Nikamonan 91 - Ojibwe Kihcimasina'ikan

Kishemanitoo Kaanaatamawinank

¹ Awenen hsa eshitaatc kaashi tapinawishkikenitc Maawac Eshpentaakosinitc, mii hsa awe ke⁠ayaatc kaashi naatamaakenitc Kaa⁠Maawaci Mashkawisiinitc!

² Mii hsa 'a ke'inaatc kaaTipencikenitc, “Wiin ohsha kaa⁠naacipa'iwaanak, wiin kaye kaa‑ahpa'iwaanak ci⁠naatamawitc, mii hsa awe ninKishemanitoom kaa⁠tepweyenimak!”

³ Kehcinaac hsa ko kika naatamaak ci⁠nakwaahsowaahsiwatc eshi nakwaashiwenitc okaahcitiniwe', kika kanawenimik kaye ci⁠papaamenimikohsiwatc ini kaa⁠nihshiwanaaci'iwemakaninikin.

⁴ Omiinkwanink hsa wiinke kika ishi aakooshkaak, kaashi wiimpi ninkwiikanenitc hsa kika ishi naatamak, otepweyentaakosiwin mii 'i ke⁠inwaatamowatc taapishkoo ke⁠onakaa'ikaniyan, kaye keshi aakawihshinan.

⁵ Kaawiin kaye kika kohtansiinan kaa⁠naniisaanentaakwahkin kaa‑ayaakin eh⁠tipihkahk, kiih⁠kiishikahk kaye kaa‑ayaakin kaa⁠naniisaanentaakwahkin pihkwahkonk kaa⁠inentaakwahkin.

⁶ Kaawiin kaye kika kohtansiin kaa⁠nihshiwanaaci'iwemakahk kaa⁠papaami ayaak kii⁠tipihkahk, macikekoon kaye kaa⁠nihshiwemakahk kiih⁠kiishikahk.

⁷ Mihsawaa ko miitaahswaahk (1,000) kawihsewaatc e⁠nipowaatc ohpime kaashi ayaayan, mitaahciink mitaahswaahk 10,000 kaa⁠waahkaashkawihkwaa, kewiinawaa ta⁠kawihsewak kaawiin hsa kiin awaac iko kika wiihsakaahpinehsii.

⁸ Ayinaapiyan itahsh kika waapamaak aaniin omacitootamook eshi nana'ahsintwaa.

⁹ KaaTipenciketc itahsh ekii onenimatc ci⁠nihtaa naatamawihk, ewii ishitaawatc kaye eshi'ayaatc Maawac Kaa⁠ishpentaakositc;

¹⁰ kaawiin tahsh macikekoon kika otihsikohsiin, kaawiin kaye kihci inahkamikisiwin pehsho ta⁠piishaamakahsinoon kitaawinink.

¹¹ Kishemanitoo hsa oka anoonaa' otencalima' ci⁠naanaakaci'imihk, ci⁠kanawenimimihk aaniin piko keni ishihcikewatc.

¹² Miiwak itahsh iki ke⁠minciminihkwaa ci⁠wiihsakisitehshinowaahsiwatc i'imaa kaashi ahsiniihkaanik.

¹³ Ci⁠tahtahkohkanimatc mihshipishiwan, ociihsowe kinepikoon kaye, oshki mihshipishiwenhsan kaye, macikinepikoon itahsh kaye.

¹⁴ Kishemanitoo tahsh o'o ihkito, “Aaniihsh eh⁠saaki'itc mii 'i ke⁠onci shaapwii'ak, ninka naatamawaa kaye e⁠kihkentank niwiinsowinini.

¹⁵ Kanooshitc hsa, ninka nahkwehtawaa; ninka wiiciiwaa kaye ahpii wahsitaawihsetc, ninka shaapwii'aa ninka kihtenimaa hsa kaye.

¹⁶ Ninka ishi'aa hsa kinwesh ci⁠pimaatisitc ke⁠onci minwentank, ninka ishi'aa kaye ci⁠waapantank kaashi pimaaci'iwewak!”