Nikamonan 62 - Ojibwe Kihcimasina'ikan

Kishemanitoo Onaatamaakewin

Mii 'oweni Peshik Tepit Onikamon

¹ Kaawiin hsa ninoontaatihsii nintahcaahkonk eh⁠pii'ak Kishemanitoo ehta, wiin iitok kaa⁠miishitc pimaaci'ikoowin.

² Wiin ihsa ehta kaatinowitc ahsiniink e⁠naatamawitc, nimpimaaci'iwem kaye. Wiin hsa kaye kaa⁠naacipa'iwaanak, kaawiin hsa wiihkaa ninka wahkawi wepinikoohsii.

³ Aaniin itahsh minihk waa⁠miikaanek inini, kahkina ewii nihsek, Mii iitok enentaakositc menikan kaa‑aaswaahkosink, kaa⁠piikoshkaak.

⁴ Mii hsa ehta enentamek ewii ani niisipinek eshi kihtentaakositc; e⁠minwentamek eh⁠kiiwanimoyek. Kitinaawaa hsa awiya ci⁠minohsetc, kite'iwaank itahsh wiin kitishi maci'inaahpinemaawaa.

⁵ Kaawiin hsa ninoontaatihsii nintahcaahkonk eh⁠pii'ak Kishemanitoo ehta, wiin ohsha ehta kaa‑ahpenimonotawak.

⁶ Wiin ihsa ehta kaatinowitc ahsiniink e⁠naatamawitc, nimpimaaci'iwem kaye. Wiin hsa kaye kaa⁠naacipa'iwaanak, kaawiin hsa wiihkaa ninka wahkawi wepinikoohsii.

⁷ Nimpimaaci'ikoowin hsa, ninkihtentaakosiwin kaye nintoontinaan Kishemanitoonk, wiin iitok nintahsiniim kaa⁠naatamawitc, wiin kaye kaa⁠naacipa'iwaanak.

⁸ Niicipimaatisiik, mooshak hsa ko tepweyenimihk Kishemanitoo; wiintamawihk kahkina eshi maanshihseyek kite'iwaank, wiin iitok kaa⁠naacipa'iwaanank.

⁹ Ininiwak tepahsentaakosiwaatc ihsa inentaakosiwak saakitanaamowinink, eshpentaakosiwaatc itahsh kaye wanentaakosiwak, kiishpin itahsh minciniish tipaapiishkoosowaatc, nawac hsa ta⁠naankisiwak ehpiihtinikwahk i'i saakitanaamowin.

¹⁰ Keko tepweyentanken kihci inahkamikisiwin ci⁠wiici'ikoyan, keko kimootiwinink inahke ishi ahpenimohken ci⁠onci wenootisiyan. Mihsawaa ko ani kaanci wenootisiyan, keko i'imaa ishi ahpenimohken.

¹¹ Kaawiin hsa ehta aapitink ninkii noontawaahsii Kishemanitoo e⁠ihkitotc, wiin ehtipentank mashkawisiiwin,

¹² wiinke kaye kaaTipenciketc kaa⁠saaki'iwetc. Kehcinaac hsa ko entahsopeshikotc awiya kika ishi tipa'amawaa aaniin kaah⁠pi ishihciketc.