ᐊᑭᑖᓱᓇᓐ 14 - Ojibwe Kihcimasina'ikan

Isriyalak Kiikihcikaakiikitowaatc

¹ Kapetipihk hsa kahkina pemaatisiwaatc Isriyalak (Israel) kii⁠mawiwak ekiih kishiiwewaatc.

² Kahkina hsa Isriyalak okiih kihci kakanoonaawaan Moosihsoon (Moses), Eranoon (Aaron) kaye ekii ihkitowaatc, “Nawac iitok taakii onishihshin cikiih tashi nipoyaankipan weti Iicipahkiink. Taakii onishihshin kaye tashi nipooyaankipan o'omaa pikwatahkamik.

³ Wekonenini tahsh kaaTipenciketc wenci ishiwiyamitc o'omaa ahkiink? Ewii nihshiyamitc ina? Inashke niwiiwinaanik, niniicaanihsinaanik kaye ta⁠nihtamoohkiiwak. Nawac iitok ta⁠onishihshin ci⁠kiiweyaankipan weti Iicipahkiink (Egypt)?” okii'ikoo'.

⁴ Miihsh kaa⁠ihkitowaatc eh⁠kakanoonitiwaatc, “Taka onenimaataa awenen ke⁠niikaaniihtamawinank, ke⁠kiiwewininank weti Iicipahkiink,” kii‑ihkitowak.

⁵ Miitahsh Moosihs, a'a kaye Eran kaakii animihkohtaawaatc mihtahkamik eshi'ayaanitc kahkina Isriyala'.

⁶ A'a tahsh Caahshowaa (Joshua) oteten Nan (Nun) kaakii ishinihkaasonitc, a'a tahsh kaye Kelap (Caleb) oteten Cepone (Jephunneh) kaakii ishinihkaasonitc, kewiinawaa iitok kaakii anta kiimoosaapantamowaatc ahkiini. Miitahsh okiih taashkiikipitoonaawaan okikishkikaniwaan e⁠maanentamowaatc.

⁷ Miitahsh kaa'inaawaatc kahkina Isriyala' i'imaa eyaanitc, “I'i hsa ahki kaakii anta waapantamaank aahpici onishihshin.

⁸ Kiishpin tahsh kaaTipenciketc minwaapaminank, kika ishiwinikonaan hsa weti ahkiink. Wiinke ohsha wenootan, wiinke kaye wenci nihtaawikin kekoon.

⁹ Keko tahsh wiin shashiipihtawaahkek kaaTipenciketc. Keko kaye kohsaahkekwaanik pemaatisiwaatc weti kaa⁠ishitaawaatc. Kika shaakooci'aanaanik ohsha, kaawiin iitok kekoon onaatamaakohsiinaawaa. KaaTipenciketc ohsha kiinawint kiwiiciiwikonaan, ekiih shaakooci'aatc omanitoomini kekii naatamaakonihpan, keko tahsh kohsaahkekwaanik,” kii‑ihkitowak.

¹⁰ Kahkina tahsh pemaatisiwaatc i'imaa kaakii ayaawaatc kii‑ihkitowak cikiih pimwahsina'imintipan. Sesakooc itahsh kii⁠naakwanini kaaTipencikenitc okihci inentaakosiwinini i'imaa maawaci'itiwi pakwaanekamikonk, kahkina hsa awiya' okii waapantamini.

Moosihs Kii'anami'ehtamawaatc Pemaatisinitc

¹¹ Miihsh o'o Moosihs kaa'ikotc kaaTipencikenitc, “Aaniin tahsh minihk oko pemaatisiwaatc ke⁠aanawenimiwaatc? Aaniin tahsh minihk ke⁠tepweyenimihsikwaa? Nintanakii waapanta'aak iitok kihkinawaacihcikewinan.

¹² Inashke ninka ishinisha'amawaak aahkosiwin awahshime miinawaa ci⁠tipenimaahsiwakwaa. Kiin tahsh wiin kika ishi'in nawac ci⁠kihci inentaakosiwaatc kipiiwesiimak, ahpiihc wiin iki Isriyalak (Israel),” okii'ikoon.

¹³ O'o tahsh Moosihs okii'inaan kaaTipencikenitc, “Kiin iitok kikiih saakiciwinaak Isriyalak (Israel) weti Iicipahkiink (Egypt) kimashkawisiiwin ekii aapacihtooyan. Inashke tahsh Iicipahkiink kaa⁠onciiwaatc ahpii noontamowaatc aaniin kaah⁠tootawimatc kipimaatisiima',

¹⁴ oka wiintamawaawaa' ohsha pemaatisinitc o'omaa ahkiink eyaanitc. Okihkentaanaawaa iitok aasha oko pemaatisiwaatc kiin kaaTipencikewatc e⁠wiiciiwiyaank. Aahpici kaye kipehtenaakos ahpii i'imaa kiwahkwiimink kii⁠ayaayan. Eh⁠kiishikahk tahsh e⁠ishi'ayaayan i'imaa kaashi patahkitewaanahkwahk kii⁠niikaaniihtamawiyaank. Eh⁠tipihkahk tahsh i'imaa ishkotenk kaa⁠patahkwahkonek e⁠ishi'ayaayan kii⁠niikaaniihtamawiyaank.

¹⁵ Kiishpin hsa nihsatwaa oko pemaatisiwaatc taapishkoo kaashi nihsintc peshik inini, mii hsa tahsh iki pemaatisiwaatc kaa⁠noontamowaatc eh⁠kihkentaakosiyan ta⁠ihkitowak,

¹⁶ ‘Ekiih kashkihtoohsik ohsha kaaTipenciketc ci‑ishiwinaatc Isriyala' ahkiink kaakii ahshotamawaahpan ekii ahpimohpan otishinihkaasowin, mii ohsha 'i kaakii onci nihsaatc weti pikwatahkamik i'i opimaatisiima'.’

¹⁷ Noonkom tahsh o'o kitishi kakwecimin kaaTipencikeyan, taka ninka waapantaamin kimashkawisiiwin, ishihciken kaye i'i kaakii ishi ahshotamaakeyan o'o kii‑ihkitowampanen,

¹⁸ ‘Niin hsa kaaTipenciketc, wiinke hsa nimpecikitaas, wenootan kaye niminotootaakewin. Nimpoonentaanan kaye macitootamowinan, shashiipihtamowinan kaye. Shaakooc tahsh kaawiin ninka kisii'amowaahsiin kaashi wiiyakishkentamo'iwemakahk macitootamowin kaakii ishihcikewaatc otetemaak piinihsh nihsink, komaa kaye niiwink cini ayaanihke ayaanitc opiiwesiimiwaa'.’

¹⁹ Mii hsa tahsh eshi kakweciminaan ci⁠poonentamawatwaa i'i kaashi macitootamowaatc oko pemaatisiwaatc, aaniihsh wenootan kisaaki'iwewin wiihkaa kaa⁠poonihsehsinok, taapishkoo kaakii ishi poonentamawatwaa weti ahpii kii⁠nakatamowaatc Iicipahki piinihsh itahsh noonkom o'o ishi ahpii,” okii'inaan.

²⁰ Miihsh o'o kaaTipencikenitc kaa'ikotc, “Aasha ninkiih poonentamawaak hsa i'i kaashi kakwecimiyan.

²¹ Nintayaankwaamis e⁠ahshotamawinaan, tepwe hsa ko kaashi mooshkineyentaakwak kaye i'i Ninkihci inentaakosiwin o'omaa misiwe ahkiink,

²² kaawiin hsa awaac peshik iki oka waapantansiinaawaa i'i ahkiini kaakii ahshotamawimak okehteya'aamiwaapanii' ewii miinimak, kaawiin kaye iki kaa‑aanawenimiwaatc aapiinciko oka waapantansiinaawaa.

²³ Miiwak ikiweniwak pemaatisiwaatc kaakii waapantamowaatc ninkihci inentaakosiwin, ini kaye kihkinawaacihcikewinan kaakii ishihcikewak weti Iicipahkiink, pikwatahkamik kaye, shaakooc itahsh ninkiih kakaanci'ikook mitaahciink aanakii⁠kihkenimiwaatc, shaakooc itahsh kaawiin nimpisintaakohsiik.

²⁴ A'awe tahsh wiin nintanohkii'aakan Kelap (Caleb) pahkaan ishi naanaakatawentam, wawiinke kaye nimpiminisha'ok. Ninka ishiwinaa i'imaa ahkiink kaakii anta waapantankipan, miitahsh i'i opiiwesiima' keni tipentaminitc.

²⁵ Weti iitok kaashi papahsatinaanik ishitaawak iki Amalehk (Amalekites) kaatinowiwaatc iki kaye Kenan (Canaanites) kaatinowiwaatc. Waapank itahsh ashe kiiwehkek, weti inahke pikwatahkamik ani ishaahkek kihci miskokamiink inahke,” okii'ikoon.

KaaTipenciketc Kiinana'ahsaatc I'i Kaakii maanshi kakitonitc

²⁶ Miitahsh o'o Moosihs, a'a kaye Eran kaa⁠ikowaatc kaaTipencikenitc,

²⁷ “Aaniin itahsh keyaapi minihk oko pemaatisiwaatc waa⁠maanshi kakanooshiwaatc? Ninoontawaak hsa 'i Isriyalak aaniin eshi maanshi kaakiikitowaatc niin onci!

²⁸ O'o hsa ishi iki pemaatisiwaatc, o'o e⁠ihkitowak, ‘Niin kaaTipencikeyaan, tepwe hsa ko kika tootawininim i'i kaashi noontawinakook e⁠ihkitoyek.

²⁹ O'omaa hsa pikwatahkamik kika ishi kawihsem cishi nipoyek, kahkina piko kaa⁠tahshiyek niishtana (20), awahshime kaye tehso pipoonweyek, kaakiih takwakimikooyek kii⁠akimikooyek, onsaam aaniihsh kikii maanshi kakanooshim.

³⁰ Tepwe hsa kaawiin kika piintikeshkaahsiim i'i ahki kaakii ayiici ahshotamaampaan ewii ishi kapehshi'inakookipan. A'a hsa ehta Kelap kaa⁠otetetc Cehponewan, a'a tahsh kaye Caahshowaa kaa⁠otetetc Nanan ta⁠piintikeshkaawak.

³¹ Iki tahsh kiniicaanihsiwaak kaakii ihkitoyekipan ci⁠nihtamoohkii'intwaa, miiwak hsa iki ke⁠piintikewinakwaa ci⁠moociki'ikowaatc i'i ahkiini, kiinawaa kaakii aanawentamowek.

³² Kiinawaa tahsh wiin kika kawihsem ci⁠nipoyek o'omaa pikwatahkamik.

³³ Kiniicaanihsiwaak hsa o'omaa pikwatahkamik tashi wawanentamishkaawak niimitana (40) tahso pipoon minihk. Kiinawaa itahsh i'i kitishihcikewiniwaa ke⁠onci kakwaatakihtoowaatc eh⁠tepweyentaakosihsiwek, piinihsh ci⁠caaki kawihsewek i'imaa pikwatahkamik ci⁠kakwaatakihtoowaatc.

³⁴ Minihk hsa ko entahso kiishik kaakiih kiimoosaapantamek o'o ahki, peshiko kiishik hsa peshikopipoon ta⁠inakincikaate ci⁠nana'ahsikooyek kimacitootamowiniwaan onci niimitana (40) tahso pipoon minihk. Miitahsh ci⁠kihkentamek enentaakwahk niin ci⁠nakaashkawinakook.

³⁵ Niin Tepencikeyaan hsa 'o kaa⁠ihkitoyaan, tepwe hsa ninka tootawaak oko kahkina meci'ishiwepisiwaatc kaakii ohkwiino'itiwaatc ewii nakaashkawiwaatc. Mii hsa 'omaa pikwatahkamik keshi nihshiwanaatisiwaatc, kahkina ci⁠nipowaatc,’ ” okii'ikoon.

^36-37 I'i tahsh ininiwa' Moosihs kaakii ishinisha'waahpan ci⁠anta kiimoosaapantaminitc ahki, miiwak hsa 'i kiih⁠pikiiwenitc noociko kaakii inaatotaminitc i'i ahki. Miitahsh pemaatisinitc kaakii onci maanshi kakanoonaanitc kaaTipencikenitc. I'i itahsh ininiwa' noociko kaakii inaacimonitc, kaaTipenciketc hsa okii ishi'aa' ci⁠aahkosinitc, miihsh kaa⁠ishi niponitc.

³⁸ Iki tahsh ininiwak kaakii anta kiimoosaapantamowaatc Kenan ahki, niishin ehta kii‑ishkonewak. Miiwak hsa oko Caahshowaa kaakii otetetc Nanan, a'a tahsh kaye Kelap kaakii otetetc Cehponewan.

Isriyalak Kiihkakwecihtoowaatc Ewiimahkantwewaatc I'i Ahkiini

³⁹ Ahpii tahsh Moosihs kaa⁠ishkwaa wiintamawaatc o'o kahkina Isriyala' (Israel), mii hsa 'i kaa⁠ishi kihci mawinitc.

⁴⁰ Wiipa tahsh kikishep kii‑ishaawa' weti nahke eshi ayishpatinaanik, o'o ekii ihkitonitc, “Ninkii maci'ishihcikemin hsa. Ninka ishaamin hsa weti ahkiink kaaTipenciketc kaakii ahshotamawiyamintc,” kii‑ihkitowa'.

⁴¹ Miitahsh o'o Moosihs (Moses) kaa'inaatc, “Wekonen itahsh wenci na'ihtansiwek kaashi anooninek kaaTipenciketc? Kaawiin ohsha kika shaakoocihtwaahsiim!

⁴² Keko ishaahkek, kika shaakooci'ikowaak ohsha kaa⁠shiinkeniminekwaa, kaaTipenciketc aaniihsh kaawiin kiwiiciiwikohsiiwaa.

⁴³ Iki hsa Amalehk (Amalekites) kaatinowiwaatc, iki kaye Kenan (Canaanites) kaatinowiwaatc kika nakishkawaawaak eshaayek, pashipa'ikewihkomaanink itahsh kika onci nihsikoom. Minihk hsa iko kaashi nakanek kaaTipenciketc, kaawiin hsa kika wiiciiwikohsiiwaa,” okii inaa'.

⁴⁴ Shaakooc itahsh kii‑ishaawa' ekiih papaamihtansinik weti nahke kaakii ishi papiihkwatinaanik. I'i tahsh wiin ahshotamaakemahkahkoni keyaapi weti kii⁠ayaani eshi kapehshiwintc, kaawiin kaye Moosihsoon okii nakantansiini i'i kapehshiwin.

⁴⁵ Miitahsh iki Amalehk kaatinowiwaatc, iki kaye Kenan kaatinowiwaatc kaakiih taawaatc i'imaa kaashi papiihkwatinaanik, kii⁠niihsaciwewak ekii miikaanaawaatc Isriyala', ekiih shaakooci'aawaatc kaye. Weti tahsh Harma (Hormah) ecikaatenik okii inaamwa'waawaa'.