Nikamonan 95 - Ojibwe Kihcimasina'ikan

Miikwehciwinikamon

¹ Ampeyohk, taka nikamoohtawaataa kaaTipenciketc eh⁠ciihkentamank, taka shaakowetaa ci⁠ciihkihtawinank Kishemanitoo, Ahsiniink kaa⁠inentaakositc kiPimaaci'iweminaan.

² Ampeyohk, taka naasihkawaataa eshi'ayaatc ci⁠miikwehciwenimank, taka kaye kishiiwewaataa ci⁠ciihkihtaakosiwankitc ci‑ina'amowankitc e⁠miikwehciwenimank!

³ Wiin iitok kaaTipenciketc kaa⁠kihci Kishemanitoowitc, wiin kaye kaa⁠kihciokimaahkantawaatc kahkina kotak manitoo'.

⁴ Wiin hsa kaa⁠misiwe tipentank ahkiini, e⁠onci tipentank maawac waahsa anaamahkamik piinihsh itahsh weti kaashi wakitatinaanikin ini kihci waciin.

⁵ Kihcikamiini hsa wiin otipentaan aaniihsh wiin okii oshihtoon; oninciink kaye okii onci oshihtoon kaa⁠paankwahkamikaanik.

⁶ Ampeyohk, taka animihkohtaataa ci⁠anami'ehtawank; taka kaye ociciinkwanapiihtawaataa enaahsamiitc kaaTipenciketc kaakii oshi'inank!

⁷ Wiin ohsha kaa⁠oKishemanitoomiyank; kiinawint iitok opimaatisiima' kaa⁠naanaakaci'aatc, taapishkoo omaanahcaanihshima' kaa⁠tootawaatc e⁠ahshamaatc kaashi mashkohsiihkaanik. Pisintamowaahk aaniin ehkitotc noonkom kaa⁠kiishikaninik,

⁸ “Keko shashiipihtawaahkek taapishkoo kikehteya'aamiwaak kaakii ishi shashiipihtawaawaatc Kishemanitoon weti Meripa (Meribah), kaakii ayintiwaatc eh⁠kiishikaninik weti Maasa (Massah) pikwatahkamik.

⁹ Mii hsa weti kaakii ishi kakwetenimiwaatc ekii anta kihkenimiwaatc kaye, aanawiin ekii waapantamowaatc aaniin kaakiih pi ishihcikewak.

¹⁰ Niimitana tahsopipoon tahsh ninkii maanaapamaak iki pemaatisiwaatc ekii ihkitoyaan, ‘Mooshak hsa otinentamowiniwaan owaniwinikonaawaan, kaawiin kaye otootaahpinansiinaawaa kaa⁠ishihcikewak.’

¹¹ Ekii maanaapamakwaa tahsh Mii hsa kaa⁠ishi ahshotamaan, ‘Kaawiin hsa wiihkaa ta⁠piintikehsiiwak i'iweni ahkiini kekii ishi anwepiwaahpan kaawii miinakwaapan.’ ”