Nikamonan 73 - Ojibwe Kihcimasina'ikan

Kishemanitoo Eshitipaahkoniwetc

¹ Tepwe hsa Kishemanitoo ominotootawaa' Isriyala' (Israel), i'i kaa⁠pehkisinitc ote'iniink.

² Niin itahsh wiin kekaa ninkiih pisokehshin, kekaa ninkii pihshikoshkike.

³ Ninkii ayaahshenimaak hsa kaa⁠tepakeyenimowaatc ahpii e⁠waapamakwaa ehpiihci minohsewaatc mecaatisiwaatc.

⁴ Kaawiin hsa wiinawaa kanake ci⁠wahsitaawihsewaatc, mashkawaatisiwak, wiinke kaye mino'ayaawak.

⁵ Kaawiin wiinawaa kanake ishi maanshihsehsiiwak taapishkoo kaa⁠ishihsenitc kotak pemaatisinitc; kaawiin kaye ishi wahsitaawihsehsiiwak kotak awiya' kaa⁠ishihsenitc.

⁶ Mii hsa 'i eshinaakosiwaatc taapishkoo e⁠ishi naapishkamowaatc okihci inenintisowiniwaan eshi kikishkikaasotc naapihkaakanimin; eh⁠kikishkamowaatc kaye kihci piikwahkamikisiwin.

⁷ Macikekoon hsa onciini eshi mashkawite'ewaatc, aaniin kaye inahke waa⁠ishi macihcikewaatc mooshak ishi naanaakatawentamook.

⁸ Paahpi'iwewak, noociko kekoon eh⁠papaa ihkitowaatc, e⁠kihci inentamowaatc kaye aaniin eshi kakwe sekihtaakosiwaatc ewii wehkaani'iwewaatc.

⁹ Omaci'itaanaawaa kihcikiishik, o'omaa kaye ahkiink kekoon e⁠manaa ihkitohsikwaa.

¹⁰ Kishemanitoo opimaatisiima' opinaasihkaakoowaa' eh⁠ciihki tepwehtaakowaatc taapishkoo awiya wiinke kaa⁠noonte wii minihkwetc.

¹¹ Mii hsa 'i ehkitowaatc, “Aaniin itahsh inaa Kishemanitoo ke⁠onci kihkentankipan? Okihkentamaawini na Maawac Eshpentaakositc?”

¹² Mii hsa 'i eshi'ayaawaatc mecaatisiwaatc; mooshak e⁠wentisiwaatc, e⁠ani kaanci wenootisiwaatc.

¹³ Mii hsa 'i tepwe ishi anihshaa iinsan kiih⁠kakwe ishihcikeyaan ci⁠pehkahk ninte', ishi anihshaa kaye ekii manaa macihcikeyaan.

¹⁴ Kapekiishik hsa ninkiih pi tootaakoo ci⁠kakwaatakihseyaan, entahso kikishep eh⁠pi nana'ahsikoyaan.

¹⁵ Kiishpin hsa ihkitoyaampaan, “O'o hsa ninka ihkit,” mii 'i iinsan cikii mamishi'akwaapan kiniicaanihsak.

¹⁶ Ahpii tahsh eh⁠kakwe nihsitohtamaan o'o, kaawiin kanake ninkiih kashkihtoohsiin onsaam ekiih sanakentaakwahk,

¹⁷ paanimaa hsa kaah⁠piintikeyaan Kishemanitoo otanami'ewikamikonk, miitahsh payesh kaa⁠kihkentamaan aaniin ke⁠ishihsewaatc mecaatisiwaatc weti ishkwaac.

¹⁸ Kehcinaac hsa kitishi pakitinaak eshi oshaashahkamikaanik, e⁠ishi wepinatwaa keshi nihshiwanaatisiwaatc.

¹⁹ Etatawe hsa kwetahto kiishaahtap nihshiwanaaci'aawak, wiinke hsa ko eh⁠caakaahpinanikowaatc kekwaanihsakentaakwaninik kehci ishiwepaninik.

²⁰ Taapishkoo inaapantamowin kaa‑ayaahsinok i'imaa kaa⁠kishepaawakahk, taapishkoo kiin kii⁠koshkosiyan oo Tepencikeyan kaawiin keyaapi ta‑ayaahsiiwak mecaatisiwaatc.

²¹ Ahpii hsa kaa⁠nishki ishi'ayaayaan ninte'ink, ekii nishkentamaan kaye,

²² mii hsa 'i iinsan ekii waahkamentansiwaan, ekiih kakiipaasinaakosiyaan kaye; ekii ishinaakosiyaan taapishkoo aya'aawihsh enaahsamiiyan.

²³ Shaakooc itahsh mooshak kiwiiciiwin, kikihcinihkiink inahke e⁠ishi sakinihkeniyan.

²⁴ Kikihkino'amawihsh ihsa e⁠kihkinowihshiyan, weti tahsh ishkwaac kika otaahpinihsh ci⁠kihtenimiyan.

²⁵ Awenen itahsh eyaawakipan kihcikiishikonk, mii ehta ko kiin? E⁠wiiciiwinaan itahsh, kaawiin kekoon pahkaan o'omaa ahkiink nimihsawentansiin.

²⁶ Maakishaa hsa niwiiyaw, ninte' kaye ta⁠noonte pwaanawihcikemakanoon, Kishemanitoo iitok kaa⁠mashkawisiihtootc ninte', nehpic kaa⁠miishitc aaniin eshi noontehsewak.

²⁷ Iki tahsh wiin kaa⁠naawaapamihkwaa ta⁠nihshiwanaatisiwak; kikii nihshiwanaaci'aak hsa kaye iki kaa⁠mincimenimihsinowihkwaa.

²⁸ Niin itahsh wiin etatawe onishihshin o'o kaa⁠pehshwaapamak Kishemanitoo, wiin ohsha kaakii onenimak kaaTipenciketc Kishemanitoo ci⁠onaacipa'iwemiyaan, ci⁠waawiintamaakewak kahkina otishihcikewinan.