayaanitc entahswewaanakisinitc pemaatisinitc o'o ci‑ihkitotc, “Taka oshiihtaataa ci⁠anta miikaatamank i'i Iitam ahki!”

KaaTipenciketc Ewiinana'ahsaatc Eyaanitc Iitam Ahkiink

² Miihsh kaaTipenciketc etank Iitam, “Kitootawininim ihsa ci⁠matisiyek, kahkina awiya ci⁠aanaweniminek.

³ Eh⁠kihci inenintisoyek hsa kite'iwaank mii 'imaa eshi waniwinintisoyek. Kitootenaamiwaa kaa⁠niikaanentaakwahk ihsa soonkentaakwan, ke⁠ahpa'iwenk mashkawahsiniink eh⁠tinowank. E⁠ishitaayek eshi ishpaak kihci waciw. Miihsh iinsan ehkitoyek, ‘Awenen itahsh inaa ke⁠pinipishihpan?’

⁴ Aanawiin e⁠ishi oshihtooyan keshitaayan mikisi kaashi oshihtootc owasihswan eshi ishpaanik, e⁠inentaakwahk mekwe wanankohshihkaank. Shaakooc ihsa kika pinipinin.”

⁵ “Ahpii tahsh kii⁠otihsinekwaa okimoocishkak, omahkantwek kaye, entawentamowaatc ehta otootaahpinaanaawaan. Awiyak kaye kii⁠mawiswaanaawaatc shoomina', aanintaa otishkonaawaa'. Iki tahsh kaa⁠shiinkeniminekwaa kahkina kekoon kika mashashkonamaakowaak.

⁶ Kiinawaa Iihswaank (Esau) wentahkaanesiyek, eshi wenootisiyek ihsa ta⁠mihkikaatewan ci⁠maaciicikaatekin.

⁷ Iki hsa kaakii ihkitowaahpan ewii naatamawinekwaa kikiih kayeshimikowaak kitaahkiimiwaank e⁠onci maaciiyaamohkaaninekwaa. Iki pisaan kaakii wiiciiwinekwaapan noonkom kishaakooci'ikowaak. Kaakii wiiciwiihsinimekwaapan kikiih kaahcici'ikowaak, kaawiin itahsh kikii mantencikehsiim.”

⁸ “Ahpii tahsh kiishikaninik nana'ahsakwaa Iitam eyaawaatc, ninka nihsaak iki ininiwak kehkentaahsowaatc. Kaawiin kaye ninka kihkentaakohtaawaahsiin okakiihtaawentamowiniwaa.

⁹ Iki hsa kaye miikaasowininiwak Tiiman (Teman) ootenaank wenciiwaatc ta⁠kihci sekisiwak. Kahkina hsa shimaakanihshak eyaawaatc Iihswaa opihkwatinaamink ta⁠caakihcikaniwiwak.”

Wekonen Iitam Wencinana'ahcikaatek

¹⁰ “Ekiih kiimootimatwaa hsa, ekii nihsatwaa kaye kiicihkiwensiwak Cekaponk (Jacob) wentahkaanesiwaatc, mii hsa i'iwe nehpic iko ke⁠onci nihshiwanaaci'ikooyek, ke⁠onci kihtenimikoohsiwek kaye.

¹¹ Pahkeya'ii hsa kikii niipaw ahpii eh⁠kiishikaninik kaa⁠shiinkenimikowaatc kii⁠piikopitoonitc okihci ishkwaantemiwaan. Miihsh peshikwan eshinaakosiyan kaakii ishi mamaashiiwaatc iki meyakisiwaatc kaakii maaciitoowaatc eshi wenootaninik Ceroosalam (Jerusalem) kihci ootena, kaye tahsh ekii nenaawinamaatiwaatc.

¹² Kaawiin ohsha kitaakii ciihkentansiim ahpii eh⁠kiishikaninik kii⁠wahsitaawihsewaatc kiicihkiweyiwaak eyaawaatc Coota (Judah) ahkiink. Kaawiin kitaakii minwentansiim kii⁠nihshiwanaaci'intwaapan. Kaawiin kaye kitaakiih paahpi'aahsiwaawaak kii⁠kakwaatakentamowaahpan.

¹³ Kaawiin kitaakiih piintikehsiim okihci ootenaamiwaa nimpimaatisiimak cikii ciihkentamekipan eshi kakwaatakihtoowaatc. Kaawiin kaye kitaakii otihtinamowaahsiim eshi wenootisiwaahpan ahpii kii‑ishi kiishikaninikipan kii⁠kihci maanshihsewaahpan.

¹⁴ Kaawiin ohsha kitaakii niipawihsiim eshi aashitemonkin miihkanawan ci⁠kaahcitinekwaapan kaakiih kakwe maaciipa'iwewaahpan. Kaawiin kaye kitaakii ishihcikehsiim cikiih pakitinekwaapan eshi'ayaanitc kaa⁠shiinkenimikowaatc.”

Kishemanitoo Ci'onaahkonaatc Tehswewaanakisinitc Pemaatisinitc

¹⁵ “Aasha ohsha pehshonaakwan kaawii ishi kiishikahk niin kaaTipencikeyaan kaawii onaahkonakwaa kahkina entahswewaanakisiwaatc pemaatisiwaatc. Iitam, i'i hsa kaakiih pi ishihcikeyan, mii hsa 'iwe inahke ke⁠kiiwe tootaakooyan. Kika kiiwe miinikoo kaakii miikiweyan.

¹⁶ Nimpimaatisiimak ihsa okii minihkwaataanaawaa kaa⁠wiihsakaakamininik shoominaapo mii hsa 'iwe nana'ahsikoowin. Iki tahsh wiin waahkaaya'ii eyaawaatc entahswewaanakisiwaatc pemaatisiwaatc nawac ta⁠mashkawaani ke⁠minihkwaatamowaatc nana'ahsikoowin. Kiih⁠kitaawaatc itahsh mii 'i kaawiin ta⁠kihkentaakosihsiiwak.”

Oshaakoocihtwaawin Isriyal

¹⁷ “I'imaa tahsh wiin Saayan (Zion) waciink aaninta ta⁠shaapwiiwak, miihsh ke⁠icikaatek e⁠kihtentaakwahk. Miihsh iki Cekaponk (Jacob) wentahkaanesiwaatc ci⁠kiiwe tipentamowaatc ahkiini kaakiih⁠tipinawewisiwaahpan.

¹⁸ Iki pemaatisiwaatc Cekaponk, Coosaponk kaye wentahkaanesiwaatc ishkotenk ta⁠inentaakosiwak. Miihsh ci⁠caaki'aawaatc Iihswaank (Esau) wentahkaanesinitc taapishkoo paahte mashkohsi kaashi caakitek. Kaawiin awaac kanake peshik Iihswaa opiiwesiiman ta⁠pimaatisihsiiwan. Niin iko kaaTipencikeyaan o'o nintihkit.”

¹⁹ “Iki hsa Coota ahkiink ishi shaawanonk wenciiwaatc ta⁠mahkantwewak Iitamoon (Edom) eshitaanihpan. Iki tahsh wiin ninkaapii'anonk eshi maaciiyaamatinaanik wenciiwaatc ta⁠mahkantwewak Pilistiya (Philistia) ahkiini. Iki tahsh wiin Isriyalak ta⁠mahkantwewak tepentaminihpan ahki Iihpariyam (Ephraim) wenciinitc, i'i kaye Sameriya (Samaria) kihci ootena. Ikihsh wiin Penciman (Benjamin) wenciiwaatc ta⁠mahkantwewak Kiliyat (Gilead) ahkiini.

²⁰ Iki tahsh wiin shimaakanihshak kaakii maaciinintwaapan Isriyalak eyaawaatc ishi kiiwetinonk Isriyal ahkiink ta⁠pikiiwewak ci⁠shaakoocihtoowaatc Piniihshiya (Phoenicia) ahki piinihsh weti inahke kiiwetinonk eshi'ayaak Serahpat (Zarephath) ootena. Iki tahsh Ceroosalamink kaakii onci maaciinintwaapan eyaawaatc noonkom Saartihs (Sardis) ootenaank ta⁠mahkantwewak ootenawan eyaanikin ishi shaawanonk inahke Coota ahkiink.

²¹ Miiwak ihsa iki kaa⁠shaakoocihtwaawaatc ininiwak wenciiwaatc Ceroosalamink oka miikaataanaawaa Iitam miihsh ci⁠tipentamowaatc. Wiin itahsh iko kaaTipenciketc ta⁠kihciokimaawi.”