Nikamonan 85 - Ojibwe Kihcimasina'ikan

Eshianami'ehtamawintwaa Ciminohsewaatc Pemaatisiwaatc Isriyalak

¹ Oo Tepencikeyan, kiin hsa kinaakohtoon e⁠minwaapantaman kitahkiim, ekiih kiiwe minohse'atwaa Isriyalak (Israel).

² Kipoonentamawaak hsa eshi macitootamowaatc kipimaatisiimak, kitakwana'amowaanan kaye kahkina eshi mamaashiiwaatc.

³ Kikii ahtekitaahs kaye kaakii ishi nishki'ihkwaapan, ekii ishihcikeyan ci⁠naakwahsinok kikihci nishkaatisiwin.

⁴ Oo Kishemanitoo Pemaaci'iyaank, kiiwenotawihshinaam, taka mii 'i keshi poonihsek i'i kaashi maanaapamiyaank.

⁵ Miina ko'i nehpic waa⁠ishi nishkaatisiihkantawiyaank? Kikani nishkaatisiihkantawaak ina kaye kahkina keni ayaawaatc.

⁶ Kaawiin ina miinawaa kika kiiwe naasihkawihsiinaam, niinawint wepimaatisiimiyan cikiih ciihkenimikooyampan?

⁷ Oo Tepencikeyan naakohtamawihshinaam kiminotootaakewin, pimaaci'ihshinaam.

⁸ Ninka noontawaa hsa niin Kishemanitoo kaaTipenciketc ke⁠ihkitotc; weweni hsa okanoonaa' opimaatisiima' e⁠ahshotamawaatc pisaanisiwin, tepinawewisitc. Keko tahsh ta⁠ishihcikehsiiwa' ci⁠kiiwenotaminitc okakiipaatisiwinini.

⁹ Iki hsa kaa⁠kohtaanenimaawaatc tepwe opehshwentaanaawaa opimaaci'iwewinini, kaaTipenciketc okihci inentaakosiwin ci‑ishitaamakaninik i'imaa kitahkiiminaanink.

¹⁰ Saaki'iwewin hsa tepweyentaakosiwin itahsh nakishkotaatiimakanoon, kwayahkwaatisiwin, pisaanentamowin kaye hsa nakishkotaatiimakanoon.

¹¹ Tepweyentaakosiwin ihsa ahkiink onci ishpishkaa, Kishemanitoo tahsh wiin okwayahkwaatisiwin kihcikiishikonk onci naashiimakanini.

¹² KaaTipenciketc hsa tepwe kika miinikonaan wenishihshininik, kitahkiiminaanink itahsh ta⁠paahtiinat ke⁠manishikaatek.

¹³ Kwayahkwaatisiwin hsa oniikaaniihtamaakoon kaaTipenciketc eh⁠kwayaancihtamaakotc wa‑ani ishaatc.