Nikamonan 71 - Ojibwe Kihcimasina'ikan

Ahkiwensi Keshi'anami'aahpan

¹ Oo Tepencikeyan kiin hsa kaa⁠naacipa'iwaaninaan; keko pakitinihshihken ci⁠akaci shaakooci'ikoyaan.

² Kikwayahkwaatisiwinink hsa nahke ishi naatamawihshin, ishi shaapwii'ihshin kaye; noontawihshin ci⁠pimaaci'iyan.

³ Kiin hsa kitinentaakos ahsiniink mooshak ke⁠naacipa'iwaanak; ishi anoohkiin hsa ci⁠pimaaci'ikooyaan, kiin iitok nintahsiniim kaa⁠naacipa'iwaaninaan, nintahpa'iwewikamik kaye.

⁴ Oo ninKishemanitoom, naatamawihshin onci eshi mashkawisiiwaatc mecaatisiwaatc, ci⁠tepinihsikwaa mecaatisiwaatc, kaa‑aahkwaatisiwaatc kaye.

⁵ Kaa⁠Maawaci Tipencikeyan, kiin ohsha kaapi ahpenimonotawinaan; kii⁠oshkaatisiyaan iko ekiih pi'onci tepweyeniminaan.

⁶ Ahpane ko ahpii kaakii nihtaawikiyaan kikiih pi'onci ahpenimonotawin. Nimaamaa kii⁠kikishkawitc ekiih saakisi'iyan. Mooshak itahsh iko kika miikwehciwenimin.

⁷ Niipiwa' hsa awiyak nimaamahkaatenimikook, kiin itahsh wiin meshkawisiitc kaa⁠naacipa'iwaanak.

⁸ Kaawiin wiihkaa kika pooni miikwehciwenimihsinoon, ci⁠tashintamaan kapekiishik kikihci inentaakosiwin.

⁹ Keko tahsh wepinihshihken o'o kaa‑ahkiwensiiwiyaan; keko nakashihshihken aasha e⁠ani niinamaatisiyaan.

¹⁰ Kaa⁠shiinkenimiwaatc ohsha nimaci tashimikook, e⁠maamawi inentamowaatc iinsan ewii nihshiwaatc,

¹¹ e⁠ihkitowaatc, “Mii hsa 'i Kishemanitoon kii⁠nakanikotc, taka piminisha'waataa ci⁠otihtinank, kaawiin iitok inaa awiyan oka naatamaakohsiin.”

¹² Oo ninKishemanitoom keko waahsa ayaahken, shemaak iko pi⁠wiici'ihshin.

¹³ Taka hsa iki enaamimiwaatc ta⁠nihshiwanaatisiwak ci⁠akaci shaakooci'intwaa; iki kota entawentamowaatc ci⁠wahsitaawihsewak ci⁠paahpinotawintwaa ci⁠kihci inenimaahsiwintwaa kaye.

¹⁴ Niin itahsh wiin mooshak nintayaan ahpenimowin, aanciihke hsa ko kika kihci miikwehciwenimin.

¹⁵ Ninka waawiintamaake hsa kikwayahkwaatisiwin, kipimaaci'iwewin kaye kapekiishik; aanawiin kaawiin nintenihsitohtansiinan.

¹⁶ Oo Tepencikeyan kaa⁠Maawaci Tipencikeyan, ninka piishaa hsa cipi tashintamaan kisoonkihcikewinan, ninka tashintaan kaye kiin ehtako kikwayahkwaatisiwin.

¹⁷ Oo Kishemanitoo, kii⁠oshkaatisiyaan kikiih pi'onci kihkino'amawihsh; o'o tahsh ishi ahpii keyaapi nintashintaanan kimaamahkaacihcikewinan.

¹⁸ Oo Kishemanitoo, mihsawaa hsa ko ahpii ahkiwensiiwiyaan, waapihkweyaan kaye, keko nakanihshihken. Wiiciiwihshin hsa mekwaa eh⁠tashintamaan kimashkawisiiwin, eshi mashkawentaakosiyan kaye ci⁠caaki wiintamawakwaa kahkina pemaatisiwaatc keni ayaawaatc.

¹⁹ Oo Kishemanitoo, kikwayahkwaatisiwin hsa ocihcishkaamakan kiishikonk, kiin kihci kekoon kitishihcike; kaawiin hsa awiya kotak kiin tino ayaahsii.

²⁰ Kipi tootawihsh ihsa e⁠ishinisha'amawiyan niipiwa' maanshihsewinan, wahsitaawentamowinan kaye, shaakooc itahsh kikiiwe mashkawisiihtoon nimpimaatisiwin. Anaamink ahkiink kika pi'onci mayaawin miinawaa.

²¹ Miitahsh ci⁠tootawiyan ci⁠kaanci kihtentaakosiyaan, ci⁠minwentami'iyan kaye.

²² Oo ninKishemanitoom, matweyaapiikipicikan hsa ninka aapaci'aa ci⁠miikwehciweniminaan kaashi tepweyentaakosiyan, kika nikamoohtawin ci⁠miikwehciweniminaan ci⁠aapaci'ak matweyaapiikipicikanenhs, kehtentaakosiyan tepenimatwaa Isriyalak (Israel).

²³ Ahpii hsa nikamoyaan miikwehciweniminaan ninka shaakowe hsa ke⁠ahpiihci minwentamaan, niin iitok kaakiih pimaaci'iyan.

²⁴ Ninka tashintaan hsa eshi kwayahkwaatisiyan kekapekiishik, aaniihsh iki entawentamowaahpan ci⁠wahsitaawihsewak aasha kii⁠akaci shaakooci'aawak, kii⁠wawaanentami'aawak kaye.