ᐊᑭᑖᓱᓇᓐ 6 - Ojibwe Kihcimasina'ikan

Ke'ishihcikewaatc Naasiir Tenowiwaatc

¹ Miitahsh o'o Moosihs (Moses) kaa'ikotc kaaTipencikenitc,

² “O'o hsa kika'inaak Isriyalak (Israel). Ahpii hsa ko inini, komaa kaye ihkwe memintakewi ahpimotc, ishi ahpimotc Naasiir (Nazirite) ci⁠tinowitc, ke⁠pahkaanentaakosi'itisotc kaaTipencikenitc ci⁠tipinawewisiimikotc,

³ ta⁠manaa minihkwe hsa shoominaapooni. Kaawiin kaye meshkawaakamininik minihkwewin ta⁠minihkwehsii. Kaawiin ta⁠minihkwehsii shiiwaapoonhs wenciinik shoominink, oka manaa amwaa' kaye oshki shoomina', kaa⁠paahsonitc kaye.

⁴ Minihk itahsh iko ke⁠pahkaanentaakosi'itisotc Naasiir ci⁠tinowi'itisotc oka manaa miicin hsa kekoon iko wenci oshihcikaatenik shoominink, komaa kaye ahkantaaminink, komaa kaye pihshakipicikanink.”

⁵ “Minihk itahsh iko ke⁠pahkaanentaakosi'itisotc wiihkaa ci⁠pashkwaakohtikwaanehsik ci⁠kaashkipaasohsik kaye. Mii hsa 'i eshinaakwaninik minihk iko ci⁠tipenimikotc kaaTipencikenitc pisaan kaye ta⁠kinwaanihkwe. Paanimaa tahsh ocihcihsenik minihk kaakii ihkitotc ci⁠pahkaanentaakosi'itisotc, miihsh i'i payesh i'i ci⁠poonihsenik otishihtwaawin.

⁶ Minihk itahsh iko Naasiir ke⁠tinowitc oka manaa naasihkawaan awiyan kaa⁠niponitc.

⁷ Mihsawaa hsa ko oteten, omaamaan, wiicihkiweyan, otawemaan kaye niponitc ta⁠manaa ishaa ke⁠onci wiinentaakosi'itisotc. Wiinisihsan iitok onci kihkinawaasinaakosi Kishemanitoon e⁠pahkaanenimikotc.

⁸ Minihk hsa ko ke⁠pahkaanentaakosi'itisotc, kaaTipencikenitc hsa otipenimikoon.”

⁹ “Kiishpin itahsh awiyan kwetahto niponitc eshi'ayaatc, mii hsa 'i ci⁠wiinentaakohcikaatenikin wiinisihsan kaakiih pahkaanentaakohtootc. Miitahsh eshinaakwaninik ci⁠kaashkipaatootc ohtikwaan ahpii pehkentaakosi'itisotc niishwaahsokiishikaninik.

¹⁰ Nihshwaahsokiishik (8) itahsh eshihsenik, oka piinaa' niishin mayaki omiimiinsa', niishin kaye omiimiinsa' ci⁠piitamawaatc anami'ewikimaan i'imaa eshi ishkwaantemiwaninik i'i Maawaci'itiwi pakwaanekamik.

¹¹ Miitahsh ini anami'ewikimaan ci⁠pakitinaminitc i'i pakitinaahsowin macitootamowin wenci poonencikaatenik, i'i kaye kotak tino kaa‑ankwaahkisikaatenik pakitinaahsowin, ke⁠onci poonentamawintc i'i kaakii ishi maci'ishihciketc ekiih pehshwaapamaatc neponitc. Miitahsh peshikwan i'i kiishikaninik ke⁠pehkentaakohtootc wiinisihsan.

¹² Miitahsh miinawaa ci‑ishihciketc ci⁠pahkaanentaakosi'itisotc kaaTipencikenitc onci, Naasiir ci⁠tinowitc. Oka piinaan itahsh maanahcaanihshenhsan ci⁠peshikopipoonwenitc ci⁠pakitinaahswaanaatc kekoon ke⁠onci anaamentaakosihsik. I'i tahsh wiin otaanaank kaakii ishihtwaatc kaawiin ta⁠takwakintehsinini aaniihsh kii⁠noonte wiinentaakosi mekwaa kiih⁠pahkaanentaakosi'itisotc.”

¹³ “Miitahsh o'o enaahkonintc ci‑ishihciketc Naasiir tenowi'itisotc ahpii ishkwaahsenik kaakii ihkitohpan minihk ewiih pahkaanentaakosi'itisotc. Oka piitoon hsa i'imaa ke⁠pakitinikaatenik eshi ishkwaantemiwaninik i'i Maawaci'itiwi pakwaanekamik.

¹⁴ Miihsh ci⁠pakitinamawaatc kaaTipencikenitc i'i kaawiih pakitinank: ayaape maanahcaanihshenhsan kaa⁠peshikopipoonwenitc hsa kekoon eshi maahkisihsinik oka ankwaahkiswaan ci⁠pakitinaahsowaaketc. Kaa⁠peshikopipoonwenitc kaye noonshe maanahcaanihshenhsan kekoon kaashi maahkisihsinik okakii pakitinaahsowaakenan ke⁠onci poonentamawintc omacitootamowinan onci. Peshik kaye ayaape maanahcaanihshan kekoon eshi maahkisihsinik ci⁠pakitinaahswaatank mino wiiciintiwi pakitinaahsowin.

¹⁵ Tako kaye peshiko watapiiwash pahkweshikanan wempisikaniwihsinik, pahkweshikanan kaye pimiteni kaa⁠takosikaatenik, tako kaye pahkweshikanihkaanan kaa⁠pipakisinitc pimiteni kaa⁠shisho'ikaatenik. Takohsh kaye pahkweshikaniminiwi pakitinaahsowin shikwa minihkwewi pakitinaahsowin.”

¹⁶ “Ini tahsh anami'ewikimaan oka piitooni eshi'ayaanitc kaaTipencikenitc, ci⁠pakitinaminitc i'i ke⁠onci poonentamawintc omacitootamowinan, ci⁠pakitinaminitc kaye kaa‑ankwaahkitenik tino pakitinaahsowin.

¹⁷ Oka pakitinaani tahsh kaye ini maanahcaanihshan ekiih pakitinaahsoohtamawaanitc kaaTipencikenitc i'i tino mino wiiciintiwi pakitinaahsowin ekiih takonaanitc kekwa' wempisikaniwihsinik; miitahsh kaye anami'ewikimaan kaa⁠ishi pakitinaminitc i'i pahkweshikaniminiwi pakitinaahsowin ekiih takonaminitc minihkwewin.

¹⁸ A'a tahsh Naasiir kaatinowi'itisotc, mii 'imaa eshi ishkwaantemiwaninik Maawaci'itiwi pakwaanekamik keshi kaashkipaatootc ohtikwaan kaakiih pahkaanentaakohtootc ci⁠manishank wiinisihsan. Miitahsh keshi macohte'ank i'imaa kaa⁠tashi pakitinikaatenik i'i mino wiiciintiwi pakitinaahsowin.”

¹⁹ “A'a tahsh anami'ewikimaa oka otaahpinaan i'i ayaape maanahcaanihshiwi otinimaakanini ahpii kii⁠ontenik, oka onci otaahpinaan tahsh kaye i'imaa watapiiwashink peshik ini wempisikaniwihsinik kekwan, ini kaye peshik wempisikaniwihsinik kaa⁠pipakisinitc pahkweshikanan. Oka miinaan itahsh ini Naasiiran tenowinitc kii‑ishkwaa kaashkipaatoonitc kaakiih pahkaanentaakohtoonitc wiinisihsini.

²⁰ A'a tahsh anami'ewikimaa oka otaahpinaanan otinimaakanini kayehsh pahkweshikanan ci⁠wawahte'ikaaketc enaahsamiinitc kaaTipencikenitc i'i tino pakitinaahsowinini. Kihtentaakwanini, wiin tahsh anami'ewikimaa otipentaanan tako kaye okahkiikanini kaakii wawahte'ikaaketc takohsh ayaape maanahcaanihsh opwaamini kaakiih pakitinikaatenik. Miitahsh kaa⁠pahkaanentaakosi'itisotc Naasiir kaatinowitc payesh ci⁠minihkwetc shoominaapo.

²¹ Mii hsa 'owe enaahkonintc ke⁠ishihtwaatc kaa⁠pahkaanentaakosi'itisotc Naasiir kaa‑ahpimotc e⁠ahshotamawaatc kaaTipencikenitc eshihsininik kaashi pahkaanentaakosi'itisotc, awahshime tahsh ta⁠ishihcike ke⁠ahko kashkihtootc. Oka tipitootaan hsa 'i kaakii ishi ahpimotc, ci‑ishihciketc eshihsininik enaahkonimintc Naasiir tenowi'itisotc ci‑ishihtwaanitc,” okii'ikoon ci‑ihkitotc.

Anami'ewikimaak Kiikiihkino'amawintwaa Ke'ihkitowaatc

²² KaaTipencikenitc itahsh Moosihs (Moses) okii'ikoon,

²³ “Kanoosh Eran (Aaron) i'i kaye okosihsa' o'o ci'inimatc. Mii hsa 'o ke⁠ihkitoyek ahpii mihsawenimekwaa Isriyalak (Israel) ci⁠shawentaakosiwaatc:

²⁴ ‘Taka kaaTipenciketc kika shawenimikowaa, kika naanaakaci'ikowaa kaye;

²⁵ Taka kaye kaaTipenciketc kika minotootaakowaa, kika shawenimikowaa kaye;

²⁶ Taka kaye kaaTipenciketc kika minwaapamikowaa, kika miinikowaa kaye pisaanisiwin.’ ”

²⁷ “Mii hsa tahsh tako wiintamowaatc niwiinsowin ahpii mihsawenimaawaatc Isriyala' ci⁠shawentaakosinitc, miitahsh i'i ci⁠shawenimimak,” okii'ikoon kaaTipencikenitc.