Nikamonan 84 - Ojibwe Kihcimasina'ikan

Emihsawencikaatenik Kishemanitoo Owaahkaa'ikan

¹ Tepencikeyan Kaa⁠Maawaci mashkawisiiyaan, etatawe hsa kihci minonaakwan kaa⁠ishitaayan.

² Maawac iko e⁠antawentamaan ci⁠ayaayaan weti! Nimihsawentaan cikii ayaayaampaan kaashi waahkaayaahkonikaatenik kaaTipenciketc otanami'ewikamik; enikohkote'ewak hsa ninka nikamoohtamawaa kaa⁠pimaatisitc Kishemanitoo ehpiihci ciihkentamowak.

³ Tepencikeyan kaaMaawaci mashkawisiiyan, nintookimaam, kaa⁠oKishemanitoomiminaan, inashke hsa wiin a'a osaawipinehshiinsh otooshihtoon ke⁠owasihsonitc; shaashaawanipiihsi kaye oshihtamaaso owasihson keshi kanawenimaatc opinehshiinshenhsima' ciikaya'ii kipakitinaahsowinaapihkonk.

⁴ Aahpici hsa shawentaakosiwak iki kaa⁠ishitaawaatc kiwaahkaa'ikanink; mooshak iko kaa⁠ina'amowaatc e⁠miikwehciwenimihkwaa.

⁵ Aahpici hsa shawentaakosiwak kaa⁠mashkawisii'atwaa, ote'iwaank kaa⁠onci inentamowaatc ewii ishaawaatc waciink Saayan (Zion) kaa'icikaatenik.

⁶ E⁠ani pimi ayaawaatc itahsh kaashi pahsatinaanik pikwatahkamik Paka (Baca) kaa'icikaatenik, mii hsa 'i eni ishi moohkiciwaninik nipi; kaa⁠kimiwaninik kaye mii 'imaa eni onci mooshkinepiinikin kaa⁠wawanahkamikaanikin.

⁷ E⁠ani pimi ayaawaatc tahsh mii 'i eni ishi mashkawaatisiwaatc; piinihsh kahkina cini naakosiwaatc enaahsamiinitc Kishemanitoon eyaanitc Saayanink.

⁸ Oo Tepencikeyan Kishemanitoo kaaMaawaci mashkawisiiyan, Cekap (Jacob) kaa⁠oKishemanitoomimihk, noontawihshin kaashi anami'ehtawinaan.

⁹ Oo Kishemanitoo, taka shawenim kaa⁠naatamawinankitc, mino kanawaapam kaye kaakii onaapamatc.

¹⁰ Peshiko kiishik hsa kii⁠ayaank kitanami'ewikamikonk nawac onishihshin ahpiihc wiin kii⁠ayaank mitaahswaahk tahso kiishik pahkaan ninkoci. Miitahsh niin eshi mihsawentamaan nawac ci⁠kanawentamaampaan ishkwaantem owaahkaa'ikanink ninKishemanitoom, ahpiihc wiin ci‑ishitaawakipan otaawiniwaank kaa⁠maci'ishiwepisiwaatc.

¹¹ KaaTipenciketc Kishemanitoo iitok kaa⁠naatamawinank, kaa⁠kihci inentaakositc kaye kikihciokimaaminaan, wiin iitok kaa⁠minwaapamiwetc, kaa⁠kihtenimiwetc kaye. Kaawiin hsa okihciwinamawaahsii' wenishihshininik i'i kwayahk kaa⁠ishihcikenitc.

¹² Tepencikeyan kaaMaawaci mashkawentaakosiyan, aahpici hsa shawentaakosiwak iki kaa⁠tepweyenimihkwaa.